यॊहनस 19 - पुना गच्छरना NT (BSI)

येसुसिन पिटा गे पॆसका चि'अना

¹ फेन पिलातुस येसुसिन हो'अरकी कोर्रा लौताचस।

² अरा सैनर अच्‍चोन बिन्‍डो लेक्‍खा मोड़चर ती आसी कुक्‍कु नू अत्ताचर अरा आसिन भेटांगो ऎख़र'आ किचरी अत्ताचर।

³ अरा आसी गुसन बर'आ लगियर ती ब'आ लगियर, “अना यहूदीर ही बॆलायो जोहार!” अरा आसिन थपड़'आ लगियर।

⁴ पिलातुस अउरिम गढ़िया ती बहरी बरचस ती आरिन बाचस, “ऎरा, ऎन आसिन निम्‍है गुसन ओन्‍द्रदन का, नीम अख़'ओर का ऎन आसी मइय्याँ एन्‍देर बदी हूँ मल ख़क्खकन।”

⁵ ख़ने येसुस अच्‍चो ही मुकुट अरा भेटांगो ऎख़र'आ किचरिन अत्तियस ती बहरी बरचस। अरा पिलातुस बाचस, “ऎरा, ईस आ आलस!”

⁶ मुध नैगर अरा धर्मेसी मन्दिर ख़ापू सैनर आसिन ईरियर ख़ने, आर चिच्चियारनुम बाचर, “ईसिन क्रुस नू ठोक'आ, ईसिन क्रुस नू ठोक'आ।” ख़ने पिलातुस आरिन बाचस, “नीमिम ईसिन हो'आ ती क्रुस नू ठोक'आ। लिकिन ऎन गा ईसी मइय्याँ एन्‍द्रा हूँ बदी मल ख़क्‍खदन।”

⁷ ख़ने यहूदीर आसिन आनाकिर्ताचर, “एमा गे नॆग र'ई, अरा आ नॆग ही लेक्‍खा ईस पिटना जॊगे र'अस, एन्‍देरगेका ईस तंगन धर्मेसी ख़द्दस ब'अदस।”

⁸ पिलातुस इदिन मेंजस ख़ने, अउर कोड़हे इल्‍चियस केरस।

⁹ अरा आस येसुसिन होच्‍चस ती अउरिम गढ़िया भितरी कोरचस ती येसुसिन मेंजस, “नीन एस्‍तेक बरचका र'अदय?” लिकिन येसुस एन्‍देर हूँ मल आनाकिर्ताचस।

¹⁰ ख़ने पिलातुस आसिन बाचस, “एन्‍देरगे नीन एंग्‍है गने मल कछनख्रदय? नीन बलदय का एंगा निंगन अम्‍बा गे हूँ अरा क्रुस नू ठोक'आ गे हूँ अदिया र'ई?”

¹¹ येसुस आनाकिर्ताचस, “निंगा गे धर्मेस ती अदिया मल चीरका होले, निंगा एंग्‍है नू एन्‍द्रा हूँ अदिया मल र'ओ दने। औंगे नॆ एंगन निंग्‍है ख़ेक्खा नू सोंपचस, आस कोड़हे पाप ही बदी नू र'अदस।”

¹² आ घड़ी ती पिलातुस येसुसिन अम्‍बा गे बिद्दियस। लिकिन यहूदीर चिच्चियार चिच्चियार बाचर, “नीन ईसिन अम्‍बोय होले, नीन कैसरसी संगीस मलदय, नॆ तंगन बॆल ब'अदस, आस कैसरसी बिड़दो नू चो'अदस।”

¹³ पिलातुस इबड़ा कत्‍थन मेंजस ख़ने, येसुसिन बहरी ओन्‍द्रस ती आस नेंवई नन्‍ना गदिया नू उक्‍कियस। आद पखना ती कमचका चौरा नू रहचा, ई चौरा इब्रानी भखा नू “गब्‍बता” बार'ई।

¹⁴ ई उल्‍ला कट्टना परब ही हप्‍ता ही सराजमा नन्‍ना ही उल्‍ला रहचा। अरा ईद मलागूटी लोहाड़ी बारा बजे रहचा। पिलातुस यहूदीरिन बाचस, “ऎरा, इसन निम्‍है बॆलस!”

