मत्तायोस 13 - पुना गच्छरना NT (BSI)

चाँख़'उसी जोक्‍खा ख़ीरी

¹ अउलम येसुस एड़पा ती उरखस ती समुदर ही पिंडी नू केरस ती उक्कियस,

² अरा आसी गुसन कोहाँ गोंहड़ा ई कोड़हे खोपरा केरा का आस ओन्‍टा डोंगा नू अर्गियस ती उक्‍कियस केरस। अरा गोट्टा गोंहड़ा पिंडी नू रहचा।

³ अरा आस आरिन जोक्‍खा ख़ीरी गुट्ठी ती कैनों गोट कत्‍थन तिंगियस। अरा एन्ने बाचस, “ओन्‍टा बिहनी चाँख़'उस चाँख़'आ उरखस।

⁴ चाँख़'ओ बारी, जोक्को बिहनी डहरे नू खत्रा, अबड़न ऒड़ा बरचा ती मोक्‍खा चिच्‍चा।

⁵ जोक्को बिहनी पखनोरी ख़ॆख़ेल नू खत्रा, असन बग्‍गे ख़ज्‍जो मल रहचा, होले बिहनी लॆम कुन्‍दिया।

⁶ लिकिन बीड़ी सेकचा, ख़ने चड़मियाँ केरा, अरा पादा मल धरना चड्डे ख़इय्या केरा।

⁷ जोक्को बिहनी अच्‍च-ख़ोप्‍पा मझी नू ख़त्रा, बिहनी परदिया अरा अच्‍च-ख़ोप्‍पा हूँ परदिया, ख़ने अदन अरबिया चिच्‍चा।

⁸ लिकिन जोक्को बिहनी उपजा ख़ॆख़ेल नू ख़त्रा, अरा आद कुन्‍दिया परदिया अरा जोक्को सौ गुना ख़ंजा, जोक्को साट गुना ख़ंजा, जोक्को तीस गुना ख़ंजा।

⁹ नॆख'आ मेना गे मने र'ई, आस मेन्‍दस ती बुझ्रदस नेक‍अन।”

जोक्‍खा ख़ीरी तेंगना ही चड्डे

¹⁰ फेन आसी चेलर हेद्दे बरचर ती आसिन बाचर, “नीन आलारिन एन्‍देरगे जोक्‍खा ख़ीरी गुट्ठी ती कछनख्रदय?”

¹¹ आस आनाकिर्ताचस, “निमा मेर्ख़ा राजी ही नूख्रका कत्‍था आबोन बुझ्र'आ गे चीरकी र'ई, लिकिन नन्‍नर गे ईद मल्‍ला चीरका।

¹² एन्‍देरगेका नॆ एंग्‍है सिखाब'अना ही पत्त नू चिहुंक लग्‍गे सोचनर आर गे बग्‍गे बुझुर'आ गे धर्मेस संगरा ननोस, अरा आर बग्‍गे लूर ख़क्‍खोर, लिकिन नॆ एंग्‍है सिखाब'अना ही पत्त नू चिहुंक लग्‍गे मल सोचनर, आर ही बुझुरका जोक्‍क कत्‍था गुट्ठिन हूँ धर्मेस मॊधरत'ओस चि'ओस।

¹³ ऎन आरिन जोक्‍खा ख़ीरी ती इदगे कछनख्रदन का, नेम्हा पुथी नू एन्ने लिक्‍खरकी र'ई, ‘ऎन नन्‍दन अदिन ऎरदर लिकिन अत्रु ती एन्‍द्रा हूँ मल सिख्र'ओर, ऎन ब'अदन अदिन मेन्‍दर लिकिन मानिम नू मल मेन्‍दर अरा अदही माने मल बुझुर'ओर।’

¹⁴ धर्मेसी कत्‍था तिंगू यसायासी कत्‍था आर ही नू पूरा मनी, एकासे का, ‘ऎन एन्‍देर ब'अदन अदिन नीम ख़ेबदा ती गा मेनोर लिकिन मल बुझ्र'ओर, अरा ऎन एन्‍देर नन्दन अदिन नीम ख़न्न ती गा ऎरोर लिकिन नीम मल अख़'ओर।

¹⁵ एन्‍देरगेका ईर ही जिया दड़िया मंजकी र'ई, अरा आर ख़ेबदा ती कोड़हे मल मेन्नर, अरा आर तम्‍है ख़न्नन मिंक्‍खका चिच्कानर। अन्‍ति कहियों एन्ने अम्‍बन मना का ख़न्न ती ऎरोर, अरा ख़ेबदा ती मेनोर, अरा जिया ती बुझ्र'ओर, अरा आर एंग्‍है गुसन किर्रोर, अरा ऎन आरिन कोड़े ननोन।’

