इब्रानी 13 - पुना गच्छरना NT (BSI)छेद्द तिगाब'अना 1 तंग्है ती नन्नारिन भई बहिन बेसे चोन्हा नन्ना नू बन्चका र'आ। 2 मल ईरका आलारिन पाही ऎरा गे अमा मोध्र'आ। एन्देरगेका एन्ने पाही ऎरना चड्डे जोक्क आलर बलना ती मेर्ख़ा पैकारिन हूँ पाही ईरियर। 3 नीम गुड़रका आलारिन सुरता ननके का नीम हूँ आर ही गने गुड़रका र'अदर एन्ने सोच'आ। अरा नॆ डाहरनर आरिन हूँ सुरता ननके, नीम हूँ डाहरनर एन्ने सोच'अरकी एन्ने नना। 4 बेंजा ओर्मर ती मईन जॊगे बुझुरना र'ई। मॆतस अरा मुक्का ओर्त ओर्त गने पत्त'अना जॊगे र'अना र'ई। एन्देरगेका धर्मेस नन्ना आली महले आल गुसन कालुर अरा भड़वा ही सोतरा नलख ननुरिन दंडे चि'ओस। 5 ढिबा मइय्याँ अमके चिबाख़ार'आ, निंग्है गुसन ऎ बग्गे र'ई अत्रुम खतिर ननके। एन्देरगेका धर्मेस एन्ने बाचकादस, “ऎन निंगन इकला हूँ मल अम्बोन। ऎन निंगन इकला हूँ मल मॊधर'ओन।” 6 औंगे नाम डिढ ती ब'आ ओंग्दत, “उर्बस एंग्है सहाड़ा ननू र'अदस, औंगे ऎन मल एल्चोन। आलर एंगन एन्देर नना ओंगोर?” 7 निमन धर्मेसी कत्था सिखाबाचका निम्है कड़हाब'उरिन सुरता नना। अरा आर तम्है उज्जना नू एकासे उज्जालियर अदन सुरता नना। अरा आर एकासे पत्ताचर अन्ने नीम हूँ पत्त'आ। 8 येसु मसीस केरका उल्ला अरा इन्ना अरा उर्मी उल्ला ओन्टम र'अस, आस इकला हूँ मल बदलार'ओस। 9 कैनो रकम ही नन्ना नन्ना सिखाब'अना ती अमा बेहड़ार'आ। अरा चाल ही ओन्ना-मॊख़ना गुट्ठी ती मला धर्मेसी मया ती नम्है जिया बड़ियर मन्ना बॆस हवे। ई चाल ही ओन्ना-मॊख़ना गुट्ठिन मूख़ू आलर गे अबड़ा ती एन्द्रा हूँ फयदा मल्ला। 10 नमा गे मसीसी ख़ॆंस ही ओन्टा गोड़हा र'ई। अइय्या ती कोहाँ कुम्बा नू सुसर ननू नैगर गे ओन्ना ही अदिया मलकी। 11 कोहाँ नैगस मेक्खो गुट्ठी ही ख़ॆंसन कोड़हे नेम्हा अड्डा नू हो'अदस, आस अदिन असन पाप गे अरगदस, लिकिन मेक्खो गुट्ठी ही मॆद गुट्ठिन गा बखड़े ही बहरी बस्सतार'ई। 12 एन्ने लेक्खा येसुस हूँ नगरे ही बहरी दुक्खे भोगचस ती तंग्है ख़ॆंस ती आलारिन नेम्हा नंजस। 13 औंगे आसी चॊदका हींड़रनन नाम हूँ चॊद'अरकी बखड़े ही बहरी आस गुसन क'ओत। 14 एन्देरगेका उर्मी उल्ला र'आ गे इसन ख़ॆख़ल नू नमा गे नगरे मल्ला। लिकिन नाम बरना ओन्टा नगरे ही पाब ऎरालदत। 15 औंगे नाम येसुस ती धर्मेसी नामेन नम्है बई ती ब'अना ही ओहमा नन्ना ही दाँड़ेन धर्मेस गे सगरो नन्ते र'अदत नेकअन। 16 अरा दौ नना गे अरा निम्है जिनिसन चाड़ नू र'उर गे ख़ट्टा गे अमा मोध्र'आ, एन्देरगेका एन्ने लेक्खा दाँड़े गुट्ठी तिम धर्मेस रिझ्रदस। 17 निम्है कड़हाब'उरिन पॆस्र'आ अरा आर ही अदिया ही तबे नू र'आ। आर निम्है बॊलता ही लेखा धर्मेस गे चि'अना र'ई, अदगे आर निम्है मइय्याँ आकुस नन्नर। नीम आर गे पॆस्र'ओर होले, आद आर गे रिझ चि'ओ, ओत्था मल मनो। आद आर गे ओत्था मनो होले निमा गे एन्द्रा हूँ फयदा मल मनो। 18 एमा गे गोहरार'आ। एन्देरगेका एमा थितगर र'ई का एम्है लखना सफा र'ई, अरा ऎम नन्दम आ उर्मी कत्था नू मईन जॊगे ती उज्जा गे बेद्ददम। 19 अरा ऎन निमन ठेठन ब'अदन का ऎन चांड़हेम निम्है गुसन किर्रा गे एंगा गे धर्मेसिन गोहरार'आ। 20 मसीसी ख़ॆंस ती जनमजुग ही गच्छरनन कमचका ती भेंडो ही कोहाँ महरस नम्है उर्बा येसुसिन केचका ती उज्जताचका कोड़े ही धर्मेस, 21 नीम दौ नलख ननू अरा आसी चिताबुतन ननू आलर र'आ गे, निमा गे उर्मी चाड़न चि'अदस नेकअन। आस येसु मसीस ती नम्है नू तंग्है मनेन नन्दस नेकअन। आस गे दिम हुल्लो ती हुल्लो गूटी महबा मनन नेकअन! आमेन। मोंजरा 22 अना भईरो! ऎन जुक्की दिम निमा गे लिखचका ई चेताब'अना ही कत्थन नीम इंझ्र'आ गे गोहरारदन। 23 नीम इदन अख़'आ हो'आ का नम्है भई तीमोथियुस जेहेल ती अमब्रकादस। आस चाड़हे अंड़सोस होले, आसी गने निम्है गुसन भेंट मना गे बर'ओन। 24 निम्है उर्मी कड़हाब'उर गे अरा उर्मी पत्त'ऊ आलर गे एम्है मोंजरा आबोन तेंगा। इताली देस ता भईर निमन मोंजरा नन्नर। 25 धर्मेसी मया निम्है ओर्मर मइय्याँ र'अन नेकअन। |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India