लू‍कस 19 - पुना गच्छरना NT (BSI)

ऊज'ऊ जक्‍क'ईस

¹ येसुस येरिहॊ नू कोरचस ती काला लगियस।

² असन जक्‍कई नामे ओर्त आलस रहचस। आस मुध ऊज'उस अरा उरुब रहचस।

³ आस येसुसिन नॆ ब'अरकी ऎरा बिद्दियस। लिकिन आस पुड्डा रहचका चड्डे गोंहड़ा ती ऎरा पोल्‍ला लगियस।

⁴ ख़ने आस मुन्‍द बोंगस अरा आसिन ऎरा गे ओन्‍टा डुम्‍बारी मन्न नू अरगियस। एन्‍देरगेका येसुस आ डहरे नू काना रहचा।

⁵ अरा येसुस आ अड्डा अंड़सियस ख़ने, मॆन ईरियस ती आसिन बाचस, “अना जक्‍कई, लॆम एत्ता बरा, इन्ना एंगा गे निंग्‍है एड़पा नू र'अना र'ई।”

⁶ ख़ने आस लॆम इत्तियस ती रिझ गने आसिन तंग्‍है एड़पा होच्‍चस।

⁷ ख़ने ओर्मर इदन ईरियर ती टुरपुसर'आ हेलरर का ईस पपहस गुसन पाही कोरचस।

⁸ जक्‍कईस उर्बासी मुन्‍द इज्‍जस ती बाचस, “अना उर्बायो! ऎन एंग्‍है ओन भाग खुर्जिन किड़र गे चि'ओन, अरा नेखैन नेंव‍ई ती बिड़दो होच्‍चकादन होले, आर गे चार गुना किर्रत'ओन चि'ओन।”

⁹ ख़ने येसुस आसिन बाचस, “इन्ना ई एड़पा गे नाड़ना बरचा, एन्‍देरगेका ईस हूँ गा अब्राहमसी ख़द्दस र'अदस।

¹⁰ मनवा ख़द्दन ऎन एबस्रकारिन बेद्दा अरा नाड़ा बरचकादन।”

तीन जॊंख़र ही जोक्‍खा ख़ीरी

¹¹ आलर इबड़ा कत्‍थन मेना लगियर ख़ने, येसुस ओन्‍टा जोक्‍खा ख़ीरी तिंगियस। एन्‍देरगेका आस येरुसलॆम हेद्दे रहचस अरा आर सोच'आ लगियर का धर्मेसी राजी लॆम दहदर मन्ना र'ई।

¹² आस बाचस, “ओन्‍टा उर्बस तंगा गे बॆल अदिया ख़क्‍खा ती फिन किर्रा गे गेच्‍छा राजी केरस।

¹³ आस काना ती मुन्‍द तंग्‍है दस जॊंख़ारिन मीख़ियस अरा आर गे दस गोटंग मोहोर चिच्‍चस ती बाचस, ‘एंग्‍है किर्ना गूटी ख़ेन्‍दके पिटके।’

¹⁴ लिकिन आसी नगरे ता आलर आसिन हींड़'आ लगियर। अरा एन्ने ब'अरकी आसी ख़ॊख़ा ओन्‍टा पैकारिन त‍इय्यर का ईसिन एम्‍है बॆल उइय्या गे एमा मने मलकी।

¹⁵ लिकिन आस बॆल अदिया ख़क्‍खियस ती किर्रियस। ख़ने आस तंग्‍है जॊंख़ारिन मॆख़ा गे आनियस नॆ तंग्‍है ती मोहोर ख़क्‍खर। इदगे का आस अख़'आ ओंग्‍दस का आर ऎ बग्‍गे अदिन ती अर्जाचर।

¹⁶ ख़ने मुन्‍दतस बरचस ती बाचस, ‘अना उर्बायो। निंग्‍है चिच्का ओन मोहोर ती दस मोहोर अर्जाचकन।’

