मत्तायोस 27 - पुना गच्छरना NT (BSI)

पिलातुसी मुन्‍दहारे येसुस

¹ बिज्‍जा गनेम लॆम ओर्मा मुध नैगर अरा सेयान आलर भेंट मंजर ती येसुसिन पिटत'आ गे सलहा नं‍जर।

² फिन आर येसुसिन हॆंचर अरा आसिन होच्‍चर ती ‍यूदेया ही रोमी राजीख़ापुस पिलातुसी ख़ेक्खा नू चिच्‍चर।

यूदसी खे'अना

³ येसुसिन धरत'आ गे संगे नंजका यूदस अक्‍खस का येसुस पिटा गे गुन्‍हा ठेकाबातारस ख़ने, आस पस्‍तारस ती अब़डा तीस गोटंग चाँदी ढिबन मुध नैगर अरा सेयान आलर गुसन किर्ताचस ओन्‍द्रस।

⁴ अरा बाचस, “आ बिगर गुन्हा नेम्‍हा उजगो आलासिन पिटा गे धरताचकन ती पाप नंजकादन।” अबड़र बाचर, “अदगे एमा एन्‍देर? नीनिम अदही हदा र'अदय।”

⁵ औंगे आस अबड़ा ढिबन धर्मेसी मन्दिर नू हिबिड़यस ती किर्रिम बिच्‍चियस, अरा केरस ती टंगरस केच्‍चस।

⁶ मुध नैगर अबड़ा ढिबन होच्‍चर ती बाचर, “इबड़न भंडार नू सजना नॆग ही बिड़दो र'ई, एन्‍देरका ईद ख़ॆंस ही दाम हवे।”

⁷ औंगे आर सलहा मंजर ती नन-राजियारिन माड़ा गे अबड़ा ढिबा ती कुम्‍हरासी ख़ल्‍लन ख़िन्‍दियर।

⁸ ई चड्डे आद इन्ना गूटी ख़ॆंस ही ख़ल्‍ल बार'ई।

⁹ ख़ने एका कत्‍था धर्मेसी कत्‍था तिंगू येरेमियास ती बारकी रहचा आद मंजा, “इस्राऎल आलर आसी म‍इय्‍याँ ई दामन ओकताचकाचर आर आ तीस चाँदी ढिबन होच्‍चर,

¹⁰ अरा उर्बस एकासे एंगन पॆसकाचस अन्नेम आर अबड़ा तीस गोटंग ढिबा ती कुम्‍हरासी ख़ल्‍लन ख़िन्‍दियर।”

पिलातुसी मुन्‍हारे येसुस

¹¹ अक्‍कु येसुस राजीख़ापू पिलातुसी मुन्‍दहारे इज्‍जकाचस, अरा पिलातुस आसिन मेंजस, “नीन यहूदीर ही बॆलय का?” येसुस किर्त'अर बाचस, “नीन ब'अदय अन्ने दिम हवे।”

¹² लिकिन मुध नैगर अरा सेयान आलर आसी म‍इय्‍याँ दोस ठे‍का ब'आलियर ख़ने, आस एन्‍देर हूँ किर्त'अर मल बाचस।

¹³ ख़ने पिलातुस आसिन बाचस, “एन्‍देर नीन मल मेन्‍दय, ईर निंग्‍है बिड़दो नू ऎ बग्‍गे गोवाह चि'आलनर?”

¹⁴ लिकिन आस आसिन ओन्‍टा कत्‍थन हूँ किर्त'अर मल बाचस, ईद ती पिलातुस गे कोड़हे अकबक मंजा।

¹⁵ राजीख़ापुस चाँनुम कट्टना परब ही उल्‍ला नू ओन्‍टा गुड़ुरकासिन नॆकन आलर अम्‍बत'आ बेद्दनर आसिन अम्‍बा चि'आलियस।

¹⁶ अबड़ा उल्‍ला नू बरब्‍बस नामे ही ओन्‍टा गुड़ुरकस रहचस। आस हुलहुली नू आलारिन लौचका पिटका रहचस।

¹⁷ आलर पिलातुसी एड़पा नू ख़ॊंड़रर ख़ने, पिलातुस आरिन बाचस, “नीम एन्‍देर बेद्ददर, ऎन निमा गे नॆकन अम्‍बोन चि'ओन? बरब्‍बसिन का मलता येसुसिन एकास मसी बातारदस?”

