Fabʋla 1 - GH

Jerusalem tempʋʋg bɛnɛ mugusʋgin

¹ Jerusalem kanɛ ka nidib da pɛ'ɛl la yʋ'ʋn kpɛlimnɛ nɛɛm. Onɛ ka dunia wʋsa da tisid na'asi la yʋ'ʋn nwɛnɛ pʋkɔɔnr nɛ. Tempʋkanɛ da sʋ'oe sʋ'ʋlim bɛdegʋ la yʋ'ʋn lieb yammis teŋ.

² Yʋ'ʋŋ wʋsa ka o kaasid ka o ninta'am yuod bɔr-bɔr. Banɛ da nɔŋ o la wʋsa sʋʋgin sɔ' kae na lɛn bɛlis o ka kpɛ'ɛŋ o sʋnfɔ. O kpi'es la wʋsa gbi'id o nɛ ka yit o nya'aŋ ka lieb o dataas.

³ Juda nidib anɛ yammis ka pʋ mɔr sʋŋirɛ ba kadi ba yisi ba yaan nɛ ba mɛŋ teŋin. Ban bɛ teŋ si'a la ba kʋ nyaŋi yɛl ye ba mɛŋ teŋa, ka ba dataas giligi ba zin'ig wʋsa ka ba kʋ nyaŋi yii.

⁴ Sɔ' pʋ lɛn ken Pʋ'ʋsim Yin laa, ba pʋ kenna ye ba pʋ'ʋs ka di'em malima saŋaa. Pu'asada banɛ daa yʋ'ʋm la namisidnɛ ka maanmaannib la nyɔn nɛ sʋnsa'aŋ. Tempʋʋg la za'anɔya anɛ zaalim ka Zion namisʋg la san'ami ba sʋnya.

⁵ Ba dataas zabi nyaŋi ba ka sʋ'oe ba ka mɔri ba nɛ kpi'euŋ. Zugsɔb la kɛnɛ ka ba namis ka li yinɛ ba tʋʋmbɛ'ɛdin na. Ba biis la bɛ nɛ teŋ zʋŋ, ba gban'e ba wʋsa mɔri keŋ.

⁶ Jerusalem vɛnlim la wʋsa lɛn kae. Li wʋmi ba tuongatib la hali ka ba nwɛnɛ walis ka kɔ'ɔm mɔri ba ka ba gin ka pʋ nyɛ diibɔ. Tɔn'ɔsnam la kati ba ka ba zɔ ka paŋ wʋsa naae.

⁷ Jerusalem yʋ'ʋn kpɛlimnɛ dabɔɔd ka tɛn'ɛsid o kpan'am da an si'em la yɛla. Teŋ la da luu o dataas nu'usin la, sɔ' da kae na nyaŋi sʋŋ o ka o dataas la yʋ'ʋn gɔsid o ka la'ad o, o liig la yɛla.

⁸ Jerusalem tʋm tʋʋmbɛ'ɛd bɛdegʋ dinzug ka o lɛn ka' nyain nɛ. Banɛ da na'asid o la wʋsa yʋ'ʋn gɔsid o nɛ yɔri, bɔzugɔ ba nyɛɛ o gbin. O mɛŋ ʋʋnsidnɛ ka fɛndigi lɛb nya'aŋ sa.

⁹ O tʋʋmfɛn'ɛsa la da nienɛ paalʋ nyain, amaa ka o ba'a kae nɛ on na ba'as si'em. On da san'am si'em la da anɛ yɛlpakir, ka sɔ' mɛ lɛn kae bɛlisid oo. “O m Zugsɔba, gɔsimi m namisʋg la; m dataas la nyaŋim nɛ!”

¹⁰ O dataas la faaɛn o la'asʋma la wʋsa; O nyɛ tembanɛ an ba'amaannib la kpɛn'ɛd o Pʋ'ʋsim Yin la, banɛ ka fʋ kisigi ba ye ba da kpɛn' fʋ nidib la'asʋg zin'igin la.

¹¹ Nidib la fabinnɛ ieed ban na paam si'eli di, ka nɔki ba areza'asi tiak diib ye ba dit ka vʋe. Tempʋʋg la dim kaasid ye “Ti zugsɔba! Gɔsim ban ziemi ti si'em!”

