लू‍कस 13 - पुना गच्छरना NT (BSI)

पाप नन्नन अम्‍बना र'ई

¹ आ बेड़ा नू जोक्‍क आलर असन रहचर, आर येसुसिन तिंगियर का राजी ख़ापू पिलातुस जोक्‍क गलिलेया ता आलारिन पिटियस ती आर ही ख़ॆंसन तम्है दाँड़े ही ख़ॆंस नू मेसा बाचस।

² ख़ने येसुस आरिन आनाकिर्ताचस, “नीम एन्‍देर सोचदर, इबड़ा गलिलेयर नन्ना गलिलेयर ती बग्‍गे पपहा रहचर का आर म‍इय्याँ एन्ने खिलपत मंजा?

³ ऎन निमन ब'अदन, एन्ने मला, लिकिन नीम जियन मल किर्त'ओर होले नीम ओर्मर एन्नेम नास मनोर।

⁴ एन्नेम नीम एन्ने सोचदर का सिलॊवम ता गुम्मट अठारा आलर म‍इय्याँ खत्तरा ती आरिन पिटिया, ईर येरुसलॆम नू र'ऊ ओर्मा आलर ती बग्‍गे पपहा रहचर का?

⁵ ऎन निमन ब'अदन, एन्ने मला, लिकिन नीम जियन मल किर्त'ओर होले नीम ओर्मर एन्नेम नास मनोर।”

अंजीर मन्न ही जोक्‍खा ख़ीरी

⁶ तहाँ येसुस ओन्‍टा जोक्‍खा ख़ीरी तिंगियस, “ओर्त आलस तंग्‍है अंगुर बटकी नू ओन्‍टा अंजीर मन्न इद्रकी रहचा। आस अइय्या ख़ंजपा बेद्दा उर्मी चानुम बरचस, लिकिन मल ख़क्‍खियस।

⁷ ख़ने आस बटकी ख़ापुसिन बाचस, ‘ऎरा, ऎन तीन बछर ती इय्या ई अंजीर मन्न ही ख़ंजपा बेद्दा बरदन लिकिन मल ख़क्‍खदन। अदिन खंडा चि'आ, एन्‍देरगे आद अड्डन छेकचकी र'ई?’

⁸ ख़ने जॊंख़स आसिन आनाकिर्ताचस, ‘अना उर्बायो, ई मन्नन इदना ख़ॊन्‍द र'आ चि'आ, ऎन इदही ओनबेंड़र'आ अरख़ोन अरा सारे ननोन।

⁹ अरा मुन्‍द चान ख़ंज'ओ होले दौ हिके, मला होले खंडके चि'अके।’”

येसुस ख़न्न ऎख़ना उल्‍ला नू कोड़े नन्‍दस

¹⁰ येसुस ओन्‍टा ख़न्न ऎख़ना उल्‍ला नू ओन्‍टा गोड़हा एड़पा नू सिखाब'आलियस।

¹¹ अरा ओन्‍टा मुक्‍का अइय्या रहचा। आद पयहा ननू मलदौ बॊलता ती अठारा चाँन ख़ड़दकी रहचा। अरा आद कुबरी मंजकी रहचा, अरा एकन्ने ती हूँ सोज मना पोल्‍ला लगिया।

¹² येसुस अदिन ईरयस ती मीख़ियस अरा अदिन बाचस, “अनय आली, नीन निंग्‍है रोगे ती उजगार'अय।”

¹³ अरा आस अदही म‍इय्याँ तंग्‍है ख़ेक्खा उइय्यस, ख़ने आद लेथेम उजगारा केरा, अरा धर्मेसी ओहमा नना हेलरा।

¹⁴ लिकिन गोड़हा एड़पा ता मुद्धस जंगारस केरस, एन्‍देरगेका येसुस ख़न्न ऎख़ना उल्‍ला नू उजगाचस। अरा आस आलारिन बाचस, “हपता नू नलख नना गे छै उल्‍ला र'ई, अबड़ा उल्‍ला नू बरा ती कोड़े नना, लिकिन ख़न्न ऎख़ना उल्‍ला नू मला।”

¹⁵ ख़ने उर्बस आसिन बाचस, “अना उतुरमाड़ू आलारो, निम्‍है ती ओर्मर ख़न्न ऎख़ना उल्‍ला नू अड्डोन महले गदहान गोयसाली ती बिछरदर ती अम्‍मु ओन्‍त'आ गे मल हो'अदर का?

¹⁶ ई आलिन ऎन कोड़े नंजकन आद अब्राहमसी तंग्‍दा हवे आद गा मेक्‍खो मल्‍ली। एकदन सैतान अठारा बछर ती धरचकी रहचा। इदिन ख़न्न ऎख़ना उल्‍ला नू हूँ कोड़े नन्ना दौ दिम र'ई।”

¹⁷ एकाबारी येसुस ई कत्‍थन बा'आलियस ख़ने आसी बिड़दोर लज्‍जरर केरर। अरा उर्मी आलर आसी नंजका महबा ही नलख ती खुसमारर।

मनी बी अरा बिदगी ही जोक्‍खा ख़ीरी

¹⁸ तहाँ येसुस बाचस, “धर्मेसी राजी नू बग्‍गे आलर बढरना एन्‍देर लेक्‍खा र'ई, अरा अदिन ऎन एन्‍देर गने जोक्‍ख'ओन?

