लू‍कस 6 - पुना गच्छरना NT (BSI)

येसुस गे ख़न्न ऎख़ना उल्‍ला ही म‍इय्याँ अदिया र'ई

¹ ओन ख़न्न ऎख़ना उल्‍ला नू येसुस ख़ल्ल गुट्ठी नू मन्नुम कालियस, अरा तंग्‍है चेलर बालन तोंखा तोंखा ख़ेक्खा ती रमद'आ रमद'आ मोक्‍खर।

² ख़ने जोक्को फरिसीर बाचर, “नीम एन्ने नलख एन्‍देरगे नन्‍दर एकदा ख़न्न ऎख़ना उल्‍ला ही नॆग ही बिड़दो र'ई?”

³ अरा येसुस आरिन किर्त'अर बाचस, “नीम नेम्हा पुथी नू एन्‍देर पढ़चकर सुरता मल नन्‍दर का? इकला दाऊद बॆलस अरा तंग्‍है संगेर कीड़ा रहचर, ख़ने आस एन्‍देर नंजस?

⁴ आस धर्मेसी एड़पा नू कालरकी नैगस धर्मेस गे दाँड़े नंजका असमन होच्‍चस ती मोक्‍खस, अरा तंग्‍है संगेर गे हूँ चिच्‍चस, एकदन मॊख़ना मूसासी पॆसका नू नैगारिन अम्‍बरकी नॆका हूँ नॆग मल्‍ला।”

⁵ अरा येसुस आरिन बाचस, “मनवा ख़द्दन एंगा हूँ एंग्‍है गने चॊंख़्र‍'उर गे ख़न्न ऎख़ना उल्‍ला नू एन्‍देर एन्‍देर नन्ना र'ई, अदही फैसला नना गे अदिया र'ई।”

येसुस ख़ैका ख़ेक्खा आलासिन कोड़े नन्‍दस

⁶ अउर ओन्‍टा ख़न्न ऎख़ना उल्‍ला नू येसुस गोड़हा एड़पा नू केरस ती सिखाब'आ हेलरस, अरा असन ओन्‍टा आलस रहचस आसी तीना ख़ेक्खा ख़ैकी रहचा।

⁷ जोक्को फरिसीर अरा नॆग सिखाब'उर आसिन बदी ठेका‍ब'अना ही ताक नू मोका बेद्दना नू रहचर, का आस ख़न्न ऎख़ना उल्‍ला नू कोड़े नन्‍दस का मला।

⁸ लिकिन आस आर ही जिया ता कत्‍थन अख़'आ लगियस। औंगे आस आ ख़ैका ख़ेक्खा आलासिन बाचस, “चो'आ ओर्मर ही मुन्‍दहारे इज'आ।” अरा आस इज्‍जस केरस।

⁹ तहाँ येसुस आरिन बाचस, “ऎन निमन मेन्‍दन, ख़न्न ऎख़ना उल्‍ला नू मूसासी पॆसका लेक्‍खा एन्‍देर नन्ना बॆस हिके, दौ नन्ना का मलदौ नन्ना, नॆकअनिम कोड़े नन्ना ती आसिन बछाब'अना का कोड़े मल नन्ना ती आसिन खे'आ चि'अना?”

¹⁰ ख़ने आस चरियो तरा आर ओर्मारिन ईरीयस ती आ आलासिन बाचस, “निंग्‍है ख़ेक्खन लमाब'आ।” आस अन्नेम नंजस अरा आसी ख़ेक्खा कोड़े मंज ख़च्चिया।

¹¹ ख़ने आर नगदे जंगारर ती तम्‍है मझी नू सलहा मना हेलरर का नाम येसुसी बिड़दो नू एन्‍देर ननोत।

त‍इरकर ही चाजना

¹² अबड़ा उल्‍ला नू आस ओन्‍टा टुंगरी म‍इय्याँ गोहरार'आ केरस, अरा धर्मेस ती गोहरारना नू गोट्टा माख़ा पहा बाचस।

¹³ अरा बिज्‍जिया ख़ने आस तंग्‍है चेलारिन मीख़ियस अरा आर ही ती बारा गोटंग आलारिन चज्‍जियस अरा आर गे तइरकर नामे चिच्‍चस।

¹⁴ आर ईर हिकनर, सिमॊन आसी नामे येसुस पतरस पिंजियस अरा आसी भइय्योस अन्‍द्रेयस अरा याकॊब अरा आसी भइय्योस यॊहन अरा फिलिप्‍पोस अरा बरतोलोमैस

¹⁵ अरा मत्तायोस अरा तॊमस अरा हलफैसी तंग्‍दस याकॊब अरा यहूदीर ही छछिन्‍द सैना ता सिमॊन

