Daniel 1 - GH

Daniel da paam zamis si'a Babilon teŋin

¹ Jehoyakim da di Juda na'am la, yʋma atan' saŋa, Babilon na'ab Nebukadnɛza da kena nɛ o nidibi lɔbi gilig Jerusalem teŋ la.

² Ka Zugsɔb la bas suor ka o gban'e Jehoyakim onɛ an Juda na'ab la ka vaae Wina'am Pʋ'ʋsim Yin la'ad la. O da zi la'abama wʋsa keŋ digil la'ad dɔɔg linɛ bɛɛ o ba'ar dɔɔgin Babilon teŋin la.

³ Na'ab la da yɛl Aspenas onɛ aan o na'ayikpɛm wʋsa kpɛɛm la ye o gaansim banɛ yi na'adɔɔgin nɛ girima dim la mɔr na.

⁴ Di nar ye ba an dasam banɛ ka' dɛŋŋa ka vɛnl, ka ba zug tʋm, ka ba nyɛ sa'alʋg, ka an banɛ na tun'e zamis ka gban'e si'el gbin tɔ'ɔtɔ, ka nar ye ba tʋm na'ayin la. O da ye o pa'ali ba Babilon dim pian'ad nɛ ba ya'am gbana nɛ ba malima yɛla.

⁵ Na'ab la da maknɛ dikanɛ ka ba na di nɛ dankanɛ ka ba na nu daar wʋsa o diib zin'igin la. Li da anɛ ye ba zamisi ba yʋma atan', ka lin nya'aŋ ka ba keŋ tʋm tis Na'ab la.

⁶ Banɛ da yi Juda ka ba gaŋi ba la da anɛ Daniel nɛ Hanania nɛ Misael nɛ Azaria.

⁷ Na'ayir kpɛɛm la da tisi ba yʋ'ʋpaala. Ba da buon Daniel ye Belteseaza, ka buon Hanania ye Siadirak, ka buon Misael ye Mesiak, ka buon Azaria ye Abɛdnɛgo.

⁸ Amaa Daniel da gban'e ye o kʋ di na'ayir la diib bɛɛ o nu daam la dian'a o mɛŋa, ka da sɔs suor kpɛɛm la san'an ye o pʋ bɔɔd ye o niŋ ala dian'a o mɛŋa.

⁹ Wina'am da kɛ ka kpɛɛm la ya'am kpɛn' Daniel ka o zɔɔ o nimbaanlig.

¹⁰ Amaa kpɛɛm la lɛɛ da zɔtnɛ dabiem ka yɛl Daniel ye, “Na'ab la, pʋm pa'alim yanamɛ na di ka nu si'el. O ya'a ti nyɛ ka ya niŋgbina pʋ saalim wʋʋ ya dasam taaba la, o na kʋʋm.”

¹¹ Na'ayir kpɛɛm la da bɔ sɔ' ka o gur Daniel nɛ o zuanam atan' la. Daniel da yɛl onɛ ka kpɛɛm la gaŋ ka o guri ba la ye,

¹² “M zugdaana, m bɛlimnɛ, nɔkim dabisa piiga ma'aa kpansi ti gɔs. Da tisi ti si'eli gaad zɛnvaand nɛ ku'om ma'aanɛ.

¹³ Ka yʋ'ʋn mak tinam nɛ ti taaba banɛ dit Na'ab la disʋma la gɔs tinamɛ na an si'em, ka lin nya'aŋ fʋ tun'e maali ti fʋn bɔɔd ye fʋ maal si'em wʋsa.”

¹⁴ O da siak ala tisi ba ka kpansi ba dabisa piiga.

¹⁵ Dabisa piiga la nya'aŋ, ba laafi nɛ ba vɛnlim da gaadi ba taaba banɛ da dit disʋma la.

¹⁶ Ka onɛ guri ba la da nɔk diib nɛ dansʋma linɛ ka na'ab la tis la ka lɛdig zɛnvaand.

¹⁷ Wina'am da tis nidiba anaasi bama mi'ilim ka ba gban'ad ban zamisid si'el la gbin sʋ'ʋŋa. Ka Daniel baŋid nier nɛ zaansʋŋ wʋsa gbinnɛ pa'an.

¹⁸ Saŋa kanɛ ka Na'ab la da zi'el ye ba mɔri ba lɛb o san'an na la da paae la, kpɛɛm la da mɔri ba keŋ Na'ab Nebukadnɛza san'an.

¹⁹ Ka Na'ab la sɔns nɛ ba ka nyɛ ka dasam la wʋsa sʋʋgin sɔ' kae nwɛnɛ Daniel nɛ Hanania nɛ Misael nɛ Azaria. Dinzug Na'ab la da kɛ ka ba kpɛlim o yin la tʋmmi tisid o.

²⁰ Na'ab la ya'a da bɔɔd ya'am bɛɛ sa'alʋg o bu'osidnɛ ban, bɔzugɔ, o da nyɛ ka ba sɔn'oe o tima dim nɛ banɛ maan nyalima o sʋ'ʋlim la ni wʋsa nɔɔr piiga.

²¹ Daniel da bɛɛ ani, hali ka Na'ab Sarus ti di na'am.