Atan' Joon 1 - GH

¹ Man onɛ an kpɛɛm la sɔbid nɛ'ɛŋa tisid fʋn Gaius, onɛ ka m sid nɔŋ amɛŋa la.

² M zua nɔŋirɛ, m sɔs Wina'am ye fʋ si'el wʋsa na an sʋm, ka fʋ na bɛ laafi, ka mi' ye fʋ siig mɔr laafi Wina'am tuon.

³ Li malisim bɛdegʋ nɛ ti zuanam sieba paae na ka yɛl fʋn dɔl yɛlsida la sʋ'ʋŋa si'em la. Ti mi' ye fʋ bɛllim pʋʋgin fʋ dɔl yɛlsida la daar wʋsa.

⁴ Si'el kae na tisim malisim gaad man wʋm ye m biis la dɔl yɛlsida laa.

⁵ M zua nɔŋirɛ, fʋ anɛ yɛlsida sɔb nɛ fʋn niŋ si'eli sʋŋ yadda niŋidib la, hali la'an nɛ ban an saam la.

Gaius la yɛla

⁶ Ba tu'asi fʋ nɔŋilim la yɛla tis Wina'am nimbanɛ bɛ kpɛla la. Sʋŋimi ba ka ba keŋ tuon. Kɛl ka fʋn sʋŋi ba si'em la malis Wina'am.

⁷ Bɔzugɔ Kristo tʋʋma yɛla, ka ba yii ken, ka zan'as banɛ ka' Kristo nidib la sʋŋir.

⁸ Dinzugɔ li sʋ'ʋm ka ti sʋŋi ti tʋmtʋm taaba nwa' ka ba mɔɔl sida pian'ad la tis nidib.

Diotrefes nɛ Demetrius yɛla

⁹ M daa sɔb si'eli tis Wina'am nimbanɛ bɛɛ fʋ teŋin la. Ka Diotrefes onɛ bɔɔd ye o niŋi ba tuongat la pʋ siak man sɔb si'el la.

¹⁰ M ya'a ti kena m na tu'asi ya on tʋm si'el ka kɛɛndi ti ka ma'adi tisidi ti la. Ka lin pʋ sia'al oo, ka o lɛn zan'asi ti taaba di'er. O vi'id banɛ bɔɔd ye ba di'e ba la, ka kadi ba yis Wina'am nidib la sʋʋgin.

¹¹ M zua sʋŋɔ, da tu'asidi linɛ an bʋmbɛ'ɛdɛ. Tu'asim linɛ an sʋm. Onɛ mɛkama tʋm dinɛ an sʋm anɛ Wina'am nid. Onɛ mɛkama tʋm dinɛ an bʋmbɛ'ɛd zi' Wina'am.

¹² Sɔ' wʋsa pian'ad Demetrius yɛla sʋ'ʋm, hali yɛlmɛŋir dim la mɛ pian'ad o yɛla sʋ'ʋm. Ka tinam mɛ dii o yɛlsida la kasɛt. Fʋn mɛŋ mi' ye ti kasɛt la anɛ sida.

Pʋ'ʋsʋg

¹³ M mɔr pian'ad bɛdegʋ na yɛlif, ka pʋ bɔɔd ye m sɔbi niŋ gbauŋʋn nɛ.

¹⁴ M mɔr ti'ir ye m na kena kaaf dabisa ayi' nwa' ni, ka ti pian' tis taaba.

¹⁵ Sumalisim bɛ nɛf. Fʋ zuanam wʋsa pʋ'ʋsidif. Pʋ'ʋsimi ti zuanam la yinne-yinne tisi ti.