¹⁶ अरा याकॊबसी तंग्‍दस यूदस अरा यूदस इसकारियॊत एकास ख़ॊख़ा येसुसिन धरताचस।

येसुस आलारिन सिखाब'अदस अरा कोड़े नन्‍दस

¹⁷ तहाँ येसुस तंग्‍है बारा चेलर गने टुंगरी ती इत्तियस ती टोंका अड्डा नू इज्‍जस। आसी चेलर ही ओन्‍टा कोहाँ गोंहड़ा असन रहचा। अरा येरुसलॆम नगरे अरा यूदेया जिला ही नन्ना अड्डा अरा समुदर पिंडी ता नगरे तुरोस अरा सीदॊन ती बरचका ओन्‍टा कोहाँ गोंहड़ा हूँ असन रहचा।

¹⁸ ईर आस ती मेना गे अरा तम्‍है रोगे ती उजगार'आ गे आसी गुसन बरचका रहचर। अरा नॆ मलदौ बॊलता गुट्ठी ती सतारका रहचर आरिन आस कोड़े नंजस।

¹⁹ ओर्मर आसिन एंसड़'आ बेद्दा लगियर, एन्‍देरगेका आसी ती सवंग उरखरकी ओर्मारिन कोड़े ननालिया।

आसीस अरा भखना

²⁰ ख़ने येसुस तंग्‍हा चेलर तरा किर्रे ईरीयस ती बाचस, “अना मलकारो धर्मेस निम्हा ती खुसमारदस, एन्‍देरगेका धर्मेसी राजी निम्‍है दिम हवे।

²¹ अक्‍कुन कीड़ा सार'उरो निम्हा ती धर्मेस खुसमारदस नीम गा उड़तार'ओर। अक्‍कुन चींख़ू आलारो नीम गा अलखोर।

²² मनवा ख़द्दस चड्डे आलर निमन छिंडोर अरा निमन अम्‍बोर चि'ओर अरा निमन हींड़'ओर अरा निम्‍है नामेन मलदौ ब'ओर ती खंडोर चि'ओर होले धर्मेस निम्हा ती खुसमार'ओस।

²³ आर इबड़न नन्नर ख़ने नीम खुसमार'अरकी रिझ्र'आ, एन्‍देरगेका मेर्ख़ा नू निमा ख़क्ख्र'ऊ इनाम कोहाँ र'ई। सुरता नना का आर ही पूरखर हूँ धर्मेसी कत्‍था तिंगुर गने एन्नेम ननालियर।

²⁴ लिकिन ओहरे नीम उरुब आलारो, नीम गा निम्‍है उर्मी सुक्‍खे अरा रिझ ख़क्‍खा ख़चकर।

²⁵ ओहरे नीम अक्‍कु उड़तारका र'ऊ आलारो, नीम गा कीड़ा सार'ओर। ओहरे नीम अक्‍कु अलखू आलारो, नीम गा दुक्‍खे सार'ओर अरा चींख़ोर।

²⁶ ओहरे निमन इकला ओर्मा आलर सहरारनर, एन्‍देरगेका आर ही पूरखर हूँ ठक'ऊ धर्मेसी कत्‍था तिंगुर गने एन्नेम नना लगियर।

बैरिर गने चोन्‍हा

²⁷ लिकिन एंग्‍है मिनू आलर निमन ऎन ब'अदन का तम्है बैरीरिन चोन्‍हा नना। निमन छिंडुर गे दौ नना।

²⁸ निमन सर्प'उर गे आसीस चि'अके। निमन हींड़ुर गे बिन्‍ती ननके।

²⁹ निंगन हींड़'आ गे निंग्‍है ओन्‍टा गल्‍लेन थपड़'उस गे नन्‍ना गल्‍लेन हूँ ऎदके। निंग्‍है बर्कन बच्‍चुस गे निंग्‍है अंगन हूँ हो'आ गे अमके छेक'आ।

³⁰ निंग्‍है गुसन ने'ऊ ओर्मर गे चि'आ। अरा निंग्‍है जिनिसन हो'उस ती अदिन ख़क्‍खा गे आसिन ढेवा अमके नना।

³¹ आलर एकासे निमन नना नीम बेद्ददर, अन्‍नेम नीम आर गे नना।

³² नीम तम्है चोन्‍हा ननुर ती लेका चोन्‍हा नन्‍दर होले धर्मेस ती एन्‍देर इनाम ख़क्‍ख'ओर? पपहर हूँ गा तम्है चोन्‍हा ननुरिन चोन्‍हा नन्‍नर।

³³ नीम तम्है दौ ननुर गने लेका दौ नन्‍दर होले एन्‍देर नफा मनो? पपहर हूँ गा अन्नेम नन्‍नर।

³⁴ नीम नहड़ा किर्त'अर चि'ओर ब'अरकी असरा ती नहड़ा चि'अदर होले नीम एन्‍देर इनाम धर्मेस ती ख़क्‍खोर? पपहर हूँ गा पपहर गे नहड़ा चि'अनर का फिन अउन्‍दम ख़क्‍खोम।

