लू‍कस 22 - पुना गच्छरना NT (BSI)

यूदस येसुसिन धरत'आ गे मोका बेद्ददस

¹ अक्‍कु बिगर बिदगी असमा ही परब एकदा कट्टना परब बातार'ई अड़सकीचा।

² मुध नैगर अरा नॆग सिखाब‍'उर येसुसिन पिटा गे आलर नम्‍है बिड़दो नू इन्द्रिइम ननोर एन्ने एल्‍चियर ती एकासे आसिन पिटोत बाचर ती मोका बेद्दालियर।

³ तहाँ यूदस इसकारियॊत नॆ बारो चेलर ती ओर्तोस रहचस। सैतान आस म‍इय्याँ समसारा।

⁴ ख़ने आस मुध नैगर अरा धर्मेसी मन्दिर ख़ापुर ही मुद्धर गुसन कछनख्र'आ गे केरस का एका बने घत ती येसुसिन धरत'आ गे आर गे संगे चि'आ ओंगोस।

⁵ आर इदन मेंजर ती खुसमारर, अरा आस गे ढिबा चि'आ गे बाचर।

⁶ ख़ने आस हुकमारस ती येसुसिन एकाबारी गोंहड़ा मल र'ओ आ बारी आसिन धरत'अना नू संगे चि'आ गे मोका बेद्दा हेलरस।

येसुस चेलर गने कट्टना ही ओना-मॊख़नन मॊख़दस

⁷ अक्‍कु बिगर बिदगी असमा ही परब उल्‍ला अड़सिया, अउला कट्टना ही भेंडो ख़द्द गुट्ठिन दाँड़े नन्ना रहचा।

⁸ ख़ने येसुस पतरस अरा यॊहनसिन एन्ने बाचस ती त‍इय्यस, “कला नमा गे कट्टना ही सराजमा नना का नाम ओन संगे ओना मॊख़ा ओंग्‍दत।”

⁹ ख़ने आर मेंजर, “नीन एसन सराजमा नना गे बेद्ददय?”

¹⁰ ख़ने आस बाचस, “निम्‍है येरुसलॆम नगरे नू कोरना गनेम ओन्‍टा आलस सं‍जगी नू अम्मु चेड्डका निमा ख़क्ख्र'ओस। आसी ख़ॊख़‍ ख़ॊख़ा कालके, एका एड़पा नू आस कोर'ओस अइय्या नीम हूँ कोर'आ।

¹¹ अरा आ एड़पा उर्बासिन ब'अके, ‘गुरुस ब'अदस का एंग्‍है पाही कुठली एसन र'ई, ईगेका कट्टना ही ओन्ना-मॊख़नन एंग्‍है चेलर गने ओनोन?’

¹² अरा आस निमन ओन्‍टा सिंगराचका सपड़ाचका म‍इय्‍याँ ता कोहाँ कुठलिन ऎद'ओस। अइय्यम नीम सराजमा ननके।”

¹³ ख़ने आर केरर ती एकासे येसुस बाचकाचस अन्नेम ख़क्‍खियर। अरा कट्टना ही सराजमा नंजर।

¹⁴ बेड़ा अड़सिया ख़ने, येसुस तंग्‍है बारो तइरकर गने ओना मॊख़ा गे उक्‍कियस।

¹⁵ अरा आरिन बाचस, “एंग्‍है कोड़हे मने रहचा का ऎन दुक्‍खे सारना ती मुन्‍द निम्‍है गने ई कट्टना ही ओन्ना-मॊख़नन ओनोन।

¹⁶ ऎन फिन इकला हूँ ई कट्टना ही ओन्ना-मॊख़नन मल ओनोन, एका गूटी ईद ही माने धर्मेसी आलारिन राजी नन्ना नू पूरा मल मनो।”

¹⁷ फिन ओन डुभा अंगुर रासी आबोन होच्‍चस ती धर्मेस गे धन्‍यवाद नंजस। फिन आस बाचस, “इदन ओंदा, अरा निम्‍है मझी नू ख़टर'आ।

¹⁸ ऎन एका गूटी धर्मेस आलारिन राजी नन्ना बेड़ा मनो अदिन ती मुन्‍द इकला हूँ ई अंगुर रासी आबोन मल ओनोन।”