¹⁵ लिकिन आर गा चिच्चियारर, “ईसिन पिटा चि'आ! ईसिन पिटा चि'आ! ईसिन क्रुस नू ठोक'आ।” पिलातुस आरिन मेंजस, “ऎन निम्‍है बॆलासिन क्रुस नू ठोक'ओन का?” ख़ने मुध नैगर आनाकिर्ताचर, “कैसरसिन अम्‍बरकी एमा गे नन्‍ना बॆलस नॆ हूँ मलकर।”

¹⁶ ख़ने पिलातुस येसुसिन क्रुस नू ठोक'आ गे आर गे सोंप‍चस। ख़ने आर येसुसिन होच्‍‍चर।

येसुसिन क्रुस नू ठोकना

¹⁷ अरा येसुस तंग्‍है क्रुसन तानिम चेड्डस ती “खपरोही अड्डा” बारना अड्डा केरस। अदिन इब्रानी भखा नू “गोलगोता” ब'अनर।

¹⁸ असन आर येसुसिन क्रुस नू ठोकचर। आस गने अउर ऎंड़ आलारिन क्रुस नू ठोकचर, ओर्तोसिन ओन पक्‍खा नू अरा ओर्तोसिन ओन पक्‍खा नू अरा येसुसिन गा मझी नू ठोकचर।

¹⁹ अरा पिलातुस ओन्‍टा दोस चिठी लिखताचस ती क्रुस नू लगाबाताचस। अरा अइय्या एन्ने लिख्रकी रहचा का, “नासरेत ता येसुस यहूदीर ही बॆलस।”

²⁰ ई दोस चिठी इब्रानी, लतीन अरा युनानी भखा नू लिख्रकी रहचा। अरा येसुसिन क्रुस नू ठोकचका अड्डा नगरे ती हेद्देम रहचा, औंगे बग्‍गे यहूदीर ई चिठिन पढ़चर।

²¹ औंगे यहूदी मुध नैगर पिलातुसिन बाचर, “‘यहूदीर ही बॆलस’ एन्ने अमा लिख'आ, लिकिन ‘ईस तंगन यहूदीर ही बॆलस बाचका रहचस’ एन्ने लिख'आ।”

²² लिकिन पिलातुस आनाकिर्ताचस, “ऎन एन्‍देर लिखचकन अदिन लिखिच ख़च्‍चिकन।”

²³ सैनर येसुसिन क्रुस नू ठोकचका ख़ॊख़ा, आर आसी किचरी गुट्ठिन ओर्त ओर्त गे ओन फड़ा नंजर ती चार फड़ा नंजर। अरा आर आसी थालरन हूँ होच्‍चर। लिकिन आद बेगर उज्‍जका किय्या ती मइय्याँ गूटी इस्‍सका रहचा।

²⁴ ख़ने आर ताम ताम कछनख्रर, “नाम इदिन अम्‍बोत चर्रा, लिकिन चिठी टिड़'ओत ती ऎरोत का ईद नॆका ख़क्‍ख्र'ओ।” ईद इदगे मंजा का नेम्‍हा पुथी नू लिख्रकी र'ई आद मनी नेकअन, “आर एंग्‍है किचरी गुट्ठिन तमा नू ख़ट्टरर अरा एंग्‍है किचरी गे चिठी टिड्डर।” औंगे सैनर इबड़न नंजर।

²⁵ येसुसी क्रुस ही हेद्दे येसुसी तंग्‍यो, अरा आसी तंग्‍यो ही तंग्‍ड़ी, अरा क्‍लॊपासी तंग्‍आली मरियम, अरा मगदला पद्दा ता मरियम इज्‍जका रहचर।

²⁶ येसुस तंग्‍योन अरा आस चोन्‍हा नंजका चेलासिन हेद्दे इज्‍जका ईरियस ख़ने, आस तंग्‍योन बाचस, “अनय आली ऎरय, ईस निंग्‍दस।”

²⁷ फेन आस आ चेलासिन बाचस, “ऎरा, ईद निंग्‍यो।” अरा आ बारिम आ चेलस अदिन तंग्‍है जिम्मा होच्‍चस।

येसुसी खे'अना

²⁸ इदही ख़ॊख़ा येसुस अक्‍खस का आस तंग्‍है उर्मी नलखन नंज ख़च्‍चियस। औंगे नेम्‍हा पुथी ता लिख्रका मना गे आस बाचस, “ऎन ओनक'आ र'अदन।”

