लू‍कस 18 - पुना गच्छरना NT (BSI)

नेंव‍ई ननुस अरा रड़ियाही ही जोक्‍खा ख़ीरी

¹ येसुस तंग्‍है चेलर गे मल हेन्‍दवारना ती सगरोम गोहरारते र'अना र'ई इदन तेंगा गे ई जोक्‍खा ख़ीरिन तिंगियस।

² “ओन्‍टा पद्दा नू ओर्त नेंव‍ई ननुस रहचस, आस धर्मेसिन गा मल एल्‍चालियस अरा आलारिन हूँ मल गदन'आ लगियस।

³ आ पद्दा नू ओर्त रड़ियाही आली रहचा। आ आली आस गुसन बरच बरच ब'आ लगिया, ‘एंग्‍है अरा एंग्‍है बैरीसी मझी ता नलखन नेंव‍ई नना चि'आ।’

⁴ जोक्‍क उल्‍ला गूटी गा आस अदिन मल मेंजस, लिकिन ख़ॊख़ा तान तानिम बाचस, ‘ऎन धर्मेसिन मल एल्‍चदन अरा आलारिन हूँ मल गदन'अदन।

⁵ अन्नु हूँ ई रड़ियाही आली एंग्‍है गुसन रेंघ'ई, अदगे ऎन अदिन नेंव‍ई ननोन, होले आद घड़ी घड़ी बर'ओ ती एंगन अम्‍बन ख़ड़द'आ।’”

⁶ उर्बस बाचस, “मेना ई मलदौ नेंव‍ई ननुस एन्‍देर बाचस?

⁷ होले एन्‍देर धर्मेस तंग्‍है चज्जिका आलारिन नॆ उल्‍ला माख़ा आसिन गोहरारते र'अनर आर गे नेंव‍ई तिजाम मल ननोस का? एन्‍देर आस आर ही पत्त नू दिरी ननोस का?

⁸ ऎन निमन ब'अदन, आस लॆम आरिन नेंव‍ई ननोस। अन्नु हूँ मनवा ख़द्दन ऎन इकला फिन बर'ओन, आ बारी ख़ॆख़ेल नू एंगन पत्त'ऊ आलारिन ख़क्‍खोन का?”

फरिसीस अरा ऊज'उसी जोक्‍खा ख़ीरी

⁹ फिन येसुस नॆ तमन उजगो मननर ती नन्नारिन ख़ाँड़नर आर ही पत्त नू ई जोक्‍खा ख़ीरिन तिंगियस।

¹⁰ “ऎंड़ आलर धर्मेसी मन्दिर नू गोहरार'आ केरर। ओर्तोस फरिसीस अरा नन्नस ऊज'उस रहचस।

¹¹ फरिसीस गा इज्‍जस ती एन्ने गोहरारस, ‘अना धर्मे, ऎन निंगन धन्‍यवाद नन्‍दन का ऎन नन्ना आलर लेक्‍खा ख़ड़'ऊ, अरा मलदौ ननू अरा भडुवा मलदन महले ई ऊज'उस लेक्‍खा हूँ मलदन।

¹² ऎन हप्‍ता नू दुई हॆल उपास नन्‍दन, अरा ऎन एंग्‍है उर्मी अर्जाचका ही दसमांस हूँ चि'अदन।’

¹³ लिकिन ऊज'उस गेच्‍छम इज्‍जस ती मेर्ख़ा तरा मॆन ऎरा हूँ मल बिद्दियस, अन्‍ति तंग्‍है एवंख़न ठोकोर ठोकोर बाचस, ‘अना धर्मे! ऎन पपहा आलन म‍इय्याँ सोग्‍गे ऎरा।’

¹⁴ ऎन निमन ब'अदन, हूस मला ईस धर्मेसी ऎरना नू उजगो मनरकी एड़पा केरस। एन्‍देरगेका नॆ तंगन कोहाँ नन्‍दस आस सन्नी मन्‍तार'ओस। अरा नॆ तंगन सन्नी कम'ई आस कोहाँ मनतार'ओस।”