¹⁹ एन्ने ब'अरकी असमन होच्‍चस ती धर्मेस गे धन्‍यवाद नंजस। फिन अदिन किच्‍चियस ती चेलर गे चिच्‍चस अरा बाचस, “ईद एंग्‍है मॆद हिके, ईद निमा गे चीतारकी र'ई, एंग्‍है सुरता गे इदन नना।”

²⁰ एन्ने चाल तिम ओंडका ख़ॊख़ा आस अउर ओन डुभा अंगुर रासिन होच्‍चस अरा बाचस, “ई डुभा धर्मेस अरा आलर ही मझी ता पुना गच्‍छरका हवे। ई गच्‍छरकन ऎन एंग्‍है ख़ॆंस ती बड़ियर नन्‍दन, ईद निमा गे दाँड़े बेसे बाहतार'ई।

²¹ ऎरा! लिकिन निम्‍है ती ओर्तोस एंगन धरत'ओस, आस हूँ एंग्‍है गने ओनालदस।

²² धर्मेस मनवा ख़द्दन एंगा गे एकासे चिताबुता नंजकादस अन्ने गा ऎन खे'ओन दिम। लिकिन नॆ एंगन धरत'आ गे संगे चि'अदस आसी मुंज्रना नगदे भयभयान मनो।”

²³ ख़ने चेलर ताम ताम मेंजनखर'आ हेलरर, नम्‍है मझी ती नॆ एन्ने नलख ननो?

जॊंख़र बेसे र'आ

²⁴ अरा चेलर तम्‍है मझी नू हबड़ा हबड़ी मंजर का तम्‍है नू नॆ जम्मेर ती मुद्ध हिके।

²⁵ ख़ने येसुस बाचस, “ई ख़ॆख़ेल नू बॆलर अरा आकुस उइय्युर आलर म‍इय्याँ आकुस नन्‍नर। अन्नु हूँ आर आलर ही संगेर बातारनर।

²⁶ निम्‍है नू गा अन्ने मल नन्ना र'ई, निम्‍है मझी नू नॆ ओर्मर ती कोहाँ र'अदर आर सन्नी पद हो'अना र'ई। अरा मुद्धर जॊंख़र लेक्‍खा तेतर-सुसर नन्ना र'ई।

²⁷ कोहाँ मुखिया नॆ? एकास मंडी ओना उक्‍कादस का आस गे सुसर'अदस आस? मंडी ओना गे उक्‍कादस आस दिम मुखियस। ऎन गा निम्‍है मझी नू जॊंख़र लेक्‍खा र'अदन।

²⁸ नीमिम एंग्‍है बिढ़्रना नू एंग्‍है गने रहचकादर।

²⁹ ख़ने एंग्‍है बंगस आसी आलारिन राजी नना गे एंगा आकुस चिच्‍चस, अन्नेम ऎन हूँ निमा गे आकुस चि'अदन।

³⁰ अरा एंग्‍है राजी नन्ना उल्‍ला नू नीम एंग्‍है गने ओना मॊख़ा ओक्‍कोर। अरा नीम बॆल-गद्दी नू ओक्‍कोर ती इस्राऎल ही बारा गोतरन नेंवई ननोर।”

येसुस पतरसी इनकर आबोन मुन्‍द तेंगदस

³¹ फिन उर्बस बाचस, “सिमॊन हे सिमॊन, सैतान निमन निम्‍है पत्त'अनन गहूँ जब्‍बना बेसे निंग्‍है पत्त'अनन बिढ़'आ गे धर्मेस ती नीचकी होच्‍चकी र'ई।

³² ऎन गा निंग्हा पत्त'अना मल अम्‍बर'आ गे बिन्‍ती नंजकन। एकाबारी नीन एंग्‍है गुसन किर्रोय निंग्‍है भ‍इय्योरिन बड़ियर ननके।”

³³ ख़ने सिमॊनस बाचस, “अना उर्बायो, ऎन निंग्‍है गने जेहेल एड़पा काला गे महले खे'आ गे हूँ सपड़ारकादन।”

³⁴ येसुस बाचस, “पतरस, ऎन निंगन ब'अदन का इन्नम ख़ॆर चींख़ना ती मुन्‍द नीन एंगन तीन हॆल बलदन ब'ओय।”

बिढ़्रना गे सपड़ारकी र'अना

³⁵ अउरिम येसुस बारोरिन बाचस, “इकला ऎन निमन दौ कत्थन मेन्‍त'आ गे बिगर थ‍ईला, बिगर झोला अरा अगरहा जूता ही त‍इय्‍कन ख़ने निमा इन्द्रिइम जिनिस ही घटी मंजकीचा का?” ख़ने आर बाचर, “मला।”