³⁵ औंगे अपन बैरीरिन चोन्‍हा नना अरा आर गे दौ नना। अरा ख़क्‍खना ही असरा मल ननरकी नहड़ा चि'आ। होले निमा गे बग्‍गे इनाम ख़क्‍ख्र'ओ, अरा नीम उर्मी ती मेच्‍छा नू र'ऊ धर्मेसी ख़द्दर लेक्‍खा मनोर। सुरता ननके का धर्मेस गा धन्‍यबाद मल नन्नुर अरा मलदौ आलर मइय्याँ हूँ सोग्‍गे ऎरदस।

³⁶ एकासे निम्‍है मेर्ख़ा ता बंगस निमन सोग्‍गे ईरू र'अदस अन्नेम नीम हूँ सोग्‍गे ईरू मना।

बदी अमा नना

³⁷ नीम नन्नारिन नेंव‍ई अमा नना, होले नीम हूँ धर्मेस ती नेंव‍ई मल नन्‍तार'ओर। नीम नन्नारिन बदी अमा टिड़'आ, होले नीम हूँ धर्मेस ती बदी मल टिड़तार'ओर। नीन नन्नर ही गुन्‍हन अम्‍बदय होले निम्‍है गुन्‍हा हूँ धर्मेस ती अम्‍बतार'ओ।

³⁸ चि'आ, होले निमा हूँ धर्मेस ती चीतार'ओ। धर्मेस निमा गे अरबा अरबा अरा नुकुच नुकच अरा बीजरना बेसे दौ जो‍खना ती निम्‍है कोरा नू चि'ओस। नीम एका जोखना ती जोख'ओर आ जोखना तिम निमा गे हूँ धर्मेस ती जोखतार'ओ।”

³⁹ येसुस ओन्‍टा जोक्‍खा ख़ीरी तिंगियस: “अन्धहस अन्‍धहासिन डहरे ऎद'आ ओंगोस का? मला। एन्ने ननोस होले इरबारिम गड्डी नू खत्र'ओर।

⁴⁰ चेलस तंग्‍है गुरुस ती कोहाँ मलदस। लिकिन एकास पखड़ मनोस आस गुरुस लेक्‍खा मनोस।

⁴¹ नीन निंग्‍है ख़न्न ता च‍इलन मल थिथाब'अदय, लिकिन निंग्‍है भईसी ख़न्न ता कंटेन एन्‍देरगे ऎरदय?

⁴² नीन निंग्‍है ख़न्न ता च‍इलन मल थिथाब'अदय ती निंग्‍है भईसिन ब'अदय, अना भ‍ई, ऎन निंग्‍है ख़न्न ता कंटेन ओथ्र'ओन चि'ओन, एन्ने एन्‍देरगे ब'अदय? अना उतुरमाड़ू, मुन्‍द निंग्‍है ख़न्न ता च‍इलन ओथ्र'आ, होले नीन निंग्‍है भईसी ख़न्न ता कंटेन ओथ्र'आ गे फरीफरी ऎरा ओंगोय।

एकन्ने मन्‍न अन्नेम ख़ंजपा

⁴³ बने मन्‍न चिम्मो मल ख़ंज'ई, अरा पयहा मन्‍न ठोस ख़ंजपा मल ख़ंज'ई।

⁴⁴ उर्मी मन्‍न तंग्है तंग्है ख़ंजपा ती चिन्हर'ई, एन्‍देरगेका ख़ोप्‍पा ती अंजीर मल चोख़नर, अरा अच्‍च-ख़ोप्‍पा ती अंगुर मल चोख़नर।

⁴⁵ अन्नेम दौ आलस तंग्‍है दौ जिया ही दौ कुट्ठी ती दौ नलखन नन्‍दस, अरा मलदौ आलस तंग्‍है जिया ही मलदौ कुट्ठी ती मलदौ नलखन नन्‍दस। एन्‍देरगेका जिया नू एन्‍द्रा निन्‍दकी र'ई आदिम ब‍ई ती उरखी।

ऎंड़ मदहे एड़पा कम'ऊ आलर

⁴⁶ नीम एंग्‍है ब'अनन मल पॆस्रदर, होले हूँ एंगन अना उर्बायो, अना उर्बायो, एन्‍देरगे ब'अदर?

⁴⁷ एका ओर्तर एंग्‍है गुसन बरनर अरा एंग्‍है कत्‍थन मेन्‍नर ती अदिन अन्नेम नन्नर। ऎन निमन तेंग्‍गोन का आर नॆख'आ बेसे र'अनर।

⁴⁸ आर आसी बेसे र'अनर का एकास गड्डी अरख़ियस ती चचड़ी नू नेव नंजस ती एड़पा कमदस। बहड़ी बरचा ख़ने आ एड़पा नू लग्‍गिया लिकिन आद अदिन नुक'आ पोल्‍ला। एन्‍देरगेका आद चचड़ी नू नेव कमचका रहचा।

⁴⁹ लिकिन एका ओर्तर एंग्‍है कत्‍थन मेन्नर ती अदिन अन्नेम मल नन्नर। आर आसी बेसे र'अनर का एकास धूली नू बिगर नेव ही एड़पा कमचस। बहड़ी आ एड़पा नू लग्‍गिया ख़ने लॆम आद खत्तरा ती छित्ती छान मंजा केरा।”