¹⁸ एन्‍देरगेका आस अक्‍खस का आर येसुसिन इस्गहा ती आस गे सों‍पचका रहचर।

¹⁹ पिलातुस नेंवई नन्‍ना गदिया नू उक्‍काचस ख़ने, तंग्‍आली आसिन बाचा तइय्या, “नीन आ उजगो आलासी पत्त नू ख़ेक्खा अमके नना, एन्‍देरगेका ऎन चेरो माख़ा तुंगुल नू आसी चड्डे नगदे दुक्‍खे सारचकन।”

²⁰ लिकिन मुध नैगर अरा सेयान आलर आलारिन मेना गे तुतकाचर का आस बरब्‍बसिन अम्‍बत'ओस, अरा येसुसिन पिटतोस।

²¹ राजीख़ापुस आरिन मेंजस, “इबड़ा इरबर ती नीम नॆकन बेद्ददर का ऎन निमा गे अम्‍बोन चि'ओन?” आर बाचर, “बरब्‍बसिन।”

²² पिलातुस आरिन अउरिम मेंजस, “होले येसुसिन, नॆ मसी बारदस, एन्‍देर ननोन?” ओर्मर बाचर, “ईसिन क्रुस नू ठोक'आ।”

²³ पिलातुस आरिन मेंजस, “एन्‍देरगे, ईस एन्‍देर दोस नंजकादस?” लिकिन आर अउरिम जॊर ती चिच्चि‍यारते र'आलियर, “ईसिन क्रुस नू ठोक'आ।”

²⁴ पिलातुस ईरियस का गोंहड़ा ही चिच्‍चियारना मल मड़'आ लगी, अरा आस एन्द्रा हूँ इदही पत्त नू नना पुल्‍लियस। अरा आस अम्मु नॆचस ती गोंहड़ा ही मुन्‍दहारे ख़ेक्खा नॊंढरस ती बाचस, “ऎन ई उजगो आलासी खे'अन‍ ही बदी ती बछ्रदन, निम्‍है म‍इय्याँ दिम ईद मनो।”

²⁵ ओर्मर आनाकिर्ताचर, “ईसी बदी एम्‍है मइय्याँ अरा एम्‍है ख़द्दर मइय्याँ मनन।”

²⁶ ख़ने पिलातुस बरब्‍बसिन आर गे अम्‍बियस। अरा येसुसिन कोर्रा ती लौ'अरकी क्रुस नू ठोक'आ गे रोमी सैनर गे सों‍पचस।

सैनर ही येसुसिन भेंसड़'अना

²⁷ ख़ने राजीख़ापुसी सैनर येसुसिन प्रिटोरिओन बारना गढ़िया ही भितरी चाली नू होच्‍चर केरर। अरा आर असन आसी मुन्‍दहारे उर्मी फ‍उदन ख़ॊंड़चर।

²⁸ अरा आर आसी किचरिन चड्डर ती आसिन ख़ॆंसो किचरी अत्ताचर।

²⁹ अरा आर अच्‍चोन बिन्‍डो लेक्खा मोड़चर ती आसी कुक्‍कु नू अत्ताचर। अरा आसी तीना ख़ेक्खा नू बॆत डंडा धरताचर ती आसी मुन्‍दहारे मूकलिदरर ती भेंसड़'आ हेलरर, “अना यहूदीर ही बॆलायो” बाचर।

³⁰ अरा आर आसी म‍इय्‍याँ तुप्‍पियर अरा आ बॆत डंडन होच्‍चर ती येसुसी कुक्‍कु नू लौ'आ हेलरर।

³¹ आसिन भेंसड़ाचर अदही ख़ॊख़ा ख़ॆंसो किचरिन इच्‍चियर ती आसी किचरिन अत्ताचर। अदही ख़ॊख़ा आर येसुसिन क्रुस नू ठोक'आ गे प्रिटोरिओन ती बहरी होच्‍चर।

