Amos 1 - GH

¹ Labakaŋa yinɛ Amos onɛ da gʋ'ʋn kɔnbid ka yi Tekoa tempʋʋg linɛ bɛ Juda sʋ'ʋlimin la ni na. Li pa'annɛ on da nyɛ si'el Israel yɛla la, li yʋma ayi' nya'aŋ ka teŋ nyaan dam la, saŋkan ka Uzia da an Juda na'ab ka Jeroboam onɛ saamme da an Jehoas ka o an Israel Na'ab la. Wina'am da nie yɛlbama Israel yɛla tis Amos.

² Ka Amos yɛl ye, “Zugsɔb la nwa'am Zion zuorin, ka o kʋkɔr yi Jerusalem tempʋʋgin na. Yaama bɛ zin'isi'a ka kɔnbkemnib kemmi ba kɔnbid la kʋdignɛ, ka mɔɔd banɛ bɛ Kaamel Zuor zug la kanb.

Wina'am na kad Israel kpi'es saria

³ Zugsɔb la yɛl ye, ‘Damaskus teŋ tʋm tʋʋmbɛ'ɛd ka li paae zin'is atan', hali li paae anaasi, m kʋ lɛn nyaŋi mɔdig nɛ m sʋnpɛɛn laa. Bɔzugɔ, ba da mɔr kʋnt kanɛ mɔr nyina m bʋ'ʋd Gilead nidib wʋʋ ban bʋ'ʋd ki si'em la.

⁴ M na kɛ ka bugum di Na'ab Hazael yir nɛ Na'ab Ben-Hadad kpi'euŋ zin'is la, ka san'ami li wʋsa.

⁵ M na nwa'ae Damaskus za'anɔya la; ka san'am nimbanɛ bɛ Aven Bɔn'ɔgin la nɛ onɛ zin' na'am gbauŋ la zug la. Ka lɛn kʋ onɛ an na'ab Beteden teŋin la. Aram nidib la na lɔ'ɔŋ Kir teŋinɛ kpɛn' sankpan'asim.’ Zugsɔb la yɛl si'em la.

⁶ “Zugsɔb la yɛl si'eli nwa': “Gaza teŋ tʋm tʋʋmbɛ'ɛd ka li paae zin'is atan', hali li paae anaasi m kʋ lɛn nyaŋi mɔdig nɛ m sʋnpɛɛn laa. Bɔzugɔ ba gban'e tɛɛns la nidibi kuosi tis Edom teŋ dim.

⁷ M na kɛ ka bugum kanb Gaza zaŋguoma la; li na kanbi dii ba kpi'euŋ zin'is la wʋsa san'am.

⁸ M na san'am Asdod na'ab, nɛ onɛ mɔr na'am kpi'euŋʋ bɛ Askɛlon la. M mɛ na zab nɛ Ekron teŋ, hali ka Filistia dim la wʋsa ti kpii naae.” Zugsɔb onɛ an Paŋtita'ar Sɔb la yɛl.

⁹ Zugsɔb la yɛl si'eli nwa' ye, “Taya dim tʋm tʋʋmbɛ'ɛd ka li paae zin'is atan'; hali li paae anaasi ka m kʋ lɛn nyaŋi mɔdig nɛ m sʋnpɛɛn la. Bɔzugɔ, ba gban'e tɛɛns la nidibi kuosi tis Edom teŋ dim, ka ba ba'a kae nɛ nɔnaar linɛ kɛ ka ba an ba'abiis la.

¹⁰ M na kɛ ka bugum kanb Taya teŋ zaŋguoma la; li na kanbi ba kpi'euŋ zin'is la wʋsa.”

¹¹ Zugsɔb la yɛl si'eli nwa' ye, “Edom dim tʋm tʋʋmbɛ'ɛd ka li paae zin'is atan', hali li paae anaasi m kʋ lɛn nyaŋi mɔdig nɛ m sʋnpɛɛn la. Bɔzugɔ ba kadi ba ba'abiis Israel dim la nɛ zaba sʋ'ʋg, ka pʋ zɔɔ ba nimbaanliga ba sʋnya pɛligi galis ka dit wʋʋ bugum pielim ka pʋ ma'ad la zug.

¹² M na tud bugum Teman teŋin ka li na kanb Bozira kpi'euŋ zin'is la.”

¹³ Zugsɔb la yɛl si'eli nwa' ye, “Ammon dim tʋm tʋʋmbɛ'ɛd ka li paae zin'is atan', hali li paae anaasi m kʋ lɛn nyaŋi mɔdig nɛ m sʋnpɛɛn laa. Bɔzugɔ ban da bɔɔd ye ba yaligi ba teŋ titɔndis la, ba da zab nɛ Gilead teŋ la ka lati ba pu'apʋʋs.

¹⁴ M na nyu'oe Rabba teŋ zaŋguoma la bugum ka li na kanbi ba kpi'euŋ zin'is la; saŋkan la ba na nyɛ yɛltɔɔg tanp nwɛ'ɛb daar, ka zaba la daar la na nwɛnɛ sisi'etita'ari da'adnɛ.

¹⁵ Na'ab nɛ o na'ayikpɛm wʋsa na lɔ'ɔŋ teŋ zʋŋʋ kilim yammis.” Mam Zugsɔb la yɛl.