मत्तायोस 18 - पुना गच्छरना NT (BSI)

मेर्ख़ा राजी नू नॆ कोहाँ

¹ आ बारी चेलर येसुस गुसन बरचर ती मेना हेलरर, “मेर्ख़ा राजी नू नॆ कोहाँ र'ई?”

² ख़ने येसुस ओन्‍टा सन्नी ख़द्दासिन हेद्दे मीख़ियस ती आर ही मझी नू इजताचस,

³ अरा बाचस, “ऎन निमन मानिम ब'अदन, एका गूटी नीम निम्‍है पाप ती किर्रोर ती सन्नी ख़द्दर बेसे मल मनोर, नीम मेर्ख़ा राजी नू कोर'आ पोल्‍लोर।

⁴ एका ओर्तोस तंगन ई ख़द्दस लेक्‍खा लुदऊ सोच'ओस, आस मेर्ख़ा राजी नू कोहाँ मनोस।

⁵ एका ओर्तोस ई बेसे ओन्‍टा सन्नी ख़द्दासिन एंग्‍है बदली नू इंझ्रदस आस एंगन इंझ्रदस।

⁶ अरा इबड़ा सन्नीर एका ओर्तोस एंगन पत्त'अदस, आसिन नीन पाप नना गे नन्‍दय होले, निंग्‍है ख़ेसेर नू ओन्‍टा कोहाँ पखनन हें'अरकी निंगन समुदर नू मुलख़त'अना चि'अना निंगा गे दौ र'ई।

⁷ मूड़ना चडडे ख़ॆख़ेल गे ओहरे, एन्‍देरगेका अदही आलॊ आलारिन पाप नना गे मूड़त'ई। एन्ने मूड़ना ही गा बरना चाड़ र'ई, लिकिन नॆखअय ती मूड़ना मनी आस गे ओहरे।

⁸ औंगे निंग्‍है ओन्‍टा ख़ेक्खा महले ख़ेड्डे निंगन पाप नन्‍त'ई होले, अदिन सम्ड़ह'आ। पाप नन्ना ती सम्ड़ह'आ गे आ ख़ेक्खन महले ख़ेड्डेन खंडना मनो होले हूँ अदिन खं‍डा चि'आ। पाप नन्ना चड्डे ऎंड़ ख़ेक्खा महले ऎंड़ ख़ेड्डे ही र'अनुम नरक नू हेबड़्रना ती, बिगर पाप नंजका ठुठा महले लेंगड़ा मनरकी धर्मेस गने जनमजुग ही उज्‍जना नू कोरना निंगा दौ र'ई।

⁹ अरा निंग्‍है ओन्‍टा ख़न्‍न निंगन पपा नन्‍त'ई होले, अदिन सम्ड़ह'आ। पाप नन्ना ती सम्ड़ह'आ गे आ ख़न्नन टोटरना ओथ्रना मनो होले हूँ अदिन टोटर'आ ओथ्र'आ अरा हेबड़ा। पाप नन्ना चड्डे ऎंड़ ख़न्‍न र'अनुम नरक नू हेबड़्रना ती, बिगर पाप नंजका कना मनरकी धर्मेस गने जनमजुग ही उज्‍जना नू कोरना निंगा दौ र'ई।

एबस्रका भेंडो ही जोक्‍खा ख़ीरी

¹⁰ चिहुंक र'आ का नीम इबड़ा सन्नी मधेर ती नॆकन हूँ अमके ख़ाँड़'आ। एन्‍देरगेका ऎन निमन मानिम ब'अदन का मेर्ख़ा नू आर ही पैकर एंग्‍है मेर्ख़ा ता बंगस गने सगरो र'‍अनर। [

¹¹ एन्‍देरगेका मनवा ख़द्दन ऎन एबस्रका आलारिन नाड़ा बरचकादन।]

¹² एकअम आलासी सौ गोटंग भेंडो र'ई, अरा अबड़ा ती ओन्‍टा इबस्र'ई क'ई होले, आस एन्‍देर ननोस? आस निनान्‍बे गोटन परता नू अम्‍बोस ती क'ओस अरा आ एबस्रकन मानिम नू बेद्दोस।

¹³ ऎन निमन मानिम ब'अदन का आस अदिन ख़क्‍खोस होले, आस अबड़ा मल इबस्रका निनान्‍बे भेंडो ती ई भेंडो गे बग्‍गे खुसमार'ओस।

¹⁴ एन्नेम दिम निम्‍है बबस एकास मेर्ख़ा नू र'अदस आसी मने एन्ने मलकी का इबड़ा सन्नी मधे ती ओन्‍टा हूँ नठार'ओ।

भइय्योस नॆ निम्‍है बिड़दो नू पाप नन्‍दस

¹⁵ निंग्‍है भइय्योस निंग्‍है बिड़दो गुन्‍हा ननोस होले, कला ती ओर्तलेका र'अना बेड़ा आसी गुन्‍हन आसिन तेंगा। आस निंग्‍हैन मेनोस होले नीन निंग्‍है भइय्योसिन अउरिम ख़क्‍खकय।

¹⁶ लिकिन आस निंग्‍हैन मल मेन्‍दस होले ओरोत महले दुई झन निंग्‍है गने हो'आ ती आस गुसन कला, होले उर्मी कत्‍था दुई महले तीन गोवाह ती ओट्टा ओक्‍कन नेक‍अन।