¹⁶ लिकिन नीम आसीस ख़क्‍खू र'अदर, एन्‍देरगेका नीम एंग्‍है अकबक नलखन ऎरदर। अरा नीम आसीस ख़क्‍खू र'अदर, एन्‍देरगेका निमन अबड़ा ही मनेन बुझ्र'आ गे धर्मेस संगरा नन्‍दस।

¹⁷ मानिम नू ऎन निमन ब'अदन का नगदे धर्मेसी कत्‍था तिंगुर अरा उजगो आलर हूँ एका कत्‍थन नीम ऎरदर अदिन ऎरा बिद्दियर लिकिन मल ईरियर, अरा एका कत्‍थन नीम मेन्‍दर अदिन मेना बिद्दियर लिकिन मल मेंजर।

चाँख़'उसी जोक्‍ख़ा ख़ीरी ही मने तेंगना

¹⁸ अक्‍कु नीम बिहनी चाँख़'ऊ आलासी जोक्‍खा ख़ीरी ही माने मेना।

¹⁹ एका ओर्तस मेर्ख़ा राजी ता कत्‍थन मेन्‍दस ती अदिन मल बुझ्रदस, आसी जिया एन्द्रा चाँख़्रकी रहचा अदिन नाद बर'ई ती बच्‍ची हु'ई क'ई, ईद आद दिम हवे एकदा डहरे पिंडी नू चाँख़्रकी रहचा।

²⁰ अरा एकदा पखनोरी ख़ॆख़ेल नू चाँख़्रकी रहचा, आद ईद हवे, एकास कत्‍थन मेन्दस ती लॆम रिझ्रनुम पत्त'अदस।

²¹ अन्नु हूँ तंग्‍‍है जिया नू गड्डी गूटी कत्‍था मल खुपना चड्डे आस जुक्‍किम उल्‍ला गे कत्‍थन पत्त'अदस। अरा सस्‍ती महले कत्‍थन पत्त'अना ही चड्डे आस म‍इय्‍याँ सतारना बरना बेड़ा आस कत्‍था ती पत्त'अनन लॆम अम्‍बदस।

²² अरा एकदा अच्‍च-ख़ोप्‍पा नू चाँख़्रा, आद ईद हवे, एकासे कत्‍थन मेन्‍दस लिकिन ख़ॆख़ेल ता फिकर अरा खुर्जी अरा मया-मॊह आसिन अरबिया ख़ने आस ख़ंज'आ पोलदस।

²³ अरा एकदा उबजा ख़ॆख़ेल नू चाँख़्रा, आद ईद हवे, एकास कत्‍थन मेन्‍दस ती बुझ्रदस, अरा ख़ंजपा ओन्‍द्रदस, नॆ सौ गुना महले साठ गुना महले तीस गुना ख़ंजपा चि'अदस।”

गेहूँ अरा बनेला लट्टी ही जोक्‍खा ख़ीरी

²⁴ येसुस आर गे अउर ओन्‍टा जोक्‍खा ख़ीरी तिंगियस। “मेर्ख़ा राजी आ आलस लेक्‍खा र'ई, एकासे तंग्‍‍है ख़ल्ल नू बॆस बिहनी चाँख़स।

²⁵ अन्‍ति एकाबारी आलर ख़न्‍द्र'आ लगियर ख़ने आसी बैरी बरचस ती गहूँ ही मझी नू बनेला बिहनिन चाँख़स ती किर्रिम बिच्‍चियस।

²⁶ अक्‍कु गहूँ कुन्‍दि‍या अरा बाल धरचा ख़ने, बनेला बिहनी ही ख़ोप्‍पा हूँ ऎथ्रा।

²⁷ अक्‍कु एड़पा उर्बासी जॊंख़र बरचर ती आसिन बाचर, ‘अना उर्बायो, नीन ख़ल्‍ल नू दौ बिहनिन मल चाँख़का रहचकय का फिन बनेला बिहनी ही ख़ोप्‍पा अइय्या एकस्‍ते बरचा केरा?’

