दहदर मंजका कत्था 3 - पुना गच्छरना NT (BSI)सरदीस कलीसिया गे तेंगना कत्था 1 सरदीस नगरे ता कलीसिया ही पैकस गे नीन एन्ने लिख'आ का: नॆ धर्मेसी सतियो बॊलतन अरा सतियो बीनकोन धरचकादस, आस इबड़ा कत्थन ब'अदस। ऎन निंग्है नलख गुट्ठिन अख़दन। आलर निंगन उज्जालदय ब'अनर, लिकिन नीन गा केचका र'अदय। 2 अक्कु एज्र'अय, अरा खे'आ बेद्दना ती नॆ नॆ बछ्रका र'अनर आरिन बड़ियर नना। एन्देरगेका निंग्है नलख गुट्ठिन एंग्है धर्मेसी ऎरना नू अदखला ख़क्खकन। 3 औंगे सुरता नना का एका कत्थन नीन इंझरकादय अरा मेंजकादय, अरा अदिन पॆस्र'आ, अरा जियन किर्त'आ। नीन एज्रका मल र'अदय होले, ऎन ख़लबस लेक्खा बर'ओन। अरा नीन कहियों बल्लोय का ऎन एका बेड़ा नू निंग्है बिड़दो बर'ओन। 4 अन्नु हूँ तम्है किचरिन सोतरा मल्ला नंजका जोक्क आलर सरदीस कलीसिया नू निंगा गे र'अनर। आर पंडरू किचरी अत्तोर ती एंग्है गने ऎकोर, एन्देरगेका आर अदगे जॊगे र'अनर। 5 नॆ जित'ओस आस गे अन्नेम पंडरू किचरी अत्ततार'ओर। अरा ऎन आसी नामेन उज्जना ही पुथी ती कहियों मल मेट'ओन। लिकिन आसी नामेन एम्बासी अरा आसी मेर्ख़ा पैकर की मुन्दहारे तेंगर'ओन। 6 नेम्हा बॊलतस कलीसिया गुट्ठी गे एन्देर ब'अदस, अदिन नॆखअय मेना गे ख़ेबदा र'ई आस मेन्दस ती बुझुरदस नेकअन। फिलदेलफिया कलीसिया गे तेंगना कत्था 7 फिलदेलफिया नगरे ता कलीसिया ही पैकस गे नीन एन्ने लिख'आ का: नॆ नेम्हा अरा मानिम र'अस, अरा नॆ बॆल दाऊदसी कुची ही अदिया आबोन उइय्दस, अरा नॆ हूँ मुच्चा पोलना लेक्खा तिसग'उस, अरा नॆ हूँ तिसगा पोलना लेक्खा मुच्च'उस इबड़ा कत्थन ब'अदस का: 8 ऎन निंग्है नलख गुट्ठिन अख़दन। निंगा जुक्किम सवंग र'ई, अन्नु हूँ नीन एंग्है कत्थन पॆस्रकय अरा एंग्है नामेन मल दुस्सकय। औंगे ऎरा, ऎन ओन्टा तिसग्का बलिन निंग्है मुन्दहारे उइय्कादन अदिन नॆ हूँ मुच्चा पोलनर। 9 ऎरा, यहूदी मलनर ती तमन यहूदी एन्ने ठक'ऊ सैतान ही गोड़हा एड़पा ता जोक्क आलारिन निंगा गे ऎन चि'ओन। अरा आर बर'ओर ती निंग्है मुन्दहारे ख़ेडमूली खत्र'आ गे नन्त'ओन। अरा आर अख़'ओर चि'ओर का ऎन निंगन चोन्हा नंजकादन। 10 खतिर गने सह'आ गे ऎन निंगा गे चिच्का एंग्है पॆसकन नीन पॆस्रकय। औंगे ख़ॆख़ेल नू र'ऊ आलारिन बिढ़'आ गे सौंसे ख़ॆख़ेल मइय्याँ बरना र'ई आ सस्ती ही बेड़ा ती ऎन हूँ निंगन बछाब'ओन। 