²⁹ असन तिस्‍सा अंगुर रासी ती निंदका संजगी उइय्‍का रहचा। अइय्या आर तूलिन बोथचर ती हुस्‍सॊप ख़ोप्पा ही डंडा नू पुज्‍जियर ती आसी बई नू चबाबाचर।

³⁰ येसुस तिस्‍सा अंगुर रासिन ख़क्‍खियस ख़ने, आस बाचस, “ईद पूरचकी र'ई।” अरा तंग्‍है कुक्‍कन तुरऊ नंजस ती तंग्‍है जियन बिच्‍छरस।

³¹ ई उल्‍ला सराजमा नन्‍ना उल्‍ला रहचा, अरा नन‍उल्‍ला मुध ख़न्न ऎख़्रना उल्‍ला रहचा। यहूदीर मल बेद्दा लगियर का ख़न्न ऎख़्रना उल्‍ला नू मॆद गुट्ठी क्रुस नू र'ओ। औंगे आर पिलातुस गुसन नॆचर का “अबड़र ही ख़ेड्डे गुट्ठिन एस्‍त'आ चि'आ अरा आर ही मॆद गुट्ठिन एत्त'आ चि'आ।”

³² औंगे सैनर बरचर ती येसुस गने क्रुस नू ठोकचका पहिल आलासी ख़ेड्डे गुट्ठिन एस्‍सर, अरा नन्‍नासिन ख़ेड्डे गुट्ठिन एस्‍सर।

³³ लिकिन आर येसुस गुसन बरचर ती ईरियर ख़ने, आस केचका रहचस। ख़ने आर आसी ख़ेड्डे गुट्ठिन मल एस्‍सर।

³⁴ लिकिन सैनर ती ओर्तोस आसी पंजरन बरछी ती जोबचस, ख़ने लॆम ख़ॆंस अरा अम्मु उरखा।

³⁵ (एकास इदन ईरियस आस गोवाह चि'अदस, अरा आसी गोवाह मानिम र'ई। आस अख़दस का आस मानिम ब'अदस। नीम हूँ पत्त'आ गे दिम आस इदन गोवाह चि'अदस।)

³⁶ “आसी ख़ॊचोल ओन्‍टा हूँ मल एस्‍तार'ओ।” एन्ने नेम्‍हा पुथी नू लिख्रका कत्‍था मना गे इबड़ा मंजा।

³⁷ अउर हूँ, “नॆकन आर बरछी ती जोबचर आसिन आर थिथवाँ ऎरोर” एन्ने नेम्‍हा पुथी नू अउर नन्ना अड्डा नू लिख्रकी र'ई।

येसुसी माड़ना

³⁸ इबड़ा ही ख़ॊख़ा अरिमतिया पद्दा ता यॊसॆफस येसुसी मॆदन हो'आ गे पिलातुस गुसन नॆचस। आस येसुसी चेला रहचस। यहूदीर ही इल्चका ती आस तंगन आसी चेलस एन्ने दहदर मल नंजकाचस। पिलातुस मॆदन हो'आ चिच्‍चस ख़ने, आस बरचस ती येसुसी मॆदन होच्‍चस केरस।

³⁹ निकोदॆमोस हूँ आस गने केरस। ईस गा मुन्‍द ओंग्‍होल माख़ा बारी येसुस गुसन भेंट नना गे केरका रहचस। ईस मलागूटी पैंतीस किलो मेसाबाचका गन्‍धरस अरा मुरभा ओन्‍‍द्रस बरचस।

⁴⁰ आर इरबारिम येसुसी मॆदन एत्ताचर, अरा यहूदीर ही माड़ना ही चाल ही लेक्‍खा महकारना रासी गने दिगहा कफन किचरी ती आसी मॆदन पुज्‍जियर।

⁴¹ येसुसिन क्रुस नू ठोकचका अड्डा हेद्दे ओन्‍टा बगिचा रहचा। अरा आ बगिचा नू ओन्‍टा पुना मसड़ा रहचा, अइय्या इकला हूँ नॆकन हूँ मल उइय्‍का रहचा।

⁴² अरा आर येसुसी मॆदन अइय्यम उइय्यर, एन्‍देरगेका ईद यहूदीर ही ख़न्‍न ऎख़्रना उल्‍ला ही सराजमा ही उल्‍ला रहचा अरा आ मसड़ा हूँ हेद्देम रहचा।