फिलिप्पी 1 - पुना गच्छरना NT (BSI)मोंजरा 1 मसी येसुसी जॊंख़म पौलुस अरा तीमोथियुस फिलिप्पी नगरे नू मसी येसुसी र'अना उर्मी नेम्हा आलर गे अरा आर ही गने कलीसिया ही ईरु-ख़ूजू मुद्धर गे अरा कलीसिया ही ईरू-ख़ूजुर गे ई चिठिन लिखदम। 2 नम्है धर्मे बबस अरा उर्बस येसु मसीस ती निमा गे मया अरा सान्ति ख़क्ख्र'अन नेकअन। पौलुसी गोहराना अरा धन्यवाद 3 ऎन एका एका बारी निमन सुरता नन्दन, आ बारी ऎन एंग्है धर्मेसिन धन्यवाद नन्दन। 4 ऎन ननू उर्मी गोहरारना नू सगरो नीम ओर्मर गे रिझ ती गोहरारदन। 5 एन्देरगेका ऎन निम्है गुसन बरचका उल्ला ती अक्कु गूटी दौ कत्था नलख नू नीम एंग्है गने संगे चिच्कर। 6 अरा एंगा असरा र'ई का ई लेक्खा दौ नलखन धर्मेस निम्है नू ऒड़ नंजस, आस मसी येसुसी बरना उल्ला गूटी अदिन मुंजत'ओस चि'ओस। 7 नीम ओर्मर ही पत्त नू एंगा एन्ने सोचना ठौका दिम हवे। एन्देरगेका निमा गे एंग्है जिया नू ओन्टा मुध अड्डा र'ई। अरा ऎन जेहेल नू र'अना बारी, अरा दौ कत्था ही ओदहा नू तेंगरकी अदिन बड़ियर ननो बारी नुम नीम ओर्मर धर्मेस एंगा चिच्का नलख नू मेस्रकर। 8 मसी येसुसी लेक्खा ऎन चोन्हा नन्दन ती नीम ओर्मारिन ऎरा गे कोड़हे चिबाख़ारदन, अदगे धर्मेस गोवाह र'अदस। 9 एंग्हा गोहरारना ईद र'ई का निम्है चोन्हा अरा लूर अरा उर्मी रकम ही लखना अउरिम पर्दी नेकअन। 10 होले कोड़हे बॆस एन्देर एन्ने नीम अख़'आ ओंगोर। अरा मसीसी अउरिम बरना उल्ला गूटी नेम्हा अरा बिगर बदी ती उज्जा ओंगोर। 11 अरा येसु मसीस ती बरना उजगो ही ख़ंजपा ती नीदोर ती र'ओर, आद धर्मेस गे ओहमा अरा महबन ओन्द्र'ओ। दौ कत्था चड्डे जेहेल नू पौलुस 12 अना भईरो! ऎन इदन नीम अख़'आ बेद्ददन का इय्या एंग्है नू मंजा अबड़ा उर्मी दौ कत्थन बींड़'आ गेम संगरा नंजा। 13 मसीसी जॊंख़ र'अना ही चड्डेम ऎन जेहेल नू हॆंरका र'अदन एन्ने कोहाँ बॆलासी गढ़िया ता उर्मी सैनर अरा इय्या ता ओर्मर सुपट अख़नर। 14 अरा बग्गे पत्त'ऊ आलर एंग्है हॆंरका ती उर्बस संगरा ननोस ब'अरकी आस नू असरा नंजर ती मुन्द ती कोड़हे डिढ गने बिगर इल्चिक'आ धर्मेसी कत्थन मेन्त'आ लगनर। 15 जोक्कोर इस्गहा अरा नग्गानख्रना ती मसीसी दौ कत्थन तेंगा कुद्दनर, ईद मानिम दिम हिके। लिकिन जोक्क अउर आलर दौ जिया ती हूँ मसीसी दौ कत्थन तेंगा कुद्दनर। 16 इबड़र चोन्हा ती दौ कत्था तेंगनर। ईर अख़नर का ऎन दौ कत्था ही ओदहा नू तेंगना ती हॆंरका र'अदन। 