Hosea 1 - GH

¹ Labaar kanɛ da yi Zugsɔb la san'an na tis Hosea onɛ an Beeri biig la nwa', saŋkanɛ ka Uzia nɛ Jotam nɛ Ahaz nɛ Hezekia da di Juda sʋ'ʋlim na'am tisid taaba la ka Jeroboam onɛ an Joas biig la da zin' Israel sʋ'ʋlim na'am gbauŋ zug la.

Hosea pu'a nɛ o biis yɛla

² Zugsɔb la da dɛŋim pian' tis Hosea la, o da yɛl o ye, “Kem nɔk pu'agɔɔndir ka o aan fʋ pu'a, ka o du'a bitampiinb, bɔzugɔ teŋ la tʋm taal ka li nwɛnɛ pu'asan'auŋ nɛ, ban zan'as man Zugsɔb la zug.”

³ Ala ka Hosea da di Goma onɛ an Dibilam pu'ayua la, ka o nɔk pʋʋgʋ du'a biribiŋ.

⁴ Ka Zugsɔb la yɛl Hosea ye, “Pʋdimi o yʋ'ʋr ye, ‘Jezireel’, bɔzugɔ li kpɛlim bi'ela ka m namis Israel Na'ab Jehu na'am tuŋ la, ban da kʋ nidib bɛdegʋ Jezireel teŋin la zug. Ka m na kɛ ka Israel na'am sʋ'ʋlim la naae.

⁵ Daakan la mam na kɔ'ɔg Israel tiraad Jezireel Bɔn'ɔgin la.”

⁶ Goma da lɛm gban'e pʋʋg ya'asi du'a bipuŋ, ka Zugsɔb la yɛl Hosea ye, “Pʋdim biig la yʋ'ʋr ye Loruhama, bɔzugɔ m kʋ lɛm pa'al Israel dimi m nɔŋilim bɛɛ kɛɛ ba taali basɛ.

⁷ Amaa mam Zugsɔb Wina'am na pa'alim nɔŋilim an si'em nɛ Juda nidib. M na faaɛn ba, ba dataas nu'usin, ka ba nyɛ yɔlisim, hali ka li ka'anɛ ye ba nɔk zaba la'ad bɛɛ widi nɛ tanp tɛrekonamɛ zabɛ, amaa li anɛ mam Zugsɔb Wina'am yʋ'ʋr la zug.”

⁸ Goma biig la da tuk bin'isir la, o da lɛm gban'e pɔɔgʋ du'a biribiŋ.

⁹ Ka Zugsɔb la yɛl ye, “pʋdim o yʋ'ʋr ye Loammi, bɔzugɔ Israel dim lɛn ka' m nidiba, ka mam mɛ ka' ba Wina'am.”

Israel dim na lɛn lɛbi ba zi'esimin na

¹⁰ Amaa saŋa kenna ka Israel dim na zu'oe nwɛnɛ atɛuk titan linɛ ka ba kʋ nyaŋi mak bɛɛ kaalɛ. Ka zin'ikanɛ ka ba yɛli ba ye, ya ka' m nidib la, ba na buoli ya anina ye, “Wina'am onɛ vʋe la biis.”

¹¹ Ka Juda nidib nɛ Israel dim na naal nɔɔr yinne, ka mɔr tuongat yinne ka na dɔl taaba lɛbi ba teŋin na. Li na an dabistita'are tis Jezireel.