²⁸ आस बाचस, ‘एकअम बैरीसी नलख हवे।’ जॊंख़र आसिन बाचर, ‘एन्‍देर निंग्‍है मने र'ई का ऎम अदिन कालरकी पेसक'ओन।’

²⁹ लिकिन आस बाचस, ‘मला, एन्ने अम्‍बन मना का बनेला बिहनी ही ख़ोप्‍पन पिसगनुम पिसगनुम नीम गहूँन हूँ चड़'आ ओंग्‍दर।

³⁰ ख़ोयना गूटी ऎंड़ानिम संगेम परदा चि'आ, अरा ख़ोयना बेड़ा नू ऎन ख़ोयू आलारिन ब'ओन का मुन्‍द बनेला बिहनी ही ख़ोप्‍पन लॊड़'आ ती बस्‍सा गे अदही बिंड़ा हें'आ, अरा गहूँन एंग्‍‍है खली नू ख़ोप्‍पा।’”

राई बिहनी अरा बिदगी ही जोक्‍खा ख़ीरी

³¹ फिन येसुस आर गे अउर ओन्‍टा जोक्‍खा ख़ीरी तिंगियस। “मेर्ख़ा राजी ओन्‍टा राई बिहनी लेक्‍खा र'ई। अदिन ओर्त आलस होच्‍चस ती तंग्‍है ख़ल्‍ल नू चाँख़स।

³² आद उर्मी बिहनी ती सन्नी र'ई। अन्‍ति इकला परदी ख़ने उर्मी बटकी लट्टी गुट्ठी ती कोहाँ मनी अरा आद मन्न लेक्‍खा मनी, अरा मेर्ख़ा ता ऒड़ा गुट्ठी बर'ई ती अदही डाड़ा नू खोता गुट्ठी अट्टी।”

³³ येसुस अउर ओन्‍टा जोक्‍खा ख़ीरी तिंगियस। “मेर्ख़ा राजी बिदगी लेक्‍खा र'ई। अदिन ओर्त आली कटी गुना होच्‍चा ती तीन तामी गुंडा नू लिंडया, ई लेक्‍खा आद उर्मी तिस्‍सा मंजा केरा।”

³⁴ इबड़ा उर्मी कत्‍थन येसुस गोंहड़ा गे जोक्‍खा ख़ीरी गुट्ठी ती तिंगियस अरा बिगर जोक्‍खा ख़ीरी ही आस एन्‍देर हूँ मल ब'आ लगियस।

³⁵ औंगे ईद ती धर्मेसी कत्‍था तिंगुसी बाचका कत्‍था पूरा मंजा। एकासे का, “ऎन जोक्‍खा ख़ीरी गुट्ठी ती आलारिन ब'ओन, अरा ऎन ख़ॆख़ेल ही गढ़ना ती नूख़्रका कत्‍था गुट्ठिन दहदर ननोन।”

लट्टी जोक्‍खा ख़ीरी ही मनेन तेंगना

³⁶ फिन येसुस गोंहड़न अम्बियस ती एड़पा बरचस। अरा आसी चेलर हेद्दे बरचर ती बाचर, “ख़ल्‍ल ता लट्टी ही जोक्‍खा ख़ीरी ही मनेन एमन तेंगा।”

³⁷ येसुस आरिन आनाकिर्ताचस, “एका ओर्तस ख़ल्‍ल नू दौ बिहनिन चाँख़स आस मनवा ख़द्दन ऎन हिकदन।

³⁸ ख़ल्‍ल ख़ॆख़ेल हवे, दौ बिहनी धर्मेसी राजी ही आलर हिकनर, अरा लट्टी सैतान ही आलर हिकनर।

³⁹ अरा बैरी नॆ लट्टी बिहनिन चाँख़स आस सैतान हवे, अरा ख़ोयना ख़ॆख़ेल ही मुंज्रना हवे, अरा ख़ूयुर मेर्ख़ा पैकर हिकनर।

⁴⁰ अरा एकासे लट्टी आबोन ख़ॊजनर ती बस्‍सनर अन्नेम ख़ॆख़ेल ही मुंज्रना नू मनो।

⁴¹ अरा मनवा ख़द्दन ऎन एंग्‍है पैकारिन ख़ॆख़ेल नू तइय्योन, अरा आर एंग्‍है राजी ती उर्मी पाप नन्त'उरिन अरा उर्मी मलदौ ननुरिन ख़ॊजोर,

⁴² अरा आरिन चिच्‍ची गड्डी नू झपाब'ओर, असन आर गे चींख़ना अरा ओलख़ना अरा पल्‍ल चब्रना मनो।