11 ऎन चाँड़हे बर'आलदन, एंग्है नू जिटजिटने पत्त'अते र'आ। ख़ने नॆ हूँ निंग्है इनामन मल हो'ओर। 12 नॆ जित'ओस आसिन ऎन एंग्है धर्मेसी मन्दिर नू ओन्टा खुटा कम'ओन। अरा आस इकला हूँ अइय्या ती मल गुछर'ओस। अरा ऎन आसी मइय्याँ एंग्है धर्मेसी नामेन अरा एंग्है धर्मेसी नगरे ही नामेन लिख'ओन। पुना येरुसलॆम दिम धर्मेसी नगरे हवे। ईद एंग्है धर्मेस ती मेर्ख़ा तरती इत्त'ई। अरा ऎन एंग्है पुना नामेन हूँ आसी मइय्याँ लिख'ओन। 13 नेम्हा बॊलतस कलीसिया गुट्ठी गे एन्देर ब'अदस, अदिन नॆखअय मेना गे ख़ेबदा र'ई आस मेन्दस ती बुझुरदस नेकअन। लवोदिकेया कलीसिया गे तेंगना कत्था 14 लवोदिकेया नगरे ता कलीसिया ही पैकस गे नीन एन्ने लिख'आ का: नॆ आमेन, अरा पत्त'अना जॊगे अरा मानिम गोवाह, अरा धर्मेसी गढ़्रना ही ऒरे हिकदस, आस इबड़ा कत्थन ब'अदस। 15 ऎन निंग्है नलख गुट्ठिन अख़दन का नीन कीरना हूँ मला, कुड़ना हूँ मला। नीन कीरना महले कुड़ना र'आ गे ऎन बेद्ददन। 16 एन्ने नीन बिगर कुड़ना अरा बिगर कीरना ती उसुम उसुम र'अदय। औंगे ऎन निंगन एंग्है बई ती पुरच'ओन चि'ओन। 17 नीन एन्ने ब'अदय का, ‘ऎन उरुब र'अदन, अरा एंग्है गुसन उर्मी र'ई, अरा एंगा इन्द्रिइम लॊ ही चाड़ मलकी।’ लिकिन नीन इदन बलदय का, नीन कोहाँ ख़त्तय अरा नॆख'आ ही मया मलका अरा कीड़ा अरा अन्धहा अरा ठेठेंगे र'अदय। 18 औंगे ऎन निंगा गे सलहा चि'अदन का, नीन चिच्ची नू धुकचका सोना एंग्है गुस्ते ख़ॆन्दा, ख़ने नीन उरुब मनोय कालोय। अरा नीन एंग्हा ती पंडरू किचरी ख़ॆन्दा का, अदिन अत्तोय ती निंग्है मॆद ठेठेंगे अम्बो र'आ अरा लज्जे मल मॊख़ोय। अरा निंग्है ख़न्न नू नना गे सुरमा ख़ॆन्दा का, अदिन ननोय होले निंग्है ख़न्न रफ'ओ। 19 ऎन नॆकन चोन्हा नन्दन आरिन केबदन अरा कोड़दन। औंगे चॆत लगे र'आ अरा जियन किर्त'आ। 20 ऎरा, ऎन बली मुन्दहारे इज्जकन ती ठोकठोका ब'अदन। नीकईम एंग्है सड़न मेन्दस ती बलिन तिसगदस होले, ऎन आसी गुसन बर'ओन ती आसी गने ओनोन मॊख़'ओन अरा आस एंग्है गने ओनोस मॊख़'ओस। 21 एकासे ऎन जित्तचकन ती एम्बस गने आसी बॆल-गदिया नू उक्कन, अन्नेम नॆ जित'ओस आस गे ऎन एंग्है गने एंग्है बॆल-गदिया नू ओक्का गे अदिया चि'ओन। 22 नेम्हा बॊलतस कलीसिया गुट्ठी गे एन्देर ब'अदस, अदिन नॆखअय मेना गे ख़ेबदा र'ई आस मेन्दस ती बुझुरदस नेकअन।” |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India