लू‍कस 5 - पुना गच्छरना NT (BSI)

पहिल चेलासी मॆख़तारना

¹ उन्‍दुल येसुस गेन्नॆसरेत समुदर ही पिंडी नू इज्जकाचस। आ बारी ओन्‍टा गोंहड़ा धर्मेसी कत्‍था मेना गे खतरना चो'अना बेसे आसी हेद्दे बर'आलिया।

² ख़ने आस समुदर ही पिंडी नू ऎंड़ गोट डोंगा इज्‍जका ईरयस। केंवटर अइय्या ती इत्तियर ती जल्‍ली गुट्ठिन नॊड़ालियर।

³ येसुस अबड़ा डोंगा गुट्ठी ती ओन्‍टा नू अरगियस एकदा सिमॊनसी रहचा। अरा आसिन बाचस का पिंडी ती कटिक गुछा ब'आ। तहाँ येसुस डोंगा नू उक्‍कियस ती आलारिन सिखाब'आ हेलरस।

⁴ एकाबारी आस तेंगा मुंजियस तहाँ सिमॊनसिन बाचस, “डोंगन ख़ोड़ख़ा नू हो'आ, अरा इंजो ल'आ गे जल्‍ली हेबड़ा।”

⁵ सिमॊनस आसिन किर्त'अर बाचस, “अना उर्बायो, ऎम गोट्टा माख़ा लौच ईरकम, लिकिन एन्‍द्रा हूँ मल ख़क्‍खकम, अन्नु हूँ निंग्‍है ब'अना लेक्‍खा जल्‍ली हेबड़दन।”

⁶ एकाबारी आर एन्ने नंजर ख़ने नगदे इंजो ख़ोंड़चर ओन्‍द्रर का आर ही जल्‍ली चर्र'आ हेलरा।

⁷ ख़ने आर तंग्‍है संगेरिन नॆ नन्ना डोंगा नू रहचर आरिन ख़ेक्खा ती मीख़ियर का बर'अरकी एमन सहाड़ा नना। अरा आर बरचर ती दुयो डोंगा नू निन्‍दर का डोंगा मुलख़ा बेद्दालिया।

⁸ सिमॊन पतरस इदिन ईरयस ती येसुसी ख़ेडमूली खत्तरस ती बाचस, “अना उर्बायो, एंग्‍है गुसले कला, एन्‍देरगेका ऎन पपहा आलन हिकदन, अरा निंग्‍है जॊगे मलकन।”

⁹ एन्‍देरगेका एन्ने बग्‍गे इंजो बज्झरा, ख़ने आस गे अरा आसी गने नॆ नॆ रहचर आर गे नगदे अकबक मंजा।

¹⁰ सिमॊनसी संगे नलख ननू जेबदयुसी तंग्‍दस याकॊब अरा यॊहनस हूँ अकबक मंजर। ख़ने येसुस सिमॊनसिन बाचस, “अमा एल्चा, नीन अक्‍कु ती एंग्‍है तरा आलारिन ओन्‍द्रना ही नलख ननोय।”

¹¹ अरा आर डोंगन पिंडी नू ओन्‍द्रर बरचर, अरा जम्मा जातन अम्‍बियर ती येसुस गने चॊंख़्रर।

येसुस खसरा रोगियासिन कोड़े नन्‍दस

¹² येसुस ओन्‍टा पद्दा नू बरचस, असन ओन्‍टा कुड़गा खादी ती लिन्‍डरका आलस रहचस। एकाबारी आ आलस येसुसिन ईरयस ख़ने आस ख़ोलख़रस ती खत्तरस ती गोहरारस, “अना उर्बायो, एंगन कोड़े ननम चि'आ, ऎन गा अख़दन का निंग्‍है मने र'ई होले, नीन एंगन कोड़े नना ओंग्‍दय।”

¹³ येसुस ख़ेक्खा ती आसिन ऎंसड़स ती बाचस, “एंग्‍है मने र'ई का नीन कोड़े मना कला।” आ बारिम आसी खसरा रोगे कोड़े मंजा केरा।