¹⁷ आस आरहिन मल मेन्‍दस होले कलीसिया नू तेंगा चि'आ। अरा आस कलीसियन हूँ मल मेन्‍दस होले, नीन आसिन मल पत्त'ऊ महले ऊज'ऊ लेक्‍खा अख़के।

¹⁸ ऎन निमन मानिम ब'अदन, नीम ख़ॆख़ेल नू एन्‍द्रन नना माल चि'ओर अदिन धर्मेस हूँ नना माल चि'ओस, अरा नीम एन्‍द्रन ख़ॆख़ेल नू नना चि'ओर अदिन धर्मेस हूँ नना चि'ओस।

¹⁹ ऎन इदन हूँ निम्‍है ती ब'अदन, निम्‍है मधे ती इरिब आलर ख़ॆख़ेल नू एकअम कत्‍था गे ओन जिया मनोर ती ने'ओर होले, आद एंग्‍है मेर्ख़ा बंगस तरती आर गे मनो क'ओ।

²⁰ एन्‍देरगेका एक्‍सन ऎनोटा महले मूनोटा आलर एंग्‍है नामे ती ख़ॊड़्रनर असन ऎन आर ही मझी नू र'अदन।”

सोग्‍गे मलका जॊंख़ासी जोक्‍खा ख़ीरी

²¹ ख़ने पतरस येसुसी हेद्दे बरचस ती मेंजस, “अना उर्बायो, एंग्‍है भइय्योस एंग्‍है बिड़दो नू गुन्‍हा नन्‍तेम र'ओस होले, ऎन एवन्‍दा खेप आसिन छमा ननोन? सात खेप गूटी का?”

²² येसुस आसिन बाचस, “ऎन निंगन ब'अदन, सात खेप मला, लिकिन सात ही सत्तर खेप गूटी।

²³ मेर्ख़ा राजी ओन्‍टा बॆलस लेक्‍खा र'ई, एकास तंग्‍है जॊंख़र ती लेखा हो'आ बिद्दियस।

²⁴ एकाबारी आस लेखा हो'आ हेलरस ख़ने, ओर्त आलस आसी गुसन ओन्द्रतारस, आस दस हजार ढिबा नहड़ा मोक्‍का रहचस।

²⁵ लिकिन आसी गुसन तंग्‍है उर्बस बॆलस गे किर्त'आ गे एन्‍देर हूँ मल रहचा। औंगे आसी उर्बस, ईसिन अरा ईसी मुक्‍कन अरा ख़द्द-ख़र्रन‍ अरा इन्द्रिइम ईसी र'ई उर्मिन बीसा ती नहड़न चुकता नना आनियस।

²⁶ ख़ने आस ख़ेडमूली खत्रस ती नॆचस, ‘अना उर्बायो, खतीर नना, ऎन उर्मिन किर्त'ओन चि'ओन।’

²⁷ ख़ने आ उर्बस सोग्‍गे ईरियस ती अम्‍बियस चिच्‍चस अरा आसी नहड़न छमा नंजस चिच्च‍स।

²⁸ लिकिन आ जॊंख़स उरखस ख़ने, तंग्‍है ओर्तो संगे जॊंख़ासिन ख़क्‍खियस, एकास आसी सौ दॆनारी नहड़ा मोक्‍का रहचस। आस आसिन धरचस ती आसी ख़ेस्रन पेदख़स, ऎ बग्‍गे एंग्‍है नहड़ा मोक्‍कादय अदिन किर्त'आ चि'आ बाचस।

²⁹ अन्‍ति आसी संगे जॊंख़स आसी ख़ेडमूली खत्रस ती गोहर'आ हेलरस, ‘खतीर नना, ऎन उर्मिन किर्त'ओन चि'ओन।’

³⁰ लिकिन आस आसिन मेना गे मने मल नंजस, लिकिन होच्‍चस ती जेहेल नू गूड़चस चिच्‍चस का एका गूटी नहड़न मल किर्त'ओस आ गूटी अइय्यम र'ओस।

³¹ आसी नन्ना संगे जॊंख़र इबड़ा मंजकी रहचा अदिन ईरयर ख़ने, नगदे हेन्‍दवारर अरा केरर ती उर्मी कत्‍थन तम्‍है उर्बासिन तिंगियर।

³² ख़ने आसी उर्बस आसिन मॆख़ताचस ती बाचस, ‘अना मलदौ जॊंख़ायो, नीन गा एंगन गोहरारकय, ख़ने ऎन निंग्‍है नहड़न उर्मिन अम्‍बकन चिच्‍कन।

³³ औंगे ऎन एकासे निंगन सोग्‍गे ईरकन अन्नेम निंगा हूँ निंग्‍है संगे जॊंख़स मइय्याँ सोग्‍गे ऎरना रहचा।’

³⁴ अरा आसी उर्बस गोसा मंजस ती तंग्‍है उर्मी नहड़न चि'अना गूटी आसिन दंडे चि'उर ही ख़ेक्खा नू चिच्‍चस उइय्यस।

³⁵ नीम निम्‍है भइय्योसिन जिया ती छमा मल ननोर होले, अन्नेम निम्‍है मेर्ख़ा ता बबस हूँ निमन छमा मल ननोस।”