17 लिकिन नन्ना आलर लोभिया मने ती अरा बिगर मानी जिया ती मसीसी दौ कत्थन तेंगनर। आर एन्ने सोचनर का आर एन्ने नन्ना ती एंग्है हॆंरका नू एंगा कोड़हे सस्ती मनो। 18 लिकिन ईद कत्था मल्ली। ओड़हर ती मलता मानी ती, एकअम अन्ने, मसीसी दौ कत्था गा तेंग्रा। इदगेम ऎन कोड़हे रिझ्र'आ लगदन। हाँ ऎन अउरिम रिझ्रना बारी र'ओन। 19 एन्देरगेका ऎन अख़दन का निम्है गोहरारना गुट्ठी ती अरा येसु मसीसी बॊलतस चि'अना संगरा ती एंगा नाड़रना मनो। 20 एंगा कोड़हे पत्तारना अरा असरा ईद र'ई का, एंगा इन्द्रिइम नू हूँ लज्जे मॊख़्रना अम्बो मनो, लिकिन ऎन उज्जोन महले खे'ओन एंगा बड़ियर डिढ ती अक्कु अरा सगरो मसीस एंग्है मॆद ती महबा ख़क्खोस। 21 एंगा गे गा, उज्जना मने मसीस गे उज्जना। अरा खे'अदन ख़ने, आद ख़ॆख़ेल नू उज्जना ती अउरिम दौ हवे। 22 लिकिन ऎन ई मॆद नू उज्जना बारी र'ओन होले, मसीस गे बॆस अर्ज'अना नलख नना ओंगोन। औंगे ऎन बुझ्र'आ पोल्दन का ऎन एन्द्रन चाजोन, उज्जना बारी र'अना महले खे'अना। 23 अक्कु गा ऎन इबड़ा दुयो पत्तारना ही मझी नू छेक्रकादन। ऎन ई उज्जनन अम्बरकी मसीस गने मेर्ख़ा नू र'आ गे बेद्ददन, एकदा एंगा कोड़हे बॆस र'ओ दने। 24 लिकिन अत्रु ती ऎन ई मॆद नू र'अना निमा गे कोड़हे फैदा र'ई। 25 ऎन इदिन बड़ियर असरा नन्ना ती निम्है गने ऎन र'ओन। अरा निमन निम्है पत्त'अना नू परदा गे रिझ्र'आ गे सहाड़ा ननोन, अदिन अख़दन। 26 औंगे ऎन निम्है गुसन अउरिम बरना ती एंग्है चड्डे नीम मसी येसुस नू उइय्का रिझ अउरिम कोड़हे मनो। 27 ऎन निम्है गुसन बर'ओन ती ऎरोन मलता मल हूँ बर'ओन, नीम ओन्टे गुना बॊलता नू ओन्टा जिया मनरकी दौ कत्था ही पत्त'अना गे अर्जाना नुम र'अदर एन्ने ऎन मेना गे, नीम इवंदम नना का, निम्है उज्जना ओक्कना येसु मसीसी दौ कत्था गे जॊगे मनन। 28 अरा ऎन अख़दन का, एकअम कत्था नू हूँ निम्है बिड़दो र'उर ती नीम मल एल्चदर। ईद आर गे नठारना ही चिन्हा हवे, लिकिन निमा गे गा नाड़रनन ख़क्खा गे चिन्हा हवे। अरा ईद धर्मेस तरती मनो। 29 एन्देरगेका मसीस नू पत्त'आ गे लेका मला, लिकिन आसी चड्डे सस्ती अरा खिलपत हूँ सह'आ गे हूँ ईद निमा गे चीरकी र'ई। 30 अरा नीम एंग नू ईरकर, अरा एंगा गे अउर हूँ र'ई एन्ने अक्कु नीम मेन्दर, आ तिहा दिम निमा गे हूँ र'ई। |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India