¹² “Li na pʋ pak yanam banɛ gat la? Gɔsim giligi ka ya na nyɛ. Sɔ' lɛm bɛɛ nyɛt tɔɔg wʋʋ namisʋg kanɛ ka Zugsɔb la mɔri kɛɛn m zugin na o sʋnpɛɛn dabisir la?”

¹³ O kɛnɛ ka bugum yii agɔl na dit mam kɔnba. O bɛndim nɛ baŋi gban'e m ka vɛ'ɛgimi lɛbis na. O basim nɛ tɔɔg pʋʋgin ka m namisʋg la pʋ naada.

¹⁴ O vɛɛnsi m tʋʋmbɛ'ɛd la wʋsa ka lɔɔ ba la'as taaba ka nɔki ba kɔlli m niŋgɔɔnrin ka li tɛbisim la kɛ ka m gɛn. Zugsɔb la nɔkimi tisim dataas ka m kʋ nyaŋi zab nɛ ba.

¹⁵ Zugsɔb la zan'as zabzabidib banɛ bɛɛ m san'an la o la'as soogianam ye ba zab nɛ m ka kʋʋ m dasam la wʋsa. Zugsɔb la nɔɔ m nidib la bugusi bugus, wʋʋ ban nɔɔd daam tiwala nwi'asid si'em la.

¹⁶ Nɛ'ɛŋa kɛ ka m kum ka m nini wʋsa an ninta'am, ka sɔ' kae na bɛlisim bɛɛ kpɛmisi ma, M nidib la wʋsa ka'asigɛ ka li anɛ m dataas la zabi nyaŋim la zug.

¹⁷ Teŋ la nwɛnɛ pu'a na tiɛnd o nu'ug amaa sɔ' kae na bɛlis o, ka o yɛt ye “Zugsɔb la zi'el nɔɔri tis Jakob ye o kpi'es na lieb o dataas; Jerusalem yʋ'ʋn nwɛnɛ dian'ad sɔb nɛ ba sʋʋgin.”

¹⁸ Zugsɔb la anɛ pʋpielim sɔb amaa ka man lɛɛ ki'is o zi'elʋg. Sɔ' wʋsa kɛlisim! Gɔsimini m tɔɔg nɛ m namisʋg la an si'em! Ba gban'e m na'akim nɛ m pu'asada la ka ba wʋsa lieb yammisi bɛ teŋ zʋŋ.

¹⁹ M daa buoli m zuanam ye ba kena sʋŋim, amaa ka ba pan'asim ka zan'as. M maanmaannib nɛ m kpɛɛmnam la dɔl suoraadi giligidi ieed diib tempʋʋgin la ye ba di ka vʋe amaa ka pʋ nyɛɛ ka vibi kpi kɔ'ɔm.

²⁰ M Zugsɔba, gɔsimi m sʋʋnri san'am yɔri-yɔri si'em! M pʋʋg lɛɛrim nɛ, ka m sʋnf san'am ka tɔɔg mɔrim hali ka li anɛ m tʋʋmbɛ'ɛd nɛ m tʋbzian'asim la yɛla. Ninkʋʋdibi bɛ suoya la ni, ka kum bɛ za'asin nɛ dɔɔdin wʋsa.

²¹ Nidib wʋmi m kaasig, amaa sɔ' kae na bɛlisi ma. M dataas la wʋsa wʋmi m sʋnsa'aŋ la yɛla; ba maannɛ sumalisim fʋn kɛ ka tɔɔg paam la zug. Kɛl ka namisʋg dabiskanɛ ka fʋ da kaanbi zi'el la lii ba zugin ala ka ba mɛ na nwɛnɛ mam nɛ.

²² Zugsɔba, namisimi ba, ba bugusim la zug. Tɛɛgimi ba tʋbir wʋʋ fʋn tɛɛg mam tʋbir si'em m tʋʋmbɛ'ɛd zug la. M sʋnsa'aŋ la zu'oe nɛ hali ka m bɛn'ɛd susʋnya ban'as.