मत्तायोस 14 - पुना गच्छरना NT (BSI)यॊहन नुड़रत'उसी पिटतारना ( मर 6:14-29 ; लूक 9:7-9 ) 1 आ बारी गलिलेया जिला ही राजी ख़ापुस हॆरॊदॆस अंटिपस येसुसी पत्त नू हलन मेंजस। 2 अरा तंग्है जॊंख़ारिन बाचस, “आस यॊहन नूड़रत'उस, आस केचका ती उज्जा चॊचका र'अस, अदगे आस ती एन्ने सवंग ही नलख मनी।” 3-4 एन्देरगेका जोक्क उल्ला ही मुन्द हॆरॊदॆस अंटिपस बॆलस हॆरॊदिया आबोन उइय्काचस, एकाद हॆरॊदॆसी भइय्योस फिलिप्पोसी मुक्का रहचा। हॆरॊदॆस फिलिप्पोसी उज्जनुम अदिन उइय्यस। यॊहनस हॆरॊदॆसिन घड़ी घड़ी ब'आलियस, “निंगा निंग्ड़ीसी मुक्कन उइय्ना धर्मेसी नॆग ती बिड़दो र'ई।” ख़ने हॆरॊदिया ही चड्डे हॆरॊदॆस यॊहनसिन गुड़'आ गे सैनारिन तइय्का रहचस, अरा आसिन धर'अरकी जेहेल नू सजताचकाचस। 5 अरा आस आसिन पिटा बेद्दा लगियस, लिकिन आस आलर ती एल्चा लगियस, एन्देरगेका आर आसिन धर्मेसी कत्था तिंगुस सोच'आ लगियर। 6 हॆरॊदॆसी कुन्दुर उल्ला अंड़सिया ख़ने, हॆरॊदिया ही तंग्दा हॆरॊदॆस अरा आसी पाहियर ही मुन्दहारे नलिया ती हॆरॊदॆसिन रिझ्रताचा। 7 ख़ने आस किरया मोक्खस ती गच्छरस, “नीन इन्द्रिइम हूँ ने'ओय निंगा चि'ओन।” 8 आद तंग्यो ही कनिक'अना ती बाचा, “एंगा गे यॊहन नूड़रत'उसी कुक्कन इसन ओन्टा थरिया नू चि'आ।” 9 इदन मेंजस ती बॆलस अजम हेन्दो मंजस। लिकिन आस तंग्है मोक्का किरया, अरा आसी पाहियर चड्डे आस पॆसस का चितार'अन कालन। 10 अरा जेहेल नू आलारिन तइय्यस ती यॊहनसी कुक्कुन खंडताचस चिच्चस। 11 अरा आसी कुक्कुन थरिया नू ओन्द्र'अरकी कुक्के गे चितारा, अरा अदिन आद तंग्यो गुसन होच्चा। 12 तहाँ यॊहनसी चेलर बरचर ती आसी मॆदन चेड्डर होच्चर ती मंडियर अरा येसुस गे हला चिच्चर। पाँच हजार आलारिन ओन्त'अना ( मर 6:30-44 ; लूक 9:10-17 ; यॊ 6:1-14 ) 13 येसुस ईदन मेंजस ती आ अड्डन अम्बियस ती ओन्टा डोंगा नू अरगियस ती उछिन्द अड्डा नू किर्रिम बिच्चियस। लिकिन आलर इदन मेंजर ती नगरे नगरे ती ईकनुम आसी ख़ॊख़ा काला हेलरर। 14 आस अंड़सियस ती डोंगा ती इत्तियस ती कोहँम गोंहड़न ईरियस अरा आरिन सोग्गे ईरियस अरा आर ही रोगेन कोड़े नंजस। 15 बीड़ी पुत्तिया ख़ने चेलर आस गुसन बरचर ती बाचर, “ईद उछिन्द अड्डा हवे, अरा घड़ही मना लगी, आलारिन उड्र'ओत चि'ओत का पद्दा गुट्ठी तरा क'ओर ती तमा गे ओन्ना-मॊख़ना ख़ॆन्दा ओंगोर।” 16 लिकिन येसुस किर्त'अर बाचस, “आर गे काना ही चाड़ मल्ला, नीम आर गे ओना गे इन्द्रिइम चि'आ।” 