दहदर मंजका कत्‍था 12 - पुना गच्छरना NT (BSI)

मुक्‍का अरा कोहाँ नेर्रे

¹ इदही ख़ॊख़ा मेर्ख़ा नू ओन्टा कोहाँ चिन्‍हा ऎथ्रा। ओन्टा मुक्‍का बीड़ीन अत्तकी रहचा, अरा चन्दो अदही ख़ेड्डे किइय्या रहचा, अरा अदही कुक्‍कु नू बारा गोटा बीनको ही मुकुट रहचा।

² अरा आद ओत्‍था ऎख़ रहचा। अरा बेड़ा अंड़सकी रहचा ख़ने, आद ख़द्द नेब्ना ही नुंजना ती आद चिच्चियार'आ लगिया।

³ आ बारी मेर्ख़ा नू अउर ओन्टा चिन्हा ऎथ्रा। ऎरा, ओन्टा नगदे कोहाँ डेना र'ऊ ख़ॆंसो नेर्रे रहचा। अदगे सात गोटा कुक्‍कु अरा दस गोटा मरग रहचा। अरा अदही कुक्‍कु नू सात गोटा मुकुट रहचा।

⁴ अरा अदही ख़ॊला तीन ती ओन भाग बीनकोन मेर्ख़ा ती नतकिया ती ख़ॆख़ेल नू टिड्डा चिच्‍चा। अरा आ कोहाँ नेर्रे ख़द्द नेब्बा बेद्दा लगिया आ आली ही मुन्दहारे इज्‍जा का आद ख़द्द नेब्बो ख़नेम ख़द्दन नुलख़ो चि'ओ।

⁵ अरा आ आली कुक्‍को ख़द्दासिन निब्बिया, नॆ गोट्टा अदिया गने उर्मी बैरीरिन जीतना ती उर्मी आल खोंड़हन राजी ननोस। अरा अदही ख़द्दस धर्मेस गुसन अरा आसी बॆल-गदिया गुसन चॊदतारस केरस।

⁶ अरा आ आली गा टोड़ंग नू बोंगा केरा, एसन ओन हजार दुई सौ साट उल्ला अदिन पोस'आ गे धर्मेस तरती अड्डा सपड़ारकी रहचा।

⁷ फेन मेर्ख़ा नू लड़ाई मंजा। मिख़ाऎल अरा आसी पैकर डेना र'ऊ नेर्रे गने लड़'आ उरखर। अरा डेना र'ऊ नेर्रे अरा अदही पैकर आर ही गने लड़चर।

⁸ लिकिन डेना र'ऊ नेर्रे अरा अदही पैकर जित'आ पोल्‍लर, औंगे आर मेर्ख़ा नू तम्है अड्डन एब्सर चिच्चर।

⁹ अरा आ नगदे कोहाँ डेना र'ऊ नेर्रे किइय्या हेबड़तारा। ईदिम गोट्‌टा ख़ॆख़लन ठक'ऊ नाद अरा सैतान बारना पच्चा नेर्रे हवे। आद ख़ॆख़ेल नू हेबड़तारा अरा अदही उर्मी पैकर हूँ अदही गनेम ख़ॆख़ेल नू हेबड़तारर।

¹⁰ इदही ख़ॊख़ा ऎन मेर्ख़ा नू ओन्टा जॊरसरिया सड़ा एन्ने ब'अना मेंजकन, “अक्‍कु नाड़ना अरा सवंग अरा नम्‍है धर्मेसी राजी अरा आसी मसीसी राजी नन्ना ही अदिया बरचकी र'ई, एन्‍देरगेका नम्‍है भई बहिनर मइय्याँ बदी ननुस नॆ उल्‍ला माख़ा नम्है धर्मेसी मुन्दहारे आर ही मइय्याँ बदी नना लगियस, आस किइय्या हेबड़तारस केरस।

¹¹ लिकिन आर भेंडो ख़द्द मसीसी ख़ॆंस ती अरा तम्‍है गोवाह ही कत्था ती सैतान मइय्याँ जितचर। अरा आर तम्‍है जिया गुट्ठिन चोन्‍हा मल नंजर, ई गूटी का आर खे'आ गे हूँ मल इल्‍चियर।

¹² औंगे अनय मेर्ख़ा गुट्ठी, अरा अबड़ा नू र'उरो, रिरयार'आ। लिकिन अनय ख़ॆख़ेल अरा समुदर निम्‍है मइय्याँ ओहरे, एन्देरगेका नाद निम्‍है मइय्याँ इत्तकी बरचकी र'ई। आद कोड़हे खींस ती निंदकी र'ई, एन्देरगेका आद अख़'ई का तंग्है बेड़ा अक्‍कुन जुक्‍किम र'ई।”

¹³ डेना र'ऊ नेर्रे अक्खा का आद ख़ॆख़ेल नू हेबड़तारा केरा ख़ने, नॆ कुक्‍को ख़द्दासिन निब्‍बकी रहचा आ आलिन आद खिलपत नना हेलरा।

¹⁴ लिकिन आ आली गे कोहाँ छछड़ा ही दुई गोटा डेना चीरा। होले आद धर्मेस तंगा गे टोड़ंग नू सपड़ाचका अड्डा गे उढियार'ओ ती अंड़सा ओंगो। असन आद नेर्रे ही खिलपत ती बछर'आ गे तीन बछर अरा छै चन्दो गूटी पोसतार'ओ।

¹⁵ ख़ने आ नेर्रे आ आली ही ख़ॊख़ा तंग्है बई ती ख़ाड़ लेक्‍खा अम्मु तइय्या का आ आली बहड़ी नू बोहार'ओ क'ओ।

¹⁶ लिकिन ख़ॆख़ेल आ आली गे संगरा नंजा का ख़ॆख़ेल तंग्‍है बइय्यन चलख़ा ती डेना र'ऊ नेर्रे तंग्है बई ती तइय्की रहचा आ ख़ाड़न सुर्पिया चिच्‍चा।

¹⁷ ख़ने डेना र'ऊ नेर्रे आ आलिन कयरारा, अरा अदही बछ्रका ख़द्दर गने लड़'आ उरखा, एकार धर्मेसी पॆसकन पॆस्रका ती येसुसी सिखाब'अना नू ठिमठिमने र'अनर।

¹⁸ इदही ख़ॊख़ा आ डेना र'ऊ नेर्रे समुदर ही पिंडी नू इज्‍जा केरा।