Hagai 1 - GH

Ban gban'e ye ba mɛ' Wina'am Pʋ'ʋsim Yir la

¹ Na'ab Darius na'am la yʋma ayi' saŋa, li nwadis ayuobʋ la dabisir yinne daar, ka Zugsɔb da pian' tis o nɔdi'es Hagai ka yɛl o ye o mɔɔlim tis Juda gɔmena Zerubabɛl, onɛ saamme an Sealtiel nɛ maanmaan kpɛɛm Josua, onɛ saamme an Jehozadak la

² ye, “Zugsɔb Wina'am Paŋtita'ar Sɔb la yɛl ye, ‘Nimbama yɛt ye saŋa nam pʋ paae ye ba mɛ' Zugsɔb la Pʋ'ʋsim Yirɛ.’”

³ Ani ka Zugsɔb tis o nɔdi'es Hagai labaar ye o tisi ba ye,

⁴ “Saŋa nam pʋ paae, ka bɔ ka yanam mɛɛdi ya mɛŋ ya' sʋma, ka mam Yir lɛɛ kpɛlim dabɔɔgɔ?”

⁵ Nannanna Zugsɔb Wina'am Paŋtita'ar Sɔb la yɛl ye, “Maligin tɛn'ɛsi sʋ'ʋŋa!

⁶ Ya kuod bɛdegʋ ka lɛɛ bʋn fiin; ya dit ka pʋ tigida, ya nuud ka ku'onuud nam kpɛm mɔri ya; ya yɛɛd fuud ka waad kpɛm kpɛn'ɛdi ya; ya tʋmnɛ vaad yɔɔd ka li nwɛnɛ ya ligidi buoris la mɔri vɔnya ka li litnɛ.”

⁷ Zugsɔb Wina'am onɛ an Paŋtita'ar Sɔb la yɛl ye, “Maligin tɛn'ɛsi sʋ'ʋŋa!

⁸ Kemi zuoya la zuti nwa' daad na mɛɛ m Yir la ka li paae m ya'am ka m yʋ'ʋr paam girima.

⁹ Ya tɛn'ɛsid ye ya na paam bɛdegʋ, amaa gɔsima li anɛ fiin; yanamɛ mɔr si'eli kul na la, m kɛya ka sisi'em widigi li. Bɔzug ka li aan ala? M Pʋ'ʋsim Yir la an dabɔɔg ka yanam lɛɛ bɛɛ anina mɛɛdi ya mɛŋ ya' nɛ nimmua la zug.” Zugsɔb Wina'am onɛ an Paŋtita'ar Sɔb la pian'ʋkʋ la.

¹⁰ “Yanam zug ka saa pʋ lɛn niida ka zʋʋd mɛ pʋ lɛm maana.

¹¹ Manɛ kɛ ka sawak bɛɛ ya pɔɔdin nɛ zuoya zut nɛ ya zʋʋd nɛ ya vain tiis nɛ ya kpaam tiis pɔɔdin wʋsa. Ka linɛ wʋsa ka ya kua la kʋ maalɛ, hali nɛ ya ninsaalib nɛ bʋnkɔnbid nɛ ya nu'ug tʋʋma wʋsa na an zaalim.”

Nidib la siak Wina'am nɔɔr la yɛla

¹² Ka Zerubabɛl onɛ an Sealtiel biig, nɛ Josua onɛ an Jehozadak biig ka an maanmaan kpɛɛm la, nɛ nidib la wʋsa da siaki ba Zugsɔb Wina'am la nɛ Wina'am nɔdi'es Hagai nɔɔr, bɔzugɔ ba Zugsɔb Wina'am la tʋm o ba san'an na; ka nidib la wʋsa mɛ zɔt Zugsɔb la.

¹³ Hagai onɛ an Zugsɔb tʋmtʋm la da mɔɔl Zugsɔb la labaari tis nidib la ye, “M na bɛ nɛ ya.” Zugsɔb la pian'ʋkʋ la.

¹⁴ Ka Zugsɔb da kpɛ'ɛŋ Zerubabɛl onɛ an Sealtiel biig ka an Juda gɔmena la sʋnf nɛ Josua onɛ an Jehozadak biig, ka an maanmaan kpɛɛm la, ka mɛ la'am kpɛ'ɛŋ nimbanɛ kpɛlim la wʋsa sʋnya. Ba da kena yʋ'ʋn pin'ili mɛɛdi ba Zugsɔb Wina'am onɛ an Paŋtita'ar Sɔb Pʋ'ʋsim Yir la.

¹⁵ Li da anɛ Na'ab Darius n da di na'am la yʋma ayi' la ni li nwadis ayuobʋ la dabpisi nɛ anaasi daar.