17 आर आसिन बाचर, “इसन एम्है हेद्दे पाँच गोटंग असमा अरा ऎनोटा इंजो लेका र'ई।” 18 येसुस बाचस, “अदिन एंग्है गुसन ओन्द्र'आ।” 19 होले आस आलारिन लट्टी नू ओक्का आनियस, अरा आ पाँच गोटंग असमा अरा ऎनोटा इंजोन होच्चस ती मेर्ख़ा तरा ईरियस ती आ ओन्ना-मॊख़ना गे धर्मेसिन धन्यवाद नंजस अरा असमन किच्चा किच्चा चेलर गे चिच्चस अरा चेलर आलर गे चिच्चर। 20 ओर्मर ओंडर ती उड़चर। अरा चेलर बारा गोटंग डउड़ा एंगरका कुटका असमन निंदर। 21 ओंडका आलर मुक्कर अरा ख़द्दारिन अम्बरकी मलागूटी पाँच हजार मॆतर रहचर। येसुस अम्मु नू ऎकदस ( मर 6:45-56 ; यॊ 6:15-21 ) 22 तहाँ येसुस चेलारिन डोंगा नू अरग'अरकी तंग्है ती मुन्द समुदर ही आ पक्के काला गे आनियस। येसुस गोंहड़न उड्र'अना गूटी असन रहचस। 23 आलारिन उड्राचका ख़ॊख़ा भिन्गे परता नू बिन्ती नना गे केरस, अरा पुतबारी असन ओर्त गुना रहचस। 24 आ बेड़ा नू डोंगा समुदर ही मझी नू रहचा। ताका मुन्द तरती तागर'आ लगिया ख़ने लहरा नुकुर'आ लगिया। 25 येसुस ख़ॆर चींख़का बेड़ा नू समुदर नू ईकनुम आर ही गुसन बरचस। 26 चेलर आसिन समुदर नू ईकनुम बरनन ईरियर ती अकबकरर केरर, अरा बाचर, “हूद नाद हवे!” अरा इल्चका ती चिच्चियार'आ हेलरर। 27 लिकिन येसुस लॆम आर ही गने कछनखरस ती बाचस, “डिढ नना! ऎन हिकदन, अमा एल्चा।” 28 अरा पतरस आसिन आनाकिर्ताचस, “अना उर्बायो, नीन होले, एंगन अम्मु नू ईकनुम निंग्है गुसन बर'आ गे आना।” 29 ख़ने आस बाचस, “बरा।” ख़ने पतरस डोंगा ती इत्तियस ती येसुस तरा अम्मु नू ऎका हेलरस। 30 लिकिन तागरनन ईरियस ती इल्चियस अरा मूलख़ा हेलरस ख़ने, चिच्चियारस ती बाचस, “अना उर्बायो, एंगन बछाब'आ!” 31 येसुस लॆम तंग्है ख़ेक्खन मुन्द नंजस ती आसिन चॊदस ती आसिन बाचस, “अना पत्त'अना नू पयहा आलायो, एन्देरगे धुकपुकुरकय?” 32 अरा डोंगा नू अरगियर ख़ने, ताका मड़चा केरा। 33 अदही ख़ॊख़ा डोंगा नू रहचर आर आसिन ओलगर बाचर, “मानिम नीन धर्मेसी ख़द्दय हिकदय।” 34 आर अउर हूँ गलिलेया समुदर नू कालरकी गेन्नॆसरेत नगरे अंड़सियर। 35 अरा असन आलर येसुसिन चिन्हचर, अरा गेच्छा हेद्दे ती उर्मी अड्डा नू हला तइय्यर, अरा उर्मी रोगियारिन आसी गुसन ओन्द्रर। 36 अरा आर आस गुसन तंगन महले तंग्है किचरी ही अंचरन हूँ रोगियारिन ऎसड़'आ चि'आ गे गोहरारर। अरा ऎ बग्गे आलर आसिन ऎसड़र आर ओर्मर कोड़े मंजर केरर। |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India