इब्रानी 3 - पुना गच्छरना NT (BSI)

मसीस मूसस ती कोहँस

¹ औंगे मेर्ख़ा नू आसी गने र'आ गे धर्मेसी मॆख़रना नू ख़टर'ऊ नेम्‍हा भ‍ईरो! ‍धर्मेस ती तइरका अरा कोहाँ नैगस येसुसी पत्त नू चिहुंक लगे सोच'आ, आसी पत्त नुम गा ऎम तेंगा लगदम।

² एकासे मूसस धर्मेसी उर्मी आलारिन कड़हाब'अना नू पत्त'अना जॊगे आल रहचस, अन्नेम येसुस हूँ तंगन ओक्‍ताचका धर्मेस नू पत्त'अना जॊगे रहचस।

³ एड़पा ती आ एड़पा आबस कोड़हे म‍ईन जॊगे अख़तारदस। अन्नेम मूसस ती येसुस कोड़हे म‍ईन जॊगे अख़तारदस।

⁴ एन्‍देरगेका उर्मी एड़पा एकअम ओर्त ओर्तर ती कमतार'ई। लिकिन उर्मी जिनिसन कम'उस धर्मेस हिकदस।

⁵ मूसस धर्मेसी आलर नू ओन्‍टा पत्त'अना जॊगे जॊंख़स रहचस। अन्नेम आस बरना उल्‍ला नू दहदर मन्ना ही पत्त नू गोवाह चि'उस रहचस।

⁶ लिकिन मसीस धर्मेसी आलर नू पत्त'अना जॊगे ख़द्दस र'अदस। नाम डिढ नन्ना ती मसीसी मइय्याँ ता नम्‍है असरा नू बड़ियर इज्‍जका र'ओत होले, नाम धर्मेसी आलत हिकदत।

मल पत्त'अना ही बिड़दो ता चेता ब'अना

⁷ औंगे एकन्ने नेम्‍हा बॊलतस ब'अदस, “इन्ना नीम आसी कत्‍थन मेनोर होले,

⁸ निंम्‍है जियन बेड़हा अमा नना, एकासे का निम्‍है पूरखर टुंगरी नू धर्मेसिन बिढ़चर आ बारी आसी बिड़दो नू चॊचर।

⁹ असन निम्‍है पूरखर धर्मेसी खतिर नन्नन बिढ़चर, अन्नु हूँ आर चालीस बछर गूटी आसी अजगुत नलख गुट्ठिन ईरकाचर।

¹⁰ औंगे आस आर ही म‍इय्याँ गोसा मंजस ती बाचस, ‘आर ही मने उर्मी बेड़ा एंग्‍है ती गेच्‍छा र'ई। अरा आर एन्‍देर नना गे ऎन बेद्ददन अदिन मल नन्नर।’

¹¹ औंगे धर्मेस गोसा मंजस ती किरया मोक्‍खस, ‘आर एंग्‍है ख़न्न ऎख़्रना अड्डा नू कहियों मल कोर'ओर।’”

¹² अना भ‍ईरो! नीम चिहुंक र'आ। निम्‍है ती नॆखा हूँ मलदौ अरा मल पत्त'अना ही जिया अम्‍बन मना, एकदा निमन उज्‍जना धर्मेस ती तरकूटी ननो।

¹³ लिकिन एका गूटी “इन्ना” ता उल्‍ला र'ई आ गूटी नीम उर्मी उल्‍ला ओर्त ओर्तारिन रिझाब'आ, होले नॆ हूँ पाप ही फन्‍दा नू बझ्र'ओर ती धर्मेसी बिड़दो नू बेड़हा मल मनोर।

¹⁴ नाम नम्‍है मुन्‍द ता पत्त'अना नू मुंज्रना गूटी बड़ियर इज्‍जका र'ओत होले, नाम ओर्मत मसीसी जम्मा नू सजहा मन्‍दत।

¹⁵ एकासे का नेम्‍हा पुथी ब'ई, “इन्ना नीम आसी कत्‍थन मेनोर होले, निम्‍है जियन बेड़हा अमा नना। एकासे निम्‍है पूरखर नंजर इकला आर धर्मेसी बिड़दो नू चॊचकाचर।”

¹⁶ नॆ धर्मेसी ब'अनन मेंजर ती हूँ आसी बिड़दो नू चॊचर? ईर अबड़ा ओर्मर रहचर का नॆकन मूसस मिसर राजी ती कड़हाबाचस ती बहरी ओन्‍द्रकाचस।

¹⁷ अरा आस चालीस बछर गूटी नॆख‍अय म‍इय्याँ खिंसारका रहचस? नॆ पाप नंजकाचर आर ही म‍इय्याँ आस खिंसारका रहचस, अरा आर टुंगरी नू केच्‍चर केरर।

¹⁸ अरा आस नॆख‍अय ती किरया मोक्‍खस का आर तंग्‍‍है ख़न्न ऎख़्रना अड्डा नू इकला हूँ कोर'आ पोल्‍लोर? नॆ आसिन मल पॆस्रनर आर ही पत्त नू आस एन्ने बाचस।

¹⁹ औंगे नाम ऎरदत का आर ही मल पत्त'अना ही चड्डे आर आसी ख़न्न ऎख़्रना अड्डा नू कोर'आ पोल्‍लर।