फिलॆमॊन 1 - पुना गच्छरना NT (BSI)परिछ'अना 1 मसी येसुसी पत्त ता दौ कत्था तेंगना ही चड्डे जेहेल नू हॆंरका पौलुस ऎन, अरा नम्है भईस तीमोथियुस ई चिठिन नम्है दुलार अरा नम्है गने सुसर नलख नू र'ऊ फिलॆमॊनस गे लिखदम। 2 अरा नम्है गने पत्त'ऊ बहिन अपफिया, अरा मसीसी सुसर नलख नू सैनस लेक्खा नम्है संगे भईस अर्ख़िप्पोस गे, अरा निंग्है एड़पा नू ख़ॊंड़र'ऊ कलीसिया गे हूँ ऎम ई चिठिन लिखदम। 3 निमा गे नम्है धर्मे बंगस अरा उर्बस येसु मसीस ती मया अरा सान्ति मनन नेकअन। फिलॆमॊनसी चोन्हा अरा पत्त'अना 4-5 अना फिलॆमॊन, नीन उर्बस येसु मसीस नू उइय्का पत्त'अनन अरा उर्मी नेम्हा आलर मइय्याँ ता निंग्हा चोन्हा पत्त नू ऎन मेन्दन। औंगे ऎन एंग्है गोहरारना गुट्ठी नू निंगन सुरता नन्दन ख़ने, उर्मी बेड़ा एंग्है धर्मेसिन धन्यवाद नन्दन। 6 अरा निंग्है पत्त'अनन नन्नर ही गने ख़ट्टना नू कोड़हे बड़ियर गने र'आ गे ऎन गोहरारदन। इत्रु तिम मसी येसुस नू नम्हा ख़क्खका उर्मी दौ ही पत्त नू नीन उर्मिन बुझुर'ओय। 7 अना एंग्है भई, नीन नेम्हा आलर ही जियन हरियर नंजका र'अदय। निंग्है चोन्हा एंगा गे हूँ कोड़हे रिझ अरा जिया सालनन चिच्की र'ई। ओनॆसिमोस गे पौलुसी ने'अना 8-9 औंगे ऎन पौलुस पच्चका केरकादन ती, अरा अक्कु मसी येसुसी पत्त ता दौ कत्थन तेंगना ही चड्डे जेहेल नू हॆंरका ती, निंगा एन्देर नन्ना र'ई अदन निंगा गे आना गे मसीस नू एंगा बग्गे डिढ र'ई। अन्नु हूँ अन्ने मल ननरकी चोन्हा ती निंगन ने'अदन। 10 मसीस नू एंग्है ख़द्दस ओनॆसिमोस गे ऎन निंग्है गुसन ने'अदन। एन्देरगेका ऎन जेहेल नू हॆंरका बारी आसिन ऎन मसीस नू कड़हाबाचकन ती आस एंग्है ख़द्दस मंजस। 11 आस मुन्द निंगा गे खइता रहचस, लिकिन अक्कु गा निंगा अरा एंगा इरबर गेम कोड़हे नलख जॊगे र'अदस। 12 एंग्है कोड़हे चोन्हा ही ओनॆसिमोसिन ऎन निंग्है गुसन किर्त'अर तइय्दन। 13 ऎन आसिन एंग्है गुसन उइय्या गे बेद्दा लिक्कन का दौ कत्था तेंगना ही चड्डे इय्या गुड़रका र'ऊ एंगा गे निंग्है ऊजी नू आस संगरा ननू र'ओस दने। 14 लिकिन ऎन निंग्है बिगर मने एन्देर हूँ नना मल बिद्दकन का नीन नन्ना इन्द्रिइम संगरा हूँ निंग्है सौंसे जिया ती रिझ ती नन्ना र'ई, एंगा बड़पेलहा ती अदन मल नन्ना र'ई। 15 ईद इदगे मंजा नहअन का आस निंग्है गुसन उर्मी उल्ला र'आ गे आस निंग्है ती जोक्क उल्ला गेच्छा मंजकाचस। 16 लिकिन अक्कु आस बिट्ठी ननू जॊंख़ लेक्खा मला, बिट्ठी ननू जॊंख़ ती हूँ कोहँस, अरा चोन्हा भईस बेसे र'अदस। आस एंगा गे कोड़हे चोन्हा ही जॊगे र'अदस। लिकिन कोड़हे गा आस ओन्टा आल नता ती हूँ, अरा उर्बस नू ओन्टा भई नता ती हूँ आस निंगा गे अउर कोड़हे चोन्हा जॊगे र'अदस। 17 औंगे नीन एंगन मसीसी चड्डे निंग्है सखी एन्ने सोचदय होले, एंगन इंझ्रना बेसे आसिन हूँ इंझ्र'आ। 18 लिकिन आस निंगा गे इन्द्रिइम मलदौ नंजकादस महले आस निंगा इन्द्रिइम नहड़ा चि'अना र'ई होले, अदिन एंग्है नामे नू लिख'आ उइय्या। 19 “आ नहड़न ऎन निंगा किर्त'ओन चि'ओन” ऎन पौलुस इदन एंग्है ख़ेक्खा ती लिखदन। ई बारी नीन निंगानिम एंगा नहड़ा बेसे चि'अना र'ई, एन्ने ऎन निंगा तेंगा गे चाड़ मलकी, एन्देरगेका नीन पत्त'ऊ मना गे ऎन संगरा नंजकन। 20 औंगे अना भई, नीन एंगा गे ई संगरा आबोन नाम उर्बा मसीस नू भईर र'अना चड्डे नना। नीन मसीस नू एंग्है जियन हरियर नना चि'आ। 21 ऎन निंग्है पॆस्रना मइय्याँ असरा नन्दन ती निंगा गे इदन लिखदन। अरा ऎन अख़दन का नीन एन्देर नना गे ऎन निंगन आनदन अदही ती बग्गे नीन ननोय। 22 अउर ओन्टा कत्था ऎन मेन्दन का एंगा र'आ गे ओन्टा पाही कुठली सपड़'अके उइय्के। एन्देरगेका ऎन असरा नन्दन का धर्मेस निम्है गोहरारना गुट्ठिन मेनोस, अरा ऎन अउरिम निम्है गुसन बर'आ ओंगोन। छेद्दे मोंजरा 23 मसी येसुसी पत्त ता दौ कत्थन तेंगना ही चड्डे एंग्है गने जेहेल नू गुड़रका र'ऊ एपाफ्रास निंगन मोंजरा नन्दस। 24 अन्नेम एंग्है गने सुसर नलख ननू मरकुस, अरा अरिस्तरख़ोस, अरा दॆमस, अरा लूकस हूँ निंगन मोंजरा नन्नर। 25 नम्है उर्बस येसु मसीसी मया नीम ओर्मर गने र'अन नेकअन। |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India