¹⁷ ख़ने बॆलस आसिन बाचस, ‘बॆस बने! नीन दौ जॊंख़स हिकदय। नीन जुक्‍किम नू पत्त'अना जॊगे रहचकय, ख़ने नीन दस गोटंग नगरे ही उर्बस मना।’

¹⁸ अरा दुसरस बरचस ती बाचस, ‘अना उर्बायो। निंग्‍है चिच्का ओन मोहोर ती पांच गोटंग मोहोर अर्जाचकन।’

¹⁹ ख़ने बॆलस आसिन बाचस, ‘नीन हूँ पांच गोटंग नगरे ही उर्बस मना।’

²⁰ तहाँ तिसरस बरचस ती बाचस, ‘अना उर्बायो, ऎरा, इदिम निंग्‍है मोहोर, इदिन ऎन ओन्‍टा किचरी नू गठिय'अरकी नुड्डका उइय्का रहचकन।

²¹ ऎन गा निंगन एल्‍चा लिक्‍कन, इदगे का नीन खरखर आलय हिकदय, नीन मल ख़ॊंड़च‍कय अदिन हो'अदय अरा मल चाँख़कय अदिन ख़ोयदय।’

²² ख़ने बॆलस आसिन बाचस, ‘अना मलदौ जॊंख़, निंग्‍है कत्‍था तिम ऎन निंगन नेंव‍ई नन्‍दन। नीन एंगन अक्कय का ऎन खरखर आलन हिकदन, ऎन मल ख़ॊंड़च‍कन अदिन हो'अदन अरा मल चाँख़कन अदिन ख़ोयदन।

²³ होले नीन एंग्‍है मोहोरन एन्‍देरगे नहड़ा हो'उर गे मल चिच्‍कय? होले ऎन बर'ओन ती अदिन ख़द गनेम हो'ओन दने।’

²⁴ ख़ने बॆलस हेद्दे इज्‍जका आलारिन बाचस, ‘ई मोहोरन ईसी गुसते हो'आ अरा नॆखा गुसन दस मोहोर र'ई आस गे चि'आ।’

²⁵ अरा आर आसिन बाचर, ‘अना उर्बायो, आसी गुसन गा दस गोटंग मोहोर र'ई।’

²⁶ बॆलस बाचस, ‘ऎन निमन ब'अदन का नॆखा गुसन र'ई आर गे चीर'ओ, अरा नॆखा गुसन मल्‍ला आसी ती र'ई अदिन हूँ होतारो।

²⁷ लिकिन एंग्‍है अबड़ा बैरीरिन नॆ तम्‍है म‍इय्‍याँ ऎन राजी नना गे मल बिद्दियर, आरिन एंग्‍है मुन्‍दहारे ओन्‍द्र'आ ती पिटा।’”

येसुस येरुसलॆम नू बॆलस लेक्‍खा कोरदस

²⁸ इबड़ा कत्‍थन बाचस ती येसुस येरुसलॆम तरा काला हेलरस।

²⁹ अरा आस जैतून नामे परता हेद्दे बॆतफगे अरा बेतानिया पद्द गुट्ठी हेद्दे बरचस। ख़ने तंग्‍है चेलर ती इरिबारिन एन्ने बाचस ती त‍इय्यस।

³⁰ “निम्‍है मुन्‍दहारे ता पद्दा नू कला, अरा नीम अइय्या कोरना गनेम ओन्टा गदहा ख़द्दन खुटुरका ख़क्‍खोर, अइय्या नॆ हूँ इकला हूँ मल अरगकी र'ई, अदिन बिछर'आ ती ओन्‍द्र'आ।

³¹ नेक‍ईम इदन एन्‍देर नना गे बिछरदर ब'ओर होले, ब'अके, उर्बस गे इदही चाड़ र'ई।”

³² त‍इरका आलर केरर अरा एकासे येसुस आरिन बाचस अन्नेम ख़क्‍खियर।

³³ अरा आर गदहा ख़द्दन बिछर'आलियर, ख़ने अदही उर्बर आरिन मेंजर, “नीम ख़द्दन एन्‍देरगे बिछरदर?”