¹⁹ आद राई बिहनी लेक्‍खा र'ई। अदिन ओर्त आलस होच्‍चस ती तंग्‍है बटकी नू चाँख़स। अरा आद परदिया ती कोहाँ मन्न मंजा, अरा मेर्ख़ा ता ऒड़ा गुट्ठी अदही डाड़ा नू खोता अट्टिया।”

²⁰ फिन आस बाचस, “ऎन ब'ओन का धर्मेसी राजी एकासे गोट्टा ख़ॆख़ेल नू बींड़र'ओ।

²¹ आद बिदगी लेक्‍खा र'ई। ओर्त आली अदिन कटी गुना होच्‍चा ती तीन तामी गुंडा नू लिंडया, ई लेक्‍खा आद उर्मी तिस्‍सा मंजा केरा।”

सक्‍कुड़ बली

²² येसुस नगरे नगरे अरा पद्दा पद्दा सिखाब'अनुम येरुसलॆम तरा कालालियस।

²³ ओर्तोस आसिन मेंजस, “अना उर्बायो, जुक्‍किम आलर लेका लाड़र'ओर का?” ख़ने आस आरिन बाचस,

²⁴ “हाँ, औंगे सकुड़ बली ती मेर्ख़ा कोर'आ गे चिहुट नना, ऎन निमन ब'अदन, बग्‍गे आलर गा कोर'आ बेद्दोर, लिकिन कोर'आ पोल्‍लोर।

²⁵ एकाबारी एड़पा ता उर्बस चो'अदस ती बलिन मुच्‍चदस। ख़ने नीम बहरी इज्‍जदर ती एन्‍ने ब'अनुम बलिन ठोक ठोकम ब'अदर ‘अना उर्बायो, एमा गे बलिन तिसग'आ।’ आस निमन आना किर्त'ओस, ‘ऎन निमन बलदन एसला हिकदर?’

²⁶ होले नीम ब'आ हेलर'ओर, ‘ऎम निंग्‍है संगे संगे ओं‍डकम मोक्‍कम, अरा नीन एम्‍है गली नू एमन सिखाबाचकय।’

²⁷ लिकिन आस आना किर्त'ओस, ‘ऎन निमन ब'अदन, ऎन निमन बलदन नीम एसते बरचकर। मलदौ नलख ननू आलारो, नीम एंग्‍है गुसते बोंगा।’

²⁸ आ बारी नीम अब्राहम अरा इसाक अरा याकॊबस अरा ओर्मा धर्मेसी कत्‍था तिंगुरिन गेच्‍छा धर्मेसी राजी नू उक्‍का ऎरोर अरा निमन गा ओथ्रका ऎरोर। आ बारी अइय्या निमा गे चींख़ना अरा पल्‍ल चबर्ना मनो।

²⁹ अरा नन-यहूदी आलर पुरुब अरा पच्‍छिम अरा दखिन अरा उत्तर तरती बर'ओर अरा धर्मेसी राजी ही मदी नू ओक्‍कोर।

³⁰ अरा ऎरा, नॆ अक्‍कु किइय्या पद नू र'अनर आर आ बारी नू कोहाँ पद नू नन्‍तार'ओर, अरा नॆ अक्‍कु कोहाँ पद नू र'अनर आर आ बारी नू किइय्या पद नू नन्‍तार'ओर।”

येसुस येरुसलॆम गे दुक्‍खे मन्ना

³¹ आ बारिम जोक्‍क फरिसीर बरचर ती येसुसिन बाचर, “इय्या ती उरखा ती किर्रिमबि'आ, एन्‍देरगेका हॆरॊदॆस अन्‍टिपास निंगन पिटा बेद्ददस।”

³² आस आरिन बाचस, “कला ‍अरा आ सिकटासिन ब'आ। ऎरा, ऎन इन्ना दरा नॆला नाद गुट्ठिन ओथ्रदन अरा बेमरहारिन कोड़े नन्‍दन, अरा तिसर उल्‍ला नू एंग्‍है तिगिचका नलखन मुंज'ओन।

³³ इन्ना नॆला अरा नेलबेंजा येरुसलॆम नू एंगा कुद्दना र'ई। लिकिन ख़ॊख़ा ऎन पिटतार'ओन, एन्‍देरगेका ईद एन्ने मना पुल्ली का ऎन अरा एकअम धर्मेसी कत्‍था तिंगुस येरुसलॆम ती बहरी पिटतार'ओस।

³⁴ अना येरुसलॆम ता आलारो, नीम धर्मेसी कत्‍था तिंगुरिन पिटकर अरा नॆकन धर्मेस निम्है गुसन त‍इय्यस आरिन पखना ल'अदर ती पिटदर। ख़ॆर तंग्‍है ख़द्दन डेना किइय्या ख़िवड़'ई, अन्नेम धर्मेस हूँ ढ़ॆर हॆल निम्है ख़द्दारिन ख़ेवड़'आ बिद्दियस, लिकिन नीम एन्ने नना मल चिच्‍चकर।

³⁵ इदन मेना, निम्‍है एड़पा निमा उझड़ारका अम्‍बतार'ई। अरा ऎन निमन ब'अदन, ‘नॆ उर्बासी आकुस ती बरदस आस आसीस ख़क्‍खू र'अदस’ एन्ने नीम एंग्‍है पत्त नू अरगी ब'अना बेड़ा गूटी नीम एंगन मल ऎरोर।”