इब्रानी 8 - पुना गच्छरना NT (BSI)येसुस नम्है कोहाँ नैग र'अदस 1 अक्कु एका कत्थन ऎम ब'आ लगदम, अबड़ा कत्था ही मने ईद र'ई का नम्है एन्ने कोहाँ नैगस र'अस, आस महबा ती निन्द्रका धर्मेसी बॆल-गदिया ही तीना चोक्ख उक्कादस। 2 अरा आस असन कोड़हे नेम्हा अड्डा नू सुसर नन्दस। ईदिम महबा नन्ना ही मानिम अड्डा हवे। इदिन आलर मल्ला कमचका लिकिन धर्मेस दिम कमचकादस। 3 उर्मी कोहाँ नैगर दान गुट्ठिन अरा दाँड़े गुट्ठिन अरग'आ गे ओक्तारकानर। ई चड्डे नम्है कोहाँ नैगस गे हूँ इन्द्रिइम अरग'आ गे चाड़ र'ई। 4 आस ख़ॆख़ेल नू रहचका होले, आस नैग मल मनोस दने। एन्देरगेका इसन मूसासी नॆग ही लेक्खा दान गुट्ठिन अरग'ऊ नैगर मुन्द तिम र'अनर। 5 आर मेर्ख़ा नू र'ऊ नेम्हा अड्डा ही रूप नू अरा ऎख़ ही लेक्खा इसन र'ऊ नेम्हा अड्डा नू सुसर नन्नर। मूसस गा नेम्हा कोहाँ कुम्बा कम'आ गे सपड़ारना नू रहचस ख़ने, आस गे धर्मेस ती एन्ने चेताब'अना ख़क्ख्रा का, “ऎरा, एका नमुना निंगा परता नू ऎदका रहचकन अदही लेक्खम उर्मिन कम'आ गे चिहुंक र'आ।” 6 लिकिन अक्कु येसुस गे चितारका नैग नलख अबड़ा नैगर गे चितारका नलख ती कोड़हे कोहाँ नलख र'ई। अन्नेम पच्चा गच्छरना ती येसुस मझी आल मनरकी मंजका पुना गच्छरना बॆस हवे, एकाद धर्मेसी बॆस गच्छरका गुट्ठी ती कम्रकी र'ई। 7 एन्देरगेका मुन्द ता गच्छरना नू दगहा मल मंजका होले, नन्ना गच्छरना ही चाड़ मल मनो दने। 8 लिकिन उर्बस आलर नू दगहन ख़क्खियस ती बाचस, “ऎरा! आ उल्ला अंड़सा लगी का ऎन इस्राऎल अरा यहूदा आलर गने पुना गच्छरनन गच्छर'ओन। 9 ई गच्छरना एन्ने मल र'ओ का एकदन ऎन आर ही पूरखर गने गच्छरका रहचकन, इकला ऎन आर ही ख़ेक्खन धर्चकन ती मिसर राजी ती ओथ्रकन ओन्द्रकन, लिकिन आर एंग्है गच्छरना नू बड़ियर मल रहचर, औंगे ऎन आरिन अम्बकन चिच्कन। 10 उर्बस फिन ब'अदस का, ‘अबड़ा उल्ला ही ख़ॊख़ा ऎन इस्राऎल आलर गने पुना गच्छरनन गच्छर'ओन, आद ईद का, ऎन एंग्है नॆग गुट्ठिन आर ही जिया नू उइय्योन अरा अबड़न आर ही जिया नू लिख'ओन, अरा ऎन आर ही धर्मे मनोन, अरा आर एंग्है आल मनोर। 11 अरा आर तम्है अरबर-परबर अरा पाहियर गे ‘नीन धर्मेसिन चिन्ह'आ’ एन्ने सिखाब'आ गे चाड़ मल र'ओ। एन्देरगेका सन्नीर ती कोहँर गूटी ओर्मर एंगन अख़'ओर हो'ओर। 12 एन्देरगेका ऎन आर ही मलदौ गुट्ठिन अम्बोन चि'ओन अरा आर ही पाप गुट्ठिन फेन कहियों मल सुरत'ओन।’” 13 धर्मेस इदन पुना गच्छरना बाचस। ख़ने आस मुन्द ता गच्छरनन पच्चा नंजकादस। औंगे आद अक्कुन मल बउरारना नू अरा पच्चा मन्ना नू अरा तेभरना काना नू र'ई। |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India