¹⁴ ख़ने येसुस आसिन बाचस, “नॆखा ती हूँ ई पत्त नू अक्‍कुन अमके तेंगा, लिकिन कला अरा निंगन नैगासिन ऎद'आ, औंगे आस निंगन जांच'ओस का खसरा रोगे निंग्‍है ती बोंगा केरा, अरा निंग्‍है सफा मन्ना ही पत्त नू मूसस एन्‍देर दाँड़े अरग'आ गे आनकादस, अदिन दाँड़े चि'आ। ईद आलर गे गोवाह मनो का नीन सफा मन्‍तारकादय।”

¹⁵ लिकिन येसुसी पत्त ता कत्‍था अउर हूँ बीड़रा केरा। अरा गोंहड़ा गोंहड़ा येसुस ती मेना गे अरा तम्‍है बेमार ती उजगार'आ गे ख़ोड़रा।

¹⁶ लिकिन येसुस उछिन्‍द अड्डा नू कालरकी बिन्‍ती नना लगियस।

येसुस लकवा बेमरहासिन कोड़े नन्‍दस

¹⁷ उन्‍दुल येसुसी सिखाब'अना बेड़ा फरिसीर अरा नॆग सिखाब'उर असन उक्‍का रहचर। एकाबड़र गलिलेया जिला ही बग्‍गे पद्दा गुट्ठी ती अरा येरुसलॆम ती अरा यूदेया जिला ही नन्ना पद्दा ती बरचका रहचर। अरा कोड़े नना गे धर्मेसी सवंग येसुस गने रहचा।

¹⁸ आ बारी जोक्‍क आलर ओन्‍टा लकवा बेमरहासिन खटी नू ओन्‍द्रर, अरा आर आसिन भितरी हो'अना ही अरा येसुसी मुन्‍दहारे उइय्‍ना ही चिताबुता नंजी ईरियर।

¹⁹ लिकिन बग्‍गे गोंहड़ा ही चड्डे भितरी हो'आ पोल्‍लर, ख़ने आर मेसगा नू अरगियर ती जोक्‍क खपरन ताड़चर ती आसिन खटी रांगे येसुसी मुन्‍दहारे एत्ताचर चिच्‍चर।

²⁰ येसुस आर ही पत्त'अनन ईरयस ती बाचस, “अना आलायो, ऎन निंग्‍है पाप गुट्ठिन छमा नन्‍दन।”

²¹ ख़ने नॆग सिखाब'उर अरा फरिसीर ताम ताम नू कछनख्र'आ हेलरर, “ईस नॆ तंग्‍है? ई आलस धर्मेसिन निंदा नन्‍दस। धर्मेसिन अम्‍बर नॆ पाप गुट्ठिन छमा नना ओंगोर?”

²² लिकिन येसुस आर ही जिया ता कत्‍थन अक्‍खस ती आरिन बाचस, “नीम निम्‍है जिया नू एन्‍देरगे सोच'आलदर?

²³ ‘निंग्‍है पाप छमा नन्‍तार'ई’ एन्ने ब'अना ‘चो'आ अरा कुद्दा ‍नुंगा’ एन्ने ब'अना ती सेब्‍बा हवे। एन्‍देरगेका आलर कोड़े मन्नन ऎरा ओंग्‍नर, लिकिन पाप छमा मन्नन ऎरा पोलनर।

²⁴ लिकिन ऎन ई आलासिन कोड़े नन्ना ती निमन ऎद'ओन का एंगा, मनवा ख़द्दन गे आलर ही पाप गुट्ठिन छमा नना गे हूँ ख़ॆख़ेल नू आकुस र'ई।” ख़ने आस लकवा बेमरहासिन आनियस, “ऎन निंगन ब'अदन, ‘चो'आ, निंग्‍है खटिन चेड़'अरकी एड़पा कला।’”

