Filipi dim 1 - GH

¹ Mam Paul nɛ Timoti banɛ an Yesu Kristo tʋmtʋmnib la sɔbid gbauŋ kaŋa tisid Wina'am nidib banɛ an yinne nɛ Yesu Kristo ka bɛ Filipi teŋin la, la'an nɛ Wina'am nimbanɛ an tuongatib nɛ sʋŋidib la.

² Ti Ba' Wina'am nɛ ti Zugsɔb Yesu Kristo na tisi ya yɛlsʋm nɛ sumbʋgʋsʋm.

Paul bareka pʋ'ʋsim nɛ winsɔsʋg yɛla

³ M ya'a ɛɛn tɛn'ɛsi ya yɛla, li kɛtnɛ ka m pʋ'ʋsid Wina'am bareka saŋa wʋsa.

⁴ Ka m ya'a ɛɛnti sɔsid Wina'am tisidi ya wʋsa m sɔsidnɛ nɛ sumalisim,

⁵ tinamɛ an tʋmtʋm taaba hali pin'ilʋgʋn sa ti paae zina la.

⁶ M mi' hali ye Wina'am onɛ pin'il tʋʋm sʋŋʋ ya sʋnya ni la, na tʋmi lii naae Yesu Kristo ken dabisir la na.

⁷ Li an sʋm ka m tɛn'ɛsi ya wʋsa yɛla ala, mam mɔri ya pʋtɛn'ɛr sʋŋ la zug. Dinzugɔ ba ya'a lɔɔm nɛ bana bɛɛ ti la'am pa'annɛ nidib ye labasʋŋ la an sida ya na la'an di'ed Wina'am pʋpielim piini la nɛ man.

⁸ Ka Wina'am baŋ ye m ya'am bɔɔdi ya wʋsa nɛ nɔŋilim linɛ yi Yesu Kristo ni na.

⁹ Ka m sɔsid Wina'am ye ya nɔŋilim na pɛ'ɛs hali nɛ mi'ilim nɛ baŋir amɛŋa,

¹⁰ ye ya gaŋ linɛ an sʋm ka an nyain ka dian'ad kae la gur Yesu Kristo lɛbig dabisir na.

¹¹ Ka pɛ'ɛl nɛ pʋpielim wala linɛ yi Yesu Kristo san'an naa tisid Wina'am yʋ'ʋr zʋn'or nɛ na'asi la.

Paul sanrega ni bɛllim la yɛla

¹² M ba'abiisɛ, m bɔɔd ye ya baŋ ye linɛ niŋi m la sid sʋŋ ka labasʋŋ la ken tuon.

¹³ Li kɛ ka gɔmena yin soogianam wʋsa nɛ sɔ' mɛkama baŋ ye ban lɔɔm nɛ bana la, li anɛ Kristo yɛla.

¹⁴ Ka ban lɔɔm nɛ bana zug kɛ ka ti ba'abiis la tita'am pamm kpɛmisʋg ka pian'ad Wina'am labaar la yɛla nɛ kpi'euŋ ka dabiem kae.

¹⁵ Sieba mɔɔn Kristo yɛla la nɛ fufum nɛ nɛnnim ka sieba tʋm nɛ pʋtɛn'ɛsʋŋ.

¹⁶ Ka pʋtɛn'ɛsʋŋ dim la mɔɔnnɛ linɛ nɛ nɔŋilim ka baŋ ye Wina'am zi'el man ye m gu' banɛ zan'as labasʋŋ la.

¹⁷ Ka sieba pʋ mɔɔn Kristo yɛla nɛ pʋpielim, amaa ba mɔɔnnɛ nɛ nɛnnim ka bɔɔd ye m namiskanɛ ka m nyɛt sanrega ni la paas.

¹⁸ Li pʋ pakɛ. Linɛ gaadi li wʋsa anɛ Kristo labaar la mɔɔlʋg; hali li ya'a dɔlnɛ pʋtɛn'ɛsʋŋin bɛɛ pʋtɛn'ɛbɛ'ɛdinɛ, li kpɛm malis man.

¹⁹ Ka m mi' ye li yitnɛ ya Wina'am pʋ'ʋsim nɛ Yesu Kristo Siig Kasi la sʋŋir ni na, ka linɛ maal la na tisim faangir.

²⁰ Linɛ ka man bɔɔd hali ka mɔr ti'iri li yɛla anɛ ye m ya'a kpi bɛɛ m ya'a vʋe m kʋ di nyannɛ amaa m lɛɛ na mɔr sʋnkpi'euŋ ka li kɛ ka Kristo nyɛ na'asi man ni nannanna, wʋʋ on nyɛti ya san'an si'em saŋa wʋsa la.

²¹ Ya'a kpɛlim nɛ mam, m ya'a vʋe, m vʋe nɛ Kristo zug, ka m ya'a lɛn kpi nɛ, li anɛ nyɔɔdi tisim.

²² Ka m ya'a vʋe ka na tʋm tʋʋm sʋma li an sʋm. Amaa mam bɔɔd ba' nɛ ma la zug, m kʋ nyaŋi gban'e linɛ ka m na gaŋɛ.

²³ M bɔɔd ye m yi bɛllim kaŋa nwa' nii keŋ bɛ nɛ Kristo; bɔzugɔ linɛ an sʋm hali.

²⁴ Amaa yanam yɛla, li an sʋm ka m kpɛn vʋe.

²⁵ M mɔr sʋnkpi'euŋ nɛ man yɛl si'el la ka linzug ka m mi' ye m na kpɛm bɛ nɛ ya wʋsa, ka ya yadda niŋir Yesu Kristo ni na keŋ tuon nɛ sumalisim.

²⁶ Ka m ya'a ti bɛ nɛ ya ya'as, ya na tun'e nwɛ' nyɔ'ɔg hali Yesu Kristo ni.

²⁷ Lin an si'em wʋsa kɛlli ka ya bɛllim dɔl nɛ Kristo labasʋŋ la, ka m ya'a kɛɛn ya san'an na bɛɛ m ya'a pʋ kenaa, m na wʋm ye ya gban'e pʋtɛn'ɛr yinne kiŋ-kiŋ, ka mɔɔd nɛ yadda yinne nɛ nɔɔr yinne ye labasʋŋ la siakir na keŋ tuon.

²⁸ Da zɔti ya dataas dabiem baa bi'elaa, ka ya sʋnkpi'euŋ na pa'ali ba ye ba na ba'as bɛ'ɛd. Amaa ka lɛɛ pa'al ye yanam na nyɛ faangir linɛ yi Wina'am san'an na la.

²⁹ Wina'am tisi ya suor ye ya dɔl Kristo, ka li ka'anɛ ye ya niŋ o yadda ma'aanɛ, amaa ye ya siaki namis o zug.

³⁰ Ka ya namisʋg nwɛnɛ yanamɛ da nyɛ man namisid si'em la, ka nan kpɛn wʋmid ye m bɛɛ li pʋʋgin nannanna la.