येसुस ख़द्दारिन बरकत नन्‍दस

¹⁵ उन्‍दुल जोक्‍क आलर ख़द्दारिन येसुस गुसन ओन्‍द्रर का आस ख़द्दर ही म‍इय्‍याँ तंग्‍है ख़ेक्खा उइयरकी आसीस ननोस। लिकिन चेलर इदन ईरियर ती येसुसिन अम्‍बोर थोकबोकामब'आ ब'अरकी आरिन केप्‍पर।

¹⁶ लिकिन येसुस ख़द्दारिन तंग्‍है गुसन मीख़ियस ती बाचस, “ख़द्दारिन एंग्‍है गुसन बर'आ चि'आ, आरिन अमा छेक'आ, एन्‍देरगेका नॆ इबड़ा ख़द्दर लेक्‍खा तमन किइय्‍या ननोर आरिन धर्मेस राजी ननोस।

¹⁷ ऎन निमन ओन्‍टा मानिम कत्‍था ब'अदन, एकासे ख़द्दर अयंग बंगर गे सोंपरनर, अन्नेम एका ओर्तर धर्मेस गे सोंपरनर आरिन दिम धर्मेस राजी ननोस।”

उरुब आलस अरा जनमजुग ही उज्‍जना

¹⁸ ओंग्‍होल ओर्त मुद्धस येसुसिन मेंजस, “अना गुरु, नीन दौ आलय हिकदय, एंगा धर्मेस गने जनमजुग ही उज्‍जना ख़क्‍खा गे एन्‍देर नन्‍ना मनो?”

¹⁹ ख़ने येसुस आसिन बाचस, “नीन एंगन बॆस एन्‍देरगे ब'अदय?, धर्मेसिन अम्‍बरकी नॆ हूँ बॆस मलकर। नीन सोचदय का ऎन धर्मे हिकदन?

²⁰ आलारिन अमके पिटा, नन्ना आली गुसन अमके काला, अमके ख़ड़'आ, बेगर नू अमके ब'आ, निंग्‍है अयंग बंगन म‍ईन नना, धर्मेसी इबड़ा पॆसकन नीन अख़दय।”

²¹ ख़ने आस बाचस, “ऎन गा इबड़ा उर्मी पॆसकन ख़द्दपरिया ती मन'आ लगदन।”

²² इदन मेंजस ती येसुस आसिन बाचस, “अन्नु हूँ नीन अक्‍कुन गूटी ओन्‍टा कत्‍थन मल नंजकादय, नीन निंग्‍है उर्मी खुर्जिन बीसरकी कीड़र गे ख़ट्टा चि'आ। फिन बरा अरा एंग्‍है गने चॊंख़्र'आ। होले निंगा मेर्ख़ा नू इनाम ख़क्ख्र'ओ।”

²³ आस इदन मेंजस ख़ने नगदे हेन्‍दवारस, एन्‍देरगेका आस नगदे उरुब रहचस।

²⁴ येसुस आसिन ईरियस ती बाचस, “नॆ नगदे खुर्जी उइय्‍दस आसिन धर्मेस गे राजी नना अजम सस‍इत मनो।

²⁵ एका ओर्तस तंग्‍है खुर्जी म‍इय्याँ भरसा उइय्‍दस आसिन धर्मेस राजी नन्‍ना ती ओन्‍टा ऊँट सुजी ही भों‍का नू तुरदना सेब्‍बा र'ई।”

²⁶ ख़ने इदन मिनू आलर बाचर, “होले नॆ बछर'आ ओंगोर?”

