रोमी 5 - पुना गच्छरना NT (BSI)धर्मेस गने ओक्कना इजना अरा रिझ्रना 1 औंगे नाम पत्त'अना ती उजगो आल मन्तारदत, होले नम्है उर्बस येसु मसीस ती धर्मेस गने ओक्कना इजना र'ई। 2 येसुस नमन नम्है पत्त'अना चड्डे ई पुना नता नू ओन्द्रकादस एका इय्या नाम धर्मेसी मया आबोन लखदत। धर्मेस आसी महबा आबोन नमा गे ख़ट्टोस, ई असरा ती नाम रिझ्रदत। 3 अरा ईद ती लेका मला नाम नम्है खिलपत नू हूँ रिझ्रदत। एन्देरगेका नाम अख़दत का खिलपत ती सहना, 4 सहना ती चोखा उरखना, अरा चोखा उरखना ती असरा मनी। 5 असरा ती लज्जे मॊख़रना मल मनी, एन्देरगेका धर्मेस नमा गे चिच्का नेम्हा बॊलतस ती तंग्है चोन्हा आबोन नम्है जिया नू चाचकादस। 6 एकाबारी नाम नमन नाड़ा पोल्ला लिक्कत, ख़नेम मसीस ठौका बेड़ा नू नम्है पाप गे केच्चस। 7 उजगो आलस गे बग्गे आलर तंग्है जियन चि'आ मल बेद्दनर। अन्नु हों मना उंगी का दौ आलस गे नीकईम खे'आ गे डिढ ननोस। 8 लिकिन नाम पपहा र'अना बेड़ा नू मसीस नमा गे केच्चस। इत्रु ती धर्मेस नम्है मइय्याँ ता तंग्है चोन्हन दहदर नन्दस। 9 अक्कु गा नाम मसीसी ख़ॆंस ती उजगो मंजका र'अदत होले आस नमन धर्मेसी ख़ीस ती नाड़ोस दिम। 10 एन्देरगेका नाम धर्मेसी बैरी र'ओ बारी नाम धर्मेस गने आसी ख़द्दासी खे'अना ती निभ्रदत। अक्कुन नाम धर्मेस गने निभ्रकत ख़ने आस नमन तंग्दासी उज्जना ती दंडे ती नाड़ोस दिम। 11 ईद लेका मला अक्कुन धर्मेस गने निभ्रनन चिच्का नम्है उर्बस येसु मसीस ती नाम धर्मेस नू कोड़हे रिझ्रदत। आदमस ती खे'अना मसीस ती उज्जना 12 औंगे एकासे का ओन्टा आलस ती पाप ख़ॆख़ेल नू कोरचा, अरा पाप ती खे'अना मंजा। उर्मी आलर पाप नंजर ख़ने ई लेक्खा ओर्मर मइय्याँ खे'अना मंजा। 13 मूसासी पॆसका चि'अना ही मुन्द दिम पाप ख़ॆख़ेल नू रहचा। लिकिन पॆसका मल र'अना ती पाप ही लेखरना मल मना लिया। 14 आदमसी परिया ती मूसासी परिया गूटी आलर आदमस धर्मेसी पॆसकन चाड़ियस आ लेक्खा आर हूँ पॆसकन चाड़ियर ती पाप मल नंजर। अन्नु हूँ आर खे'अना बारिम रहचर। ई आदमस ख़ॊख़ा बरचस आ मसीसी कटइसकेम चिन्हा र'अदस। 15 लिकिन आदमसी अक्का-बलका गने धर्मेसी मया ही इनाम जोक्खा मल्ला। ओर्त आलासी अक्का-बलका ही चड्डे कोड़हे आलर केच्चर। लिकिन धर्मेसी मया कोड़हे कोहाँ र'ई, धर्मेसी मया ही इनाम उज्जना आबोन ओर्त आलस येसु मसीसी मया ती कोड़हे आलर ख़क्खियर। 16 ओर्त आलासी पाप अरा धर्मेसी मया ही इनाम नू एन्द्रा हूँ जोक्खा मलकी। ओर्तोसी पाप चड्डे दंडे गा चितारा। लिकिन नाम अजम अक्का-बलका गुट्ठी नंजका ती हूँ धर्मेसी मया इनाम नमा गे चितारा, अत्रु ती नाम धर्मेसी ऎरना नू उजगो मन्दत। 17 ओर्त आलस पाप नंजस, ई ओर्त आलस चड्डे खे'अना ओर्मा आलर मइय्याँ राजी नंजा। लिकिन एका ओर्तर एका बग्गे धर्मेसी भरपूर मया अरा आसी इनाम ही उजगो आबोन ख़क्खनर, आर मानिम नू मानी उज्जनन ख़क्ख्रकी ओर्त आलस येसु मसीस ती राजी ननोर। 18 औंगे आदमसी ओन्टे लेका अक्का-बलका ओर्मा आलर गे खे'अना ही दंडे आबोन ओन्दरा। ओन्टा दौ नलख एकदा मसीस नंजस, ईद ओर्मा आलारिन धर्मस गने उजगो कम'आ ऊंगी। अरा ईद जनमजुग उज्जनन ओन्द्र'ई। 19 एकासे का ओर्त आलस धर्मेसिन मल मन्नना ती कोड़हे आलर पपहा मंजर केरर। अन्नेम ओर्त आलस धर्मेसिन मन्नना ती कोड़हे आलर उजगो मन्र'ओर क'ओर। 20 आलर तमन एवंदा पपहा र'अनर अदिन अख़'आ गे आर गे धर्मेसी पॆसका चितारा। लिकिन आलर अउरिम कोड़हे पाप नंजर अरा धर्मेसी मया हूँ कोड़हे मंजा। 21 पाप खे'अना ती राजी नंजा। ई लेक्खा धर्मेसी चोन्हा हूँ उजगो ती नम्है उर्बस येसु मसीस ती जनमजुग ही उज्जनन ओन्द्र'आ गे राजी ननी। |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India