³⁴ आर बाचर, “उर्बा येसुस गे इदही चाड़ र'ई।”

³⁵ आर अदिन येसुस गुसन ओन्‍द्रर, अरा तम्‍है किचरी गुट्ठिन गदही ख़द्द म‍इय्याँ झपचर अरा येसुसिन अइय्या ओकताचर।

³⁶ आस एकासे एकासे मुन्‍दहारे काला लगियस ख़ने आलर तम्‍है किचरिन डहरे नू अट्टनुम केरर।

³⁷ आस जैतून परता ही दलखा हेद्दे अंड़सियस ख़ने चेलर ही गोट्टा गोंहड़ा आर ईरका आसी जम्मा सवंग ही नलख गुट्ठी चड्डे खुसमारर अरा जॊर चिच्चि‍यारर ती धर्मेसी ओहमा नना हेलरर।

³⁸ अरा बाचर, “आ बॆलासिन धर्मेस आसीस चि'ओस एकास उर्बासी नामे ती बरदस। अक्‍कु धर्मेस अरा आलर ही मझी नू सान्‍ति अरा उर्मी ती कोहाँ धर्मेस गे ओहमा मनन नेकअन।”

³⁹ अरा गोंहड़ा नू जोक्‍क फरिसीर रहचर। आर येसुसिन बाचर, “अना गुरु! निंग्‍है चेलर ही चिच्चि‍यारनन छेक'आ।”

⁴⁰ येसुस आनाकिर्ताचस, “ऎन निमन ब'अदन, ईर ठकर'ओर होले पखना चिच्चि‍यार'आ हेलर'ओ।”

येसुस येरुसलॆम गे चींख़ालदस

⁴¹ एकाबारी येसुस येरुसलॆम हेद्दे अंड़सियस ख़ने, नगरेन ईरियस ती चींख़ियस।

⁴² अरा बाचस, “निंग्‍है ख़क्ख्रका ई उल्‍ला नू गा नीन निंग्‍है सान्‍ति ही कत्‍थन अख़'ओय होले दौ मनो दने। लिकिन अक्‍कु इबड़ा निंग्‍है ख़न्न ती नूख़्रकी र'ई।

⁴³ निंग्‍है म‍इय्याँ एन्ने उल्‍ला बर'ओ का निंग्‍है बैरिर निंगन ओनबेंड़र'आ घेर'ओर ती मझि'ओर, अरा ओर्मा तरती निंगन चिप'ओर।

⁴⁴ अरा आर निंगन अरा निंग्‍है उर्मी आलारिन नठाब'ओर, अरा निंग्‍है नू ओन्‍टा पखना म‍इय्याँ ओन्‍टा पखना र'आ गे मल चि'ओर, एन्‍देरगेका नीन निंग्‍है गुसन धर्मेस बरना ही बेड़न मल चिन्‍हचकी।”

येरुसलॆम मन्‍दिर नू येसुस

⁴⁵ तहाँ येसुस धर्मेसी मन्दिर ही चाली नू कोरचस ती अइय्या ता ख़ीन्दू पिटुरिन ओथ्र'आ हेलरस।

⁴⁶ अरा आरिन बाचस, “नेम्हा पुथी नू लिख्रकी र'ई, ‘एंग्‍है एड़पा गोहरारना ही एड़पा मनो।’ लिकिन नीम अदिन डाकुर ही मड़ा कमचकादर।”

⁴⁷ येसुस उल्‍ला उल्‍ला नू धर्मेसी मन्दिर ही चाली नू सिखाब'आ लगियस। अरा मुध नैगर अरा नॆग सिखाब'उर अरा आलर ही जोक्‍क मुद्धर आसिन पिटा गे मोका बेद्दा लगियर।

⁴⁸ लिकिन एन्‍देर उपाय हूँ नना पोल्‍लर का एन्ने एकासे ननोम, एन्‍देरगेका ओर्मा आलर आसहीन मेना लक्‍का रहचर।