येसुसिन क्रुस नू ठोकना

³² फिन सैनर येसुस गने नगरे ती बहरी काला लगियर ख़ने, आर सिमॊन नामे ओन्‍टा कुरॆनॆ नगरे ता आलासिन येसुसी क्रुस आबोन चेड़'आ गे बिट्ठी नू धरचर।

³³ आर ओर्मर गोलगोता नामे अड्डा नू बरचर। गोलगोता ही माने “खपरोही ही अड्डा” हवे।

³⁴ अरा आर येसुस गे गन्‍धरस भिड़ाबाचका अंगुर रासी अबोन ओना गे चिच्‍चर। लिकिन आस टट्टी ईरियस ती अदिन मल ओं‍डस।

³⁵ फिन आर आसिन क्रुस नू ठोकचकाचर ख़ने, आसी किचरिन चिठी टिड्डर ती तम्‍है नू ख़ट्टरर।

³⁶ अरा असन उक्‍कियर ती आसिन ख़ापा लगियर।

³⁷ अरा आसी दोस चिठी लिख'अरकी आसी कुक्‍कु म‍इय्‍याँ क्रुस नू लगाबाचर का “ईस यहूदीर ही बॆलस येसुस हवे”।

³⁸ तहाँ आर आस गने ऎंड़ डाकू आलारिन, ओर्तोसिन आसी तीना अरा ओर्तोसिन डेब्‍बा चोक्‍ख क्रुस नू ठोकचर।

³⁹ डहरे नू कालू बरऊ आलर कुक्‍कुन नुक'अरकी भेंसड़'आ लगियर।

⁴⁰ आर एन्ने ब'आलियर, “नीन, धर्मेसी मन्दिर आबोन धस'ऊ अरा तीन उल्‍ला नू कम'ऊ। नीन धर्मेसी ख़द्दय होले क्रुस म‍इय्‍याँ ती एत्ता अरा निंगन बछाब'आ।”

⁴¹ एन्नेम मुध नैगर अरा सेयान आलर अरा नॆग सिखाब'उर आसिन भेंसड़ाचर ती ब'आ लगियर,

⁴² “ईस नन्नारिन बछाबाचस अन्‍ति तंगन बछाब'आ पोलदस। ईस तंगन इस्राऎल ही बॆलस बाचस, अक्‍कु क्रुस म‍इय्‍याँ ती एत्तोस बर'ओस होले, ऎम आसिन पत्त'ओम।

⁴³ ईस तान धर्मेसी ख़द्दन बाचस ती धर्मेस मइय्याँ असरा नंजकादस। धर्मेस ईसिन पत्तारदस होले अक्‍कु आस ईसिन नाड़दस नेक‍अन।”

⁴⁴ अरा डाकू आलर नॆ आस गने क्रुस नू ठोक्राचर आर हूँ येसुसिन एन्नेम भेंसड़'आ लगियर।

येसुसी जिया बिछरना

⁴⁵ अक्‍कु लोहाड़ी बारा बजे गोट्टा चक ऊख़ा मं‍जा केरा, अरा आद तीन बजे गूटी रहचा।

⁴⁶ ओनबीड़ी तीन बजे येसुस जॊरसरिया चिच्चियारनुम बाचस, “ऎलॊइ, ऎलॊइ लेमा सबख़तानी।” इदही माने, “एंग्‍है धर्मे, एंग्‍है धर्मे नीन एंगन एन्‍देरगे अम्‍बकय?”

⁴⁷ असन हेद्दे र'ऊ जोक्को आलर इदन बुझुर'आ पोल्‍लर ती बाचर, “ई आलस एलियसिन मॆख़दस।”

⁴⁸ अबड़र ती ओर्तोस लेम बोंगस ती तूलिन तिस्‍सा अंगुर रासी नू चेदस ती डंडा नू पुज्‍जयस ती येसुस गे चीपा गे चिच्‍चस।

⁴⁹ लिकिन नन्नस बाचस, “रहा, ऎरोत एलियस ईसिन नाड़ा गे बर'ओस का मला!”