³⁶ ख़ने आस बाचस, “अक्‍कुन गा नीम निमा थ‍ईला अरा झोलन हो'आ। अरा निम्‍है गुसन तलवार मल्‍ला होले निम्‍है किचरिन बीसा ती ओन्‍टा तलवार ख़ॆन्‍दा।

³⁷ ऎन इदन ब'अदन, एन्‍देरगेका नेम्हा पुथी नू धर्मेसी कत्‍था तिंगुर एंग्‍है पत्त नू लिखचकानर का ‘ऎन दोसी बेसे बातार'ओन’ ईद पूरा मन्ना र'ई, हाँ, धर्मेसी कत्‍था तिंगुर एंग्‍है पत्त नू लिखचका जम्मा पूरा मनो दिम।”

³⁸ ख़ने आर बाचर, “उर्बायो, ऎरा, इसन दुई गोटंग तलवार र'ई।” ख़ने आस बाचस, “अम्‍बा चि'आ।”

जैतून परता नू येसुसी बिन्‍ती

³⁹ तहाँ येसुस असले उरखरकी तंग्‍है चाल बेसे जैतून परता नू केरस, अरा आसी चेलर हूँ आसी गने चॊंख़्रर।

⁴⁰ तहाँ असन अंड़सियर ती आस बाचस, “धर्मेसिन बिन्‍ती नना का निमन बिढ़्रना ती बछाब'आ।”

⁴¹ अरा आस तान ढेला हेबड़ना गेच्‍छा केरस। अरा मूकलिदरस ती बिन्‍ती नना हेलरस।

⁴² “अना एंग्‍है बबा, निंग्‍है मने र'ई होले ई सस्‍ती अरा खे'अनन एंग्‍है ती ताड़'आ। लिकिन एंग्‍है मने ती मला निंग्‍है मने ती दिम नना।”

⁴³ [तहाँ मेर्ख़ा ती ओन्‍टा पैकस ऎथ्रस आसिन डिढ ननत'आलियस।

⁴⁴ अरा आस अउरिम कोड़हे सस्‍ती ती उकुलबुकुल मंजस गोहरार'आलियस अरा आसी एरचरना ख़ॆंस ही कोहाँ टिप्‍पा लेक्‍खा ख़ॆख़ेल नू खत्तरा।]

⁴⁵ आस गोहरारना ती चॊचस ती तंग्‍है चेलर गुसन बरचस। अरा आस आरिन हेन्‍दवारका अरा ख़ड़दिका ही मारे ख़न्‍द्रना ख़क्‍खियस।

⁴⁶ ख़ने आस बाचस, “एन्‍देरगे नीम ख़न्‍द्र'आलदर?, चो'आ, धर्मेस निमन बिढ़्रना ती बछाब'आ गे बिन्‍ती नना।”

येसुसी गुड़रना

⁴⁷ येसुसी एन्ने ब'अना बारिम ओन्‍टा गोंहड़ा बरचा। अदिन बारा चेलर ती ओर्तोस यूदस कड़हाब'आलियस। आस येसुस हेद्दे आसिन चोंखा गे बरचस।

⁴⁸ तहाँ येसुस बाचस, “यूदस नीन चोंखदय ती मनवा ख़द्दस एंगन धरतादय का?”

⁴⁹ तहाँ येसुसी चेलर ईरयर का अक्‍कुन एन्‍देर मना बेद्दाली, ख़ने बाचर, “अना उर्बायो, ऎम तलवार ती ल'ओम का?”

⁵⁰ अरा आर ही ती ओर्तोस कोहाँ नैगासी जॊंख़ासिन खोत्तस। ख़ने आसी तीना ख़ेबदा खंडरा।

⁵¹ तहाँ येसुस “हुरू, अमा नना” बाचस ती आसी ख़ेबदन कप्‍पियस ती आसिन कोड़े नंजस।

⁵² तहाँ येसुस एका ओर्तर आसिन धर'आ गे बरचकाचर, अबड़ा मुध नैगर अरा धर्मेसी मन्दिर ख़ापू सैनर ही मुद्धर अरा सेयान आलारिन बाचस, “नीम बटपार आलर ही बिड़दो नू बरना लेक्‍खा तलवार गुट्ठी अरा सोट्टा गुट्ठी धर'अरकी बरचकादर।