²⁷ आस आरिन बाचस, “आलर ती गा ईद मना पुल्ली, लिकिन धर्मेस ती ईद मनो दिम।”

²⁸ ख़ने पतरस बाचस, “ऎरा, ऎम निंग्‍है चेला मन्ना चड्डे एंग्‍है उर्मिन अम्‍बकम।”

²⁹ आस आरिन बाचस, “ऎन निमन मानिम ब'अदन, एका ओर्तस धर्मेस आलारिन राजी नना गे तंग्‍है एड़पा पलिन महले तंग्‍आलिन महले तंग्‍है भ‍इय्योरिन महले तंग्‍है अयंग बंगारिन महले तंग्‍है ख़द्द-ख़र्रान अम्‍बका चिच्का र'अनर।

³⁰ आर ई जुग नू क‍इय्यों गुना ख़क्‍खोर, अरा बरना जुग नू धर्मेस गने जनमजुग ही उज्‍जनन ख़क्‍खोर।”

तंग्‍है खे'अना ही पत्त नू येसुसी पारेंडमूद मुन्‍द तेंगना

³¹ तहाँ येसुस बारो चेलारिन तंग्‍है गुसन मीख़ियस ती बाचस, “ऎरा, नाम येरुसलॆम कादत, अरा एवंदा कत्‍था मनवा ख़द्दन एंगा पत्त नू धर्मेसी कत्‍था तिंगुर ती लिख्रकी र'ई अबड़ा जम्मा मनो।

³² एन्‍देरगेका नॆ यहूदी मलकर आर ही ख़ेक्खा नू ऎन सोंपतार'ओन क'ओन। अरा आर एंगन लज्‍जे मॊख़त'ओर अरा हींड़ोर, अरा एंग्‍है म‍इय्याँ तुप्‍पोर।

³³ अरा एंगन कोर्रा ती ल'ओर अरा पिटोर। अरा तिसर उल्‍ला ऎन उज्‍जा चो'ओन।”

³⁴ लिकिन आर इबड़ा कत्‍था गुट्ठिन ओन्‍टा हूँ मल बुझ्रर, अरा इबड़ा कत्‍था आर ती नुख़्रकी रहचा। अरा एन्‍देर बातारकी रहचा अबड़ा ही मनेन आर अख़‍अम बल्‍लर।

येसुस अन्धहा तिम्‍बुसिन कोड़े नन्‍दस

³⁵ येसुस येरिहॊ नगरे हेद्दे अंड़सियस ख़ने, असन ओर्त अन्‍धहस सड़क हेद्दे ओक्‍करकी तेम्‍बा लगियस।

³⁶ आस गोंहड़ा ही ऎकना ही अरोन ख़क्‍खियस ख़ने आलारिन मेंजस, “ईद एन्‍देर मना लगी?”

³⁷ अबड़र आसिन तिंगियर, “नासरेत ता येसुस कट्टालदस।”

³⁸ ख़ने आस चिच्चि‍यारस ती बाचस, “अना येसु! दाऊदसी ख़द्दायो! एंगन सोग्‍गे ऎरा।”

³⁹ गोंहड़ा ही मुन्‍द र'ऊ आलर आसिन दन्‍दकाचर ती बाचर, “कलेकसे र'आ।” लिकिन आस अउरिम चिच्चि‍यारस, “अना दाऊदसी ख़द्दायो! एंगन सोग्‍गे ऎरा।”

⁴⁰ ख़ने येसुस इज्‍जस ती आनियस, “आसिन एंग्‍है गुसन ओन्‍द्र'आ।” अरा आस हेद्दे बरचस। ख़ने येसुस आसिन मेंजस,

⁴¹ “नीन एन्‍देर बेद्ददय का निंगा गे ऎन ननोन?” आस बाचस, “अना उर्बायो, ऎन ऎरा बेद्ददन।”

⁴² येसुस आसिन बाचस, “ऎरा हो'आ, नीन उजगारकय एन्‍देरगेका नीन एंगन पत्ताचकय।”

⁴³ अरा आस आ बारिम ऎरा उंगियस, अरा धर्मेसी ओहमा नन्नुम येसुसी ख़ॊख़ा चॊंख़्रस। अरा ओर्मर इदन ईरियर ती धर्मेसी ओहमा नंजर।