रोमी 10 - पुना गच्छरना NT (BSI)

¹ अना भ‍ईरो! एंग्‍है जिया ही चिबाख़ारना अरा धर्मेसिन एंग्‍है गोहरारना ईद र'ई का इस्राऎल आलर नाड़रना ख़क्ख्रना र'ई।

² ऎन आर ही पत्त नू ई गोवाह चि'आ ओंग्दन का आर ही म‍इय्याँ धर्मेस गे इन्द्रिइम नन्‍ना ही मने गा र'ई। लिकिन आर ठौका डहरेन बलनर।

³ एन्‍देरगेका धर्मेस आलारिन एकन्ने उजगो कमदस अदिन आर बल्‍लर, अरा आर तमन तम्‍है मने ती उजगो नना गे चिहुट नंजर। ख़ने आर धर्मेस तमन उजगो नना गे मल चिच्‍चर।

⁴ एन्‍देरगेका धर्मेस एन्‍देर गे नॆग चिच्‍चस अदही मनेन मसीस पूरा नंजस, औंगे एका ओर्तर मसीसिन पत्त'ओर आर उजगो मनतार'ओर।

यहूदी अरा नन-यहूदी नू टं‍टे बखड़ा मल्‍ला

⁵ मूसस नॆग लेक्‍खा उजगो मन्ना ही पत्त नू लिखदस, “एका ओर्तस इबड़ा नॆग नू बाचका उर्मी कत्‍थन पॆस्र'ओस आस गे इत्रु ती उज्‍जना ख़क्ख्र'ओ।”

⁶ लिकिन पत्त'अना ती उजगो मन्ना इदिन ब'ई, “नीम निम्‍है जिया नू एन्ने अमा सोच'आ का ‘नॆ मेर्ख़ा क'ओ?’ अन्‍ति मसीसिन किय्या ओन्‍द्र'आ गे।

⁷ महले ‘नॆ ख़ोड़ख़ा गड्डी नू एत्तो?’ अन्‍ति मसीसिन केचका ती म‍इय्याँ ओन्‍द्र'आ बर'आ गे।”

⁸ लिकिन नेम्‍हा पुथी एन्ने ब'ई, “क‍त्‍था निम्‍है हेद्दे र'ई, ब‍ई नू अरा जिया नू र'ई।” ईद पत्त'अना ही कत्‍था हवे, एकदन ऎम तेंगा कुद्दम।

⁹ एन्‍देरगेका नीम निम्‍है बई ती “येसुस दिम उर्बस” ब'अना ती धर्मेस आसिन केचका ती उज्‍जताचस एन्ने निम्‍है जिया नू पत्त'अदर होले, नीम नाड़र'ओर।

¹⁰ एन्‍देरगेका जिया ती पत्त'अना चड्डे आलस उजगो मन्‍दस अरा ब‍ई ती तंग्‍है पत्त'अनन तेंगरना चड्डे नाड़रदस।

¹¹ नेम्‍हा पुथी एन्ने ब'ई, “नॆ तंग्‍है आसी म‍इय्याँ पत्त'ई आस गे लज्‍जे मॊख़रना मल मनो।”

¹² यहूदीर अरा नन-यहूदीर नू एन्‍देर हूँ भोड़ मलकी, ओर्मर ही ओन्‍टे लेका उर्बस र'अदस। आसिम सहाड़ा गे आसिन गोहरारनर अबड़ा ओर्मारिन बरकत नन्‍दस।

¹³ एन्‍देरगेका नेम्‍हा पुथी ब'ई, “नीकईम उर्बासी नामे नू गोहरारनर आर नाड़र'ओर।”

¹⁴ लिकिन आलर आसिन मल पत्ताचका होले आर नाड़र'आ गे एकासे आसिन गोहरार'ओर? अबड़र आसी पत्त नू मेना हूँ मल्‍ला मेंजका होले आसिन एकासे पत्त'ओर? ओर्त हूँ आसी पत्त नू तेंगा कुद्दु मल र'ओर होले आर एकासे मेनोर?

¹⁵ अरा आस मल त‍इर'ओस होले आस एकासे तेंगा कुद्दू मनोस? नेम्‍हा पुथी नू लिख्रकी र'ई, “दौ कत्‍था तिंगू आलर ही ख़ेड्डे ऎ कोड़हे सुभ'ई।”

¹⁶ अन्नु हूँ ओर्मा इस्राऎलर दौ कत्‍थन मल इंझ्रर। होले धर्मेसी कत्‍था तिंगू यसायास एन्ने बाचस, “उर्बायो! नॆ एम्‍है कत्‍थन पत्ताचर?”

¹⁷ दौ कत्‍था मेन्ना ती पत्त'अना मनी, अरा मेन्‍तार'ई आद मसीसी कत्‍था हवे।

¹⁸ लिकिन ऎन मेन्‍दन, एन्‍देर इस्राऎलर दौ कत्‍थन मल्‍ला मेंजका का? आर मेंजकम र'अनर। एन्‍देरगेका नेम्‍हा पुथी ब'ई, “आर ही सड़ा सौंसे ख़ॆख़ेल नू बींड़्रकी किरकी र'ई, अरा आर ही कत्‍था गुट्ठी ख़ॆख़ेल ठुट्ठु गुट्ठी गूटी अंड़सिया।”

¹⁹ ऎन अउरिम मेन्‍दन, इस्राऎलर अबड़ा कत्‍थन मल बुझ्रर का? आर बुझ्रर। मुन्‍द गा, मूसस धर्मेसी ई कत्थन ब'अदस, “निमन ऎन एकार एंग्‍है चज्जिका जातियर मलनर आर ही ती इस्‍गा नन्‍त'ओन, अरा निमन ऎन एन्‍द्रा हूँ मल बुझ्र'ऊ जातियर ती ख़ीस नन्‍त'ओन।”

²⁰ धर्मेसी कत्‍था तिंगू यसायास हूँ डिढ नंजस ती धर्मेसी ई कत्‍थन ब'अदस, “नॆ एंगन मल बेद्दा लगियर अबड़र एंगन ख़क्‍खियर अरा नॆ एंग्‍है पत्त नू मल मेनालियर आर गे ऎन एंगन दहदर नंजकन।”

²¹ लिकिन इस्राऎलर ही पत्त नू धर्मेस ब'अदस, “गोट्टा उल्‍ला ऎन मल पॆस्र'ऊ अरा हुलहुली ननू आलर तरा इंझ्र'आ गे ख़ेक्खन पस्‍ती नंजकाचकन।”