दहदर मंजका कत्‍था 11 - पुना गच्छरना NT (BSI)

दुई गोवाह

¹ फेन एंगा जिन्‍तो लेक्‍खा ओन्टा डाँग चीरा अरा एन्ने बातारा, “चो'आ, धर्मेसी मन्दिर अरा गोड़हा आबोन ख़ोया, अरा अइय्या महबा ननुरिन गन'आ।

² लिकिन मन्दिर बहरी ता चालिन अमा ख़ोया अम्‍बा चि'आ, एन्‍देरगेका आद नन-यहूदीर गे चीतारकी र'ई, अरा आर नेम्‍हा नगरेन बयालीस महिना गूटी राजी ननोर।

³ अरा ऎन एंग्‍है दुई गोवाह आलर गे अदिया चि'ओन का आर बोरा झपर'ओर ती ओन हजार दुई सौ साठ उल्ला धर्मेसी कत्थन मुन्द तेंगोर।”

⁴ इबड़र दिम ख़ॆख़ेल ही उर्बासी मुन्दहारे इज'ऊ दुई गोट जैतून मन्न अरा दुई गोट बिल्‍ली पटनी हवे।

⁵ अरा नेकईम आरिन सस्ती नना बेद्दनर होले, आर ही बई ती चिच्‍ची उरखरकी आर ही बैरीरिन बस्‍सी चि'ई। अरा नेकईम आरिन सस्ती नना बेद्दनर होले, आर एन्नेम खे'अना र'ई।

⁶ ईर ताम धर्मेसी कत्थन मुन्द तेंगना बेड़ा नू चॆप मल पुंइय्याँ गे मेर्ख़ा बलिन मुच्‍चा गे ईर गे अदिया र'ई। अरा ईर गे अम्मन ख़ॆंस कम'आ गे अदिया र'ई। अरा एकाबारी ईर ही मने बर'ओ आ बारी उर्मी लेक्खा रोगेन तइय्ना ती ख़ॆख़ेल नू दुक्खे चि'आ गे ईर गे अदिया र'ई।

⁷ आर तम्है गोवाह आबोन तेंगा मुंजोर ख़ने, भयभयान ख़ोड़ख़ा गड्डी ती मइय्याँ अरगना मेक्‍खो आर ही गने जुझर'ओ ती आरिन जित'ओ ती आरिन पिटो चि'ओ।

⁸ अरा आर ही मॆद कोहाँ नगरे येरुसलॆम ही दोप्‍फा नू हेबड़्रकी र'ओ। जुक्की ती बग्गे ब'अना ती ई नगरे सोदोम अरा मिसर बार'ई। ई नगरे नू दिम ईर ही उर्बासिन क्रुस नू ठोकचकाचर।

⁹ अरा तीन उल्ला ओन बीड़ी उर्मी आल खोंड़हा अरा गोतोर अरा भखा अरा राजी ता आलर ईर ही केचका मॆदन ऎर'ओर, अरा ईरिन माड़ा मल चि'ओर।

¹⁰ अरा ख़ॆख़ेल ता र'ऊ आलर आर ही खे'अना चड्डे रिझ्र'ओर खुसमार'ओर, अरा ओर्तोर नन्नर गे सन्देस गुट्ठिन तइय्योर, एन्‍देरगेका इबड़ा दुयो धर्मेसी कत्था तिंगुर ख़ॆख़ेल ता र'ऊ आलारिन सताबाचका रहचर।

¹¹ लिकिन तीन उल्‍ला ओन बीड़ी ख़ॊख़ा धर्मेस तरती उज्‍जना ही साँस आर ही नू किर्रिया। अरा आर तम्‍है ख़ेड्डे ती इज्‍जर। अरा आरिन ईरु आलर ओर्मर मइय्याँ इल्चका कोरचा केरा।

¹² फेन आर मेर्ख़ा ती ओन्टा जॊरसरिया सड़ा आर ही गने एन्ने ब'अना मेंजर, “इसन मइय्याँ बरा।” इदिन मेंजर ती आर तम्‍है बैरिर ही ईरनुम ईरनुम बदाली नू मेर्ख़ा अर्गियर केरर।

¹³ अरा आ बारिम ओन्टा कोहाँ ख़ॆख़ेल नुकुरना मंजा, अरा नगरे ही दस ती ओन भाग बिड़्रिया केरा। अरा आ ख़ॆख़ेल नुकुरना ती सात हजार आलर केच्‍चर केरर। अरा बछ्रका आलर इल्‍चियर केरर, अरा मेर्खा ता धर्मेसी महबा नंजर।

¹⁴ दोसर खिलपत कट्टिया केरा। ऎरा, तिसर खिलपत चाँड़हेम बर'ऊ र'ई।

सातवाँ पेंड़हे ही ऊरना

¹⁵ फेन सातवाँ मेर्ख़ा पैकस पेंड़हे ऊरचस ख़ने, मेर्ख़ा नू जॊरसरिया सड़ा गुट्ठी एन्ने बाचा, “ख़ॆख़ेल ता राजी नम्‍है उर्बासी अरा आसी मसीसी राजी मंजा केरा, अरा आस हुल्लो ती हुल्लो गूटी राजी ननोस।”

¹⁶ फेन धर्मेसी मुन्दहारे तम्‍है बॆल-गदिया नू उक्‍का चौबीस गोटा सेयान आलर मुंही पाब खत्रर ती धर्मेसी ऒड़ लग्‍गियर,

¹⁷ अरा बाचर, “नॆ र'अदस अरा रहचस आ उर्मी ती सवंगिय धर्मे उर्बायो, ऎम निंगन धन्‍यवाद नन्दम, एन्देरगेका नीन निंग्‍है कोहाँ सवंगन होच्चकादय ती राजी नना हेलरकय।

¹⁸ निंगन ऒड़ मल ननू राजीतर कदरारर, ख़ने निंग्‍है खींस बरचकी र'ई। अरा केचकारिन नेंवई नन्ना बेड़ा अंड़सकी र'ई। अरा निंग्‍है जॊंख़र धर्मेसी कत्था तिंगुर गे, अरा नेम्‍हा आलर गे, अरा निंग्है नामेन मईन ननू सन्नी कोहाँ ओर्मर गे इनाम चि'अना बेड़ा अंड़सकी र'ई। अरा नॆ ख़ॆख़ेलन बगड़'अनर आरिन नठाब'अना ही बेड़ा हूँ अंड़सकी र'ई।”

¹⁹ फेन मेर्ख़ा नू र'अना धर्मेसी मन्दिर तिसगरा केरा। अरा आसी मन्दिर नू आसी गच्छरना ही बक्सा ऎथ्रा। अरा आ बेड़ा नू लवका लौकारना गुट्ठी, अरा ख़रख़ना गुट्ठी, मुर्रना चाड़ना गुट्ठी अरा ख़ॆख़ेल नुक्रना मंजा, अरा कोहाँ आली खत्रा।