⁵³ ऎन गा उर्मी उल्‍ला धर्मेसी मन्दिर नू निम्‍है गने रहचकन। आ बारी नीम एंगन मल धरचकर। लिकिन अक्‍कुन गा निमा गे धर्मेस एन्ने नना गे चिच्‍चस, अरा ऊख़ा ही आकुस राजी ननी।”

पतरस येसुसिन बलदन ब'अदस

⁵⁴ तहाँ आर येसुसिन धरचर ती होच्‍चर। अरा आसिन कोहाँ नैगासी एड़पा ओन्‍द्रर। पतरस गेच्‍छा गेच्‍छा ती ख़ॊख़ा ख़ॊख़ा ईकनुम बरचस।

⁵⁵ तहाँ आर ती जोक्‍कोर चाली मझी नू चिच्‍ची ओद्दर ती असन ख़ॊंड़रर ती उक्‍कियर। आर ही गने पतरस हूँ उक्‍कियस।

⁵⁶ तहाँ ओन्‍टा जॊंख़ पेल्‍लो पतरसी उक्‍कन चिच्‍ची ही बिल्‍ली ती ईरिया। अरा आसिन थिथवाँ ईरिया ती बाचा, “ई आलस हूँ आसी गने रहचस।”

⁵⁷ ख़ने पतरस नटचस ती बाचस, “अनय कुकेय, ऎन आसिन बलदन।”

⁵⁸ अरा एगघड़ी ख़ॊख़ा नन्ना ओर्तस आसिन ईरियस ती बाचस, “नीन हूँ आर ही मदहे ता हिकदय।” ख़ने आस बाचस, “अना आलायो, ऎन आर ही मदहे ता मलदन।”

⁵⁹ ओन घंटा केम ख़ॊख़ा अउर ओन्‍टा आलस ढिट्ठ लगे ब'आलियस, “ईस गा गलिलेया जिला ता हिकदस ख़ने मानिम ईस हूँ आस गने रहचस।”

⁶⁰ ख़ने पतरस बाचस, “अना आलायो, ऎन बलदन का नीन एन्‍देर ब'आलदय?” अरा आस एन्ने ब'आलियस ख़नेम ख़ॆर चींख़िया।

⁶¹ अरा येसुस पतरसिन किर्रे ईरियस। ख़ने पतरस गे उर्बासी कत्‍था सुरता बरचा का, “इन्नम ख़ॆर चींख़ना ती मुन्‍द नीन एंगन तीन हॆल बलदन ब'ओय।”

⁶² अरा आस चाली ती बहरी उरखस ती भोकरार भोकरार चींख़यस।

⁶³ अक्‍कु एका सैनर येसुसिन धरचर आर येसुसिन लज्‍जे मॊख़तालियर अरा लौ'आ पस्‍स'आ लगियर।

⁶⁴ आर आसी ख़न्नन मुढ़चर ती मेंजर, “मुन्‍द तेंगना ती ब'आ का निंगन नॆ लौचा?”

⁶⁵ अरा आर नगदे भेंसड़'अना कत्‍था गुट्ठिन हूँ आसी बिड़दो नू ब'आलियर।

येसुस कोहाँ सभा ही मुन्‍द

⁶⁶ बिज्‍जया ख़ने सभा ही पचगी मुद्धर अरा मुध नैगर अरा नॆग सिखाब‍'उर ख़ॊंड़रर। आर येसुसिन तम्‍है कोहाँ सभा नू ओन्‍द्रर ती मेंजर।

⁶⁷ “नीन मसी हिकदय होले एमन ब'आ चि'आ।” ख़ने आस बाचस, “निमन ऎन ब'ओन होले हूँ नीम मल पत्त'ओर,

⁶⁸ अरा निमन ऎन मेनोन होले हूँ नीम आना मल किर्त‍'ओर।

⁶⁹ अक्‍कु ती गा मनवा ख़द्दन ऎन उर्मी सवंगिय धर्मेसी तीना चोक्‍ख उक्‍का ती राजी ननोन।”

⁷⁰ तहाँ आर ओर्मर बाचर, “होले नीन धर्मेसी ख़द्दय हिकदय का?” ख़ने आस बाचस, “नीमिम ब'आलदर का ऎन हिकदन।”

⁷¹ ख़ने आर बाचर, “नमा गे अउरिम गोवाह ही चाड़ मलकी, नामिम गा आसी ब‍ई तिम मेंजकत।”