⁴³ आ बारी उजगो आलर तम्‍है बबासी राजी नू बीड़ी लेक्‍खा बिल्‍चोर। नॆख'आ ख़ेबदा र'ई आस मेन्दस ती बुझ्रदस नेक‍अन।”

नूख़्रका खुर्जी अरा मोहोर ही जोक्‍खा ख़ीरी

⁴⁴ अउरिम येसुस बाचस, “मेर्ख़ा राजी ख़ल्‍ल नू मंड्रका खुर्जी लेक्‍खा र'ई, अदिन एकअम आलस बिद्दियस ती आ ख़ल्‍ल नुम मंडियस चिच्‍चस, अरा रिझ ती केरस ती तंग्‍है उर्मिन बीसियस ती आ ख़ल्‍लन ख़िन्‍दियस।

⁴⁵ अउर हूँ, मेर्ख़ा राजी बॆस मोहोर गुट्ठिन बिद्दू ओन्‍टा ख़ीन्‍दू-बीसू आलस लेक्‍खा र'ई।

⁴⁶ आस नगदे दामे ही ओन्‍टा मोहोर आबोन ख़क्‍खियस ख़ने, आस केरस ती तंग्‍है उर्मिन बीसियस ती अदिन ख़िन्‍दियस।

जल्‍ली ही जोक्‍खा ख़ीरी

⁴⁷ अउर हूँ, मेर्ख़ा राजी ओन्‍टा जल्‍ली लेक्‍खा रई, आद समुदर नू हिबिड़का ती उर्मी रकम ही इंजोन बारिया ती ओथ्रा।

⁴⁸ अरा जल्‍ली निंदिया केरा ख़ने, केंवटर पिंडी नू नतगियर ओथ्रर, अरा उक्‍कियर ती बॆस बॆसन गा संजगी नू सज्‍जर, अन्‍ति मलदौ आबोन हिबिड़यर चिच्‍चर।

⁴⁹ ख़ॆख़ेल मुंज्रना नू एन्नेम मनो। मेर्ख़ा पैकर बर'ओर ती उजगो आलर ती मलदौ आलारिन छिंडोर,

⁵⁰ अरा आरिन चिच्‍ची गड्डी नू च'ओर, असन आर गे चींख़ना ओलख़ना अरा पल्‍ल चब्रना मनो।”

⁵¹ येसुस तंग्‍है चेलारिन बाचस, “एन्‍देर नीम इबड़ा उर्मी कत्‍थन बुझ्रकर का?” आर आनाकिर्ताचर, “हाँ, ऎम बुझ्रकम।”

⁵² तहाँ येसुस आरिन बाचस, “औंगे अबड़ा उर्मी नॆग सिखाब'उर नॆ मेर्ख़ा राजी ही पत्त नू सिख्रका र'अनर आर आ एड़पा आबस बेसे र'अनर, नॆ तंग्‍है भंडार ती पच्चा अरा पुना जिनिस गुट्ठिन ओथ्रदस।”

येसुसिन नासरेत ता आलर म‍ईन मल नन्नर

⁵³ येसुस इबड़ा जोक्‍खा ख़ीरी गुट्ठिन बाचस मुंजियस ख़ने, असले किर्रिम बिच्‍चियस।

⁵⁴ अरा तंग्‍‍है परदका नगरे नू बरचस ती आर ही गोड़हा एड़पा नू एन्ने सिखाब'आ हेलरस का आर अनचकरर ती ब'आ हेलरर, “ईस गे इबड़ा लूर अरा अकबक नलख नना गे सवंग एसलेक ख़क्‍खरा?

⁵⁵ ईस गा बढ़ाईसी ख़द्दस मलदस का? अरा ईसी तंगियो मरियम अरा ईसी भ‍ईर याकॊब, यॊसॆफ, सिमॊन अरा यूदस मलनर का?

⁵⁶ अरा एन्‍देर ईसी उर्मी बहिनर इसन नम्‍है गने मल र'अनर? होले ईस गे इबड़ा उर्मी एसलेक ख़क्‍खरा?”

⁵⁷ एन्ने बाचर ती आर आसिन एन्ने म‍ईन मल नंजर। लिकिन येसुस आरिन बाचस, “धर्मेसी कत्‍था तिंगुस गे तंग्‍है नगरे नू अरा तंग्‍है एड़पा नू लेका म‍ईन माल मनी।”

⁵⁸ अरा आस असन आर ही मल पत्त'अना चड्डे बग्‍गे अकबक नलख मल नंजस।