²⁵ आ आलस ओर्मर ही ऎथ्रना नू लॆम चॊचस, अरा एका खटी नू चूतकाचस अदिन चेड्डस ती धर्मेस गे ओहमा नन्नुम ईकनुम एड़पा केरस।

²⁶ ओर्मर अनचकरर केरर, अरा आर धर्मेसिन ओहमा नंजर अरा बग्‍गे इल्‍चनुम बाचर, “नाम इन्ना अकबक नलख गुट्ठिन ईरका र'अदत।”

लेबीसी मॆख़तारना

²⁷ इदही ख़ॊख़ा येसुस बहरी उरखस अरा लेवी नामे ओन्‍टा मालगुजारी ऊज'उसिन मालगुजारी ऊज'ऊ एड़पा नू उक्‍का ईरियस। अरा येसुस आसिन बाचस, “एंग्‍है गने चॊंख़्र'आ।”

²⁸ होले आस जम्मा जातन अम्‍बियस ती चॊचस अरा आसी गने चॊंख़्रस।

²⁹ तहाँ लेवीस तंग्‍है एड़पा नू येसुस गे ओन्‍टा कोहाँ मदी चिच्‍चस। अरा असन बग्‍गे मालगुजारी ऊज'उर अरा नन्ना आलर हूँ आर गने मंडी ओना उक्‍का रहचर।

³⁰ ख़ने फरिसीर अरा नॆग सिखाब'उर आसी चेलारिन कुटमुटर'आ हेलरर ती बाचर, “नीम मालगुजारी ऊज'उर अरा पपहर गने एन्‍देर गे ओन्‍दर मॊख़दर?”

³¹ येसुस आरिन किर्त'अर बाचस, “कोड़े दौ आलर गे बैधसी चाड़ मल्‍ला, लिकिन बेमरहर गे र'ई।

³² अन्नेम ऎन नॆ तमन उजगो सोचनर आर गे म‍ला नॆ तमन पपहा बुझुरनर आरिन जियन किर्त'आ गे एड़'आ बरचका र'अदन।”

उपास नन्ना ही पत्त नू मेन्ना

³³ फिन आर येसुसिन मेंजर, “यॊहनसी चेलर गा खनिम खनिम उपास नन्नर अरा गोहरारनर, अरा अन्नेम फरिसीर ही चेलर हूँ नन्नर। लिकिन निंग्‍है चेलर गा ओन्नर मॊख़नर।”

³⁴ येसुस आरिन बाचस, “नीम एका गूटी बेंजा जॊंख़स बरतियर गने र'अदस आरिन उपास नन्‍त'आ ओंग्‍दर का?

³⁵ लिकिन बेंजा जॊंख़स आर ती होत'अरना बेड़ा बर'ओ, अबड़ा उल्‍ला गुट्ठी नू आर उपास ननोर।”

³⁶ आस ऎनोटा जोक्‍खा ख़ीरी हूँ आरिन तिंगियस, “नॆ हूँ पुना किचरी ती ओन्‍टा कुटका चर्रनर ती पच्चा किचरी नू मल सट‍ई तुन‍ई, अन्‍ने आस नन्‍दस होले पुना एटर'ओ कालो अरा आद पच्चा गने मेल मल मॊख़ो।

³⁷ अरा नॆ हूँ पुना अंगुर रासी आबोन चपटा ही पच्चा कुड़वा नू मल निन्‍ददस उइय्‍दस, अन्ने नन्दस होले, पुना अंगुर रासी अमचूर मनो ती चपटा ही कुड़वन पलको चि'ओ, अरा अंगुर रासी बाह'ओ क'ओ अरा चपटा ही कुड़वा नठार'ओ क'ओ।

³⁸ औंगे पुना अंगुर रासी आबोन चपटा ही पुना कुड़वा नू निन्‍दना उइय्‍ना मनो।

³⁹ अरा नॆ हूँ पच्चा अंगुर रासिन ओन्‍दस ती पुना मल बेद्ददस, एन्‍देरगेका आस ब‍'अदस का पच्चा दिम बॆस र'ई।”