लूकस 3 - पुना गच्छरना NT (BSI)यॊहन नूड़रत'उस डहरे उजग'अदस ( मत्ता 3:1-12 ; मर 1:1-8 ; यॊ 1:19-28 ) 1 कैसर तिबेरयुस रोम राजिन राजी नन्ना ही पन्द्रा बछर नू पोन्तियुस पिलातुस यूदेया जिला ही राजीख़ापू रहचस। आ बेड़ा हॆरॊदॆस अंटिपस गलिलेया जिला ही बॆलस रहचस। अरा आसी तंग्ड़िस फिलिप्पोस इतुरैया अरा त्राख़ॊनितिस जिला ही बॆलस रहचस। अरा लुसानियास अबिलॆनॆ जिला ही बॆलस रहचस। 2 हन्नास अरा कैफस कोहाँ नैग रहचर। आ बेड़ा नू धर्मेसी कत्था टोड़ंग नू र'ऊ जकरियासी तंग्दस यॊहनस गे बरचा। 3 ख़ने यॊहनस यरदन ख़ाड़ ही आ फड़ा ई फड़ा चक नू बरचस ती आलारिन तेंगा हेलरस, “जियन किर्त'आ अरा नॊड़र'आ होले धर्मेस निमन छमा ननोस।” 4 धर्मेसी कत्था तिंगू यसायास यॊहनसी पत्त नू लिखचकाचस, एकासे का, “ओर्तोस टोड़ंग नू चिच्चियारदस, ‘उर्बस गे डहरेन सपड़'आ, आस गे डहरेन चत्र'आ। 5 उर्मी ढोड़हा नीन्दतार'ओ कालो अरा उर्मी परता अरा टुंगरी किइय्या नन्तार'ओ, अरा टेड़हो डहरे उजगतार'ओ, अरा गड्डी डिप्पा डहरे सम नन्तार'ओ। 6 अरा उर्मी आलर धर्मेसी नाड़ना ही पत्त नू अख़'ओर।’” 7 आलर गोंहड़ा गोंहड़ा यॊहनस गुसन नॊड़र'आ गे बर'आलियर। ख़ने आस आरिन ब'आलियस, “अना बिक्ख नेर्रे बेसे आलारो, पाप नन्नन बिगर अम्बका ती धर्मेसी बरना दंडे ती बोंगा गे निमन निकईम चेता बाचर का? 8 जियन किर्त'अना ही जॊगे नलख नना। नीम तम्है तम्है जिया नू एन्ने अमा सोच'आ हेलरा का ऎम अब्राहमसी बनस ता हिकदम। ऎन निमन ब'अदन का धर्मेस इबड़ा पखना गुट्ठी ती अब्राहमस गे ख़द्द कम'आ ओंग्दस! 9 अक्कु धर्मेसी रायबड़ी लेक्खा टोंग'ए मन्न ही पादा नू अबड़न खंडरकी हेबड़ा गे खुतारकी र'ई। एका मन्न दौ ख़ंजपा मल ख़ंज'ई अबड़ा खंडरकी चिच्ची नू सजतार'ओ।” 10 ख़ने आलर यॊहनसिन मेंजर, “होले दंडे ती बछर'आ गे एमा एन्देर नन्ना र'ई?” 11 यॊहनस आनाकिर्ताचस, “निंग्है गुसन दुई गोटंग अत्तना र'ई होले, ओन्टा अत्तनन नॆखा गुसन मल्ला आस गे चि'आ। अरा निंग्है गुसन मंडी र'ई होले, अदन कीड़र गे चि'आ।” 12 ऊज'उर हूँ आस गुसन नॊड़र'आ गे बरचर अरा मेंजर, “अना गुरु, एमा एन्देर नन्ना र'ई?” 13 यॊहनस बाचस, “एका बग्गे निमा गे ऊज'आ गे आनरकी र'ई अदिन ती बग्गे अमके ऊज'आ।” 14 जोक्क सैनर हूँ आसिन मेंजर, “एमा एन्देर नन्ना र'ई?” यॊहनस आरिन बाचस, “नॆखन हूँ ढेवाँ ढेवाँ नू ढिबा अमके हो'आ महले आलारिन अमके बझाब'आ। अरा नीम निम्है तनखानुम खतिर ननके।” 15 ओर्मा आलर मसीसी बरना ही पाब ऎरालियर। अरा यॊहनसी पत्त नू ईर तम्है तम्है जिया नू सोच'आलियर का ईसिम गा मसीस मलदस। 16 यॊहनस ओर्मारिन बाचस, “ऎन गा निमन अम्मु ती नॊड़रत'अदन, लिकिन एकास बर'ऊ र'अदस आस एंग्है ती कोड़हे सवंगिय र'अदस। ऎन ई जॊगे हूँ मलकन का आसी जूता गुट्ठी ही ऎपन हूँ कोल्ला ओंगोन का एकदन बिट्ठी ननू जॊंख़स लेका नन्दस। आस निमन नेम्हा बॊलतस अरा चिच्ची ती नॊड़'ओस। 17 आस तंग्है केतेर ती गहुँन अरा चींख़न बेग'ओस। अरा आस तंग्है खलिन बॆस लगे एर्रोस। अरा आस गोट गहूँन तंग्है कुट्ठी नू उइय्योस, अरा चींख़न चिच्ची नू बस्सोस एकदा इकला हूँ मल तेभर'ओ।” 18 ई लेक्खा यॊहनस सिखाब'अरकी आलारिन धर्मेस हेद्दे किर्रा गे चेताब'अते र'आलियस। आस आरिन दौ कत्था हूँ मेन्ताचस। 