⁵⁰ ख़ने येसुस अउर हूँ जॊरसरिया चिच्चियारस ती तंग्‍है जियन बिच्‍छरस।

⁵¹ आ बारिम धर्मेसी मन्दिर ही परदा म‍इय्‍याँ ती किइय्‍या गूटी चर्रा ती ऎंड़ फड़ा मंजा केरा। अरा ख़ॆख़ेल नुकुर ख़च्‍चिया, अरा चचड़ी पलकरा केरा।

⁵² अरा मसड़ा गुट्ठी तिसग्रा केरा, अरा नगदे केचका नेम्‍हा आलर ही मॆद उज्‍जा चॊचा।

⁵³ अरा आर मसड़ा गुट्ठी ती उरखर, अरा येसुसी उज्‍जा चॊचका ख़ॊख़ा आर नेम्‍हा नगरे येरुसलॆम नू कालरकी नगदे आलर गे ऎथ्रर।

⁵⁴ रोमी सैनर ही मुद्धस अरा आसी गने र'अरकी येसुसिन ख़ापा लगियर आर ख़ॆख़ेल नुक्रनन अरा अबड़ा मंजकन ईरियर ख़ने, आर नगदे इल्‍चियर अरा अनचकरर, अरा बाचर, “ईस मानिम नू धर्मेसी ख़द्दस रहचस।”

⁵⁵ असन नगदे बग्‍गे मुक्‍कर गलिलेया ती येसुसी सुसर नना गे आसी गने चॊंख़्रका रहचर, आर गेच्‍छा ती इबड़न ऎरा लगियर।

⁵⁶ आर नू मगदला पद्दा ता मरियम अरा याकॊब अरा यॊसॆसी तंगियो मरियम अरा जेबदयुसी ख़द्दर ही तंगियो रहचर।

येसुसी माड़ना

⁵⁷ बीड़ी पुत्त लेक्‍खा बारी, अरिमतिया पद्दा ता यॊसॆफस नामे ओन्‍टा उरुब आलस असन बरचस, आस तानिम येसुसी चेला मंजका रहचस।

⁵⁸ आस पिलातुस गुसन केरस अरा येसुसी मॆदन नॆचस। ख़ने आस येसुसी मॆदन यॊसॆफस गे चिताचस।

⁵⁹ ख़ने यॊसॆफस येसुसी मॆदन एत्ताचस ती सफा कफन किचरी ती मुसगियस,

⁶⁰ अरा तंग्‍है पुना मसड़ा नू कीदस, एकदा चचड़ी नू पत्तरकी कम्रकीचा। अरा मसड़ा ही बली नू ओन्‍टा कोहाँ पखनन उर्दियस ती किर्रिम बिच्‍चियस।

⁶¹ अरा असन मरियम मगदलेनी अरा नन्ना मरियम मसड़ा ही मुन्‍दहारे उक्‍काचर।

मसड़न ख़ापना

⁶² नन्‍ना उल्‍ला ख़न्न ऎख़्रना उल्‍ला रहचा, औंगे मुध नैगर अरा फरिसीर पिलातुस गुसन केरर ती बाचर,

⁶³ “अना बॆलायो, एमा सुरता र'ई का आ भुरइउस उज्‍जालियस ख़ने, बाचकाचस, ‘ऎन तीन उल्‍ला ख़ॊख़ा उज्‍जा चो'ओन।’

⁶⁴ औंगे मसड़न ख़ापा गे पॆस'आ का तिसर उल्‍ला गूटी मसड़ा ख़ापतार'ओ। मलता एन्ने अम्‍बो मना आसी चेलर बर'ओर ती आसी मॆदन ख़ड़'ओर हो'ओर, अरा आलारिन ब'ओर का, ‘आस केचका ती उज्‍जा चॊचकादस।’ एन्ने मनो होले ई ख़ॊख़ा ता भोड़ मुन्‍द ता ती कोड़हे मलदौ मनो।”

⁶⁵ पिलातुस आरिन बाचस, “निम्‍है गुसन ख़ापू आलर गा र'अनर। कला, निम्‍है मने लेक्‍खा ख़ापत'आ।”

⁶⁶ औंगे आर ख़ापू आलारिन संगे होच्‍चर ती केरर, अरा पखना नू छपा नंजर ती मसड़न ख़ापियर।