19 यॊहनस सन्नी बॆल हॆरॊदॆस अंटिपसिन हूँ केप्पस। एन्देरगेका आस तंग्ड़िस फिलिप्पोस उज्जनुम उज्जनुम आसी मुक्का हॆरॊदिया आबोन उइय्यस, अरा आस बग्गे मलदौ नलख हूँ नंजकाचस। 20 होले हॆरॊदॆस इबड़ा जम्मा ती कोड़हे ओन्टा मलदौ नलख नंजस का यॊहनसिन गुड़ताचस। येसुसी नॊड़रना ( मत्ता 3:13-17 ; मर 1:9-11 ) 21 एकाबारी बग्गे आलर नॊड़रर मुंज्रर, अदही ख़ॊख़ा येसुस हूँ नॊड़रस। अरा आस बिन्ती ननालियस ख़ने मेर्ख़ा तिसग्रा केरा, 22 अरा नेम्हा बॊलतस मॆद ही रूपे नू पेरवाँ लेक्खा येसुस मइय्याँ इत्तियस। अरा मेर्ख़ा ती एन्ने ब'अना मेन्द्रा, “नीन एंग्है चोन्हा ख़द्दय हिकदय, ऎन निंग्है ती बग्गे खुसमारदन।” येसुसी पीढ़ी ( मत्ता 1:1-17 ) 23 येसुस तान दौ कत्था मेन्त'आ हेलरस ख़ने, आस तीस बछर ही केम रहचस। येसुस बुझ्र'आलियस का आस यॊसॆफसी तंग्दस। यॊसॆफस ऎलीसी तंग्दस। 24 ऎलीस मत्तातसी तंग्दस, मत्तातस लेवीसी तंग्दस, लेवीस मेलख़ीसी तंग्दस, मेलख़ीस यन्नासी तंग्दस, यन्नास यॊसॆफसी तंग्दस। 25 यॊसॆफस मत्तातियासी तंग्दस, मत्तातियास आमॊसी तंग्दस, आमॊस नाहूमसी तंग्दस, नाहूमस हेसलीसी तंग्दस, हेसलीस नंगैसी तंग्दस। 26 नंगैस मातसी तंग्दस, मातस मत्तातियासी तंग्दस, मत्तातियास सेमेयिनसी तंग्दस, सेमेयिनस यॊसॆख़सिन तंग्दस, यॊसॆख़स यॊदासी तंग्दस। 27 यॊदास यॊअननसी तंग्दस, यॊअननस रॆसासी तंग्दस, रॆसास जोरोबाबेलसी तंग्दस, जोरोबाबेलस सलातिऎलसी तंग्दस, सलातिऎलस नॆरीसी तंग्दस। 28 नॆरीस मेलख़ीसी तंग्दस, मेलख़ीस अद्दीसी तंग्दस, अद्दीस कॊसामसी तंग्दस, कॊसामस एलमदामसी तंग्दस, एलमदामस ऎरसी तंग्दस। 29 ऎरस यॆसूसी तंग्दस, यॆसूस एलियेसेरसी तंग्दस, एलियेसेरस यॊरीमसी तंग्दस, यॊरीमस मत्तातसी तंग्दस, मत्तातस लेवीसी तंग्दस। 30 लेवीस सुमेयॊनसी तंग्दस, सुमेयॊनस यूदासी तंग्दस, यूदास यॊसॆफसी तंग्दस, यॊसॆफस यॊनामसी तंग्दस, यॊनामस एलियाकीमसी तंग्दस। 31 एलियाकीमस मेलेयासी तंग्दस, मेलेयास मेन्नासी तंग्दस, मेन्नास मत्तातासी तंग्दस, मत्तातास नातामसी तंग्दस, नातामस दाऊदसी तंग्दस। 32 दाऊदस येसैसी तंग्दस, येसैस यॊबॆदसी तंग्दस, यॊबॆदस बोआसी तंग्दस, बोआस सलासी तंग्दस, सलास नास्सॊनसी तंग्दस। 33 नास्सॊनस अमिनदाबसी तंग्दस, अमिनदाबस अदमीनसी तंग्दस, अदमीनस अरनीसी तंग्दस, अरनीस हेसरॊमसी तंग्दस, हेसरॊमस फारेसी तंग्दस, फारेस यहूदासी तंग्दस। 34 यहूदा याकॊबसी तंग्दस, याकॊबस इसाकसी तंग्दस, इसाकस अब्राहमसी तंग्दस, अब्राहमस तेरासी तंग्दस, तेरास नाख़ॊरसी तंग्दस। 35 नाख़ॊरस सेरूख़सी तंग्दस, सेरूख़स रेगूसी तंग्दस, रेगूस फेलेकसी तंग्दस, फेलेकस एबेरसी तंग्दस, एबेरस सलासी तंग्दस। 36 सलास कायनामसी तंग्दस, कायनामस अर्फकसादसी तंग्दस, अर्फकसादस सॆमसी तंग्दस, सॆमस नूहसी तंग्दस, नूहस लामेख़सी तंग्दस। 37 लामेख़स मतूसलासी तंग्दस, मतूसलास हेनॊख़सी तंग्दस, हेनॊख़स यारेदसी तंग्दस, यारेदस मलेलेयॆलसी तंग्दस, मलेलेयॆलस कायनामसी तंग्दस। 38 कायनामस एनॊसी तंग्दस, एनॊस सॆतसी तंग्दस, सॆतस आदमसी तंग्दस, आदमस धर्मेस ती गढ़्रका रहचस। |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India