इब्रानी 11 - पुना गच्छरना NT (BSI)पत्त'अना 1 पत्त'अना गा नम्हा असरा नंजका आलॊ गुट्ठी मानिम नू मनो दिम एन्ने थितगर हवे, अरा मल ऎथ्रना कत्था गुट्ठी ही साबूत हवे। 2 एन्ने लेक्खा पत्त'अना ती नम्है पूरखर बॆस गोवाह ख़क्खियर। 3 पत्त'अना ती नाम बुझुरदत का गोट्टा सौंसेन धर्मेस तंग्है कत्था ती पॆस्रका ती गढ़चस। अरा एन्ने मला का ऎथ्रना नू बर'ई इबड़ा उर्मी ईरका आलॊ गुट्ठी ती कम्रकी र'ई। 4 पत्त'अना ती हाबेलस कैनस ती बॆस दाँड़े धर्मेस गे अरगाचस। धर्मेस दिम आसी दान गुट्ठी ही पत्त नू दौ बाचस, ख़ने आस पत्त'अना ती आस उजगो आल एन्ने बॆस गोवाह ख़क्खियस। पत्त'अना ती हाबेलस केचका ख़ॊख़ा ती हूँ अक्कु गूटी आसी पत्त नू कछनख्रदत। 5 पत्त'अना ती हेनॊख़स अम्बोस खे'आ बाचस ती उज्जना मेर्ख़ा चॊदस होच्चस। धर्मेस आसिन होच्चस ख़ने आस मल ख़क्खरस। आस धर्मेस ती होच्का ती मुन्द आस धर्मेस गे पत्तार'ऊ आलस एन्ने बॆस गोवाह ख़क्खियस। 6 बिगर पत्त'अना ती धर्मेसिन नॆ हूँ इकला हूँ रिझ्रत'आ पोल्लोर। एन्देरगेका धर्मेस गुसन बरना आलर पत्त'अना र'ई का धर्मेस र'अस अरा आस तंगन बिद्दू आलर गे इनाम चि'ओस। 7 पत्त'अना ती नूहस आ बेड़ा गूटी मल ऎथ्रका कत्था गुट्ठी ही चेता ब'अनन ख़क्खियस ती धर्मेसिन मन्चस। अरा आस तंग्है एड़पातारिन बया बड़ही ती बछर'आ गे कोहाँ डोंगा कमचस। अरा आस तंग्है पत्त'अना ती आ बेड़ा ता ख़ॆख़ेल ता उर्मी आलारिन बदी ठेकाबाचस, अरा पत्त'अना ती मनी आ उजगो आबोन ख़क्खियस। 8 पत्त'अना ती अब्राहमस, तंगा गे गच्छरका अड्डा काला गे धर्मेस ती मॆख़्रस, ख़ने अदिन मन्चस ती उरखस केरस। तान एसन काला लगियस अदिन हूँ बल्ला लगियस। 9 पत्त'अना ती आस आ राजी नू गच्छरका राजी नू नन-राजियर लेक्खा ओकरस। असन आस कुम्बा नू रहचस। आसी गच्छरकन ख़क्ख्र'ऊ आसी जंईपुंईर इसाक अरा याकॊबस हूँ कुम्बा नू ओकरर। 10 एन्देरगेका आस धर्मेसी ती चिताबुता नंजका अरा कमचका जनमजुग ही नगरे ही पाब ऎरा लगियस। 11 पत्त'अना ती अब्राहमस, तंग्है बछर बग्गे मंजका ती हूँ, अरा सारा बंझली रहचा होले हूँ, आस बंग मन्ना ही सवंग ख़क्खियस। एन्देरगेका आस तंगा गे गच्छरना चिच्का धर्मेसिन मानिम आ गच्छरकन ननोस एन्ने असरा नंजस। 12 आसी मेद गा सवंग मलका ती केचका बेसे रहचा। अन्नु हूँ एन्ने लेक्खा ओन्टा आलस ती मेर्ख़ा ता बीनको गुट्ठी अरा समुदर पिंडी ता चलकुर लेक्खा गन'आ पोलना जंईपुंईर कुन्द्रर। 13 पत्त'अना ती उज्जका इबड़ा ओर्मा आलर खे'अना बेड़ा नू हूँ आ पत्त'अना ती केच्चर। एन्देरगेका गच्छरका आलॊ गुट्ठिन आर आ बेड़ा नू मल ख़क्खियर। लिकिन अबड़न गेच्छा तिम ईरियर अरा परघाचर ती रिझ्रर। अरा आर इंझ्रर का आर ख़ॆख़ेल नू बहरीतर अरा नन-राजियतर। 14 एन्ने लेक्खा कत्थन ब'अनर आर ऎदनर का आर निज राजिन बेद्दना नू र'अनर। 15 आर एका राजी ती उरखका रहचर अदिन सोचना नू रहचका होले, आर गे किर्रना काना ही मोका रहचा दने। 16 लिकिन आर अदही ती ओन्टा कोड़हे बॆस देस मेर्ख़ा राजी ही चिबाख़ार'ऊ अरा पाब ईरू रहचर। ईगेम धर्मेस आर ही धर्मे बार'आ गे मल लज्रदस, एन्देरगेका आस आर गे ओन्टा नगरे सपड़ाचकादस। 17-18 पत्त'अना ती अब्राहमस धर्मेस ती बिढ़तारस ख़ने इसाकसिन ओन्टा दाँड़े बेसे अरगस। आस धर्मेसी गच्छरका गुट्ठिन ख़क्खियस। आ गच्छरका नू धर्मेस आसिन एन्ने बाचका रहचस, “इसाकस तिम निंग्है बनस गुट्ठी मनो।” अन्नु हूँ आस तंग्है ओन्टे लेका ख़द्दासिन दाँड़े नना गे सपड़ाचस। 19 एन्देरगेका आस पत्ताचस का धर्मेस गा केचकारिन हूँ उज्जता ओंग्दस। ओन मदहे ती एन्ने ब'आ ओंगोत का आस इसाकसिन केचका तिम फिन ख़क्खियस। 20 पत्त'अना ती इसाकस तंग्है ख़द्दर याकॊबस अरा एसावस गे बरना उल्ला नू मन्ना कत्था गुट्ठी ही पत्त नू बरकत चिच्चस। 21 पत्त'अना ती याकॊबस खे'अना बेड़ा नू तंग्है ख़द्दर ती ओर्त यॊसॆफसी दुयो ख़द्दारिन ओर्तोसी ख़ॊख़ा ओर्तोस गे बरकत नंजस। फिन कोंको डंडा नू ऊदरस ती धर्मेसिन ऒड़ लग्गियस। 22 पत्त'अना ती यॊसॆफस तंग्है छेद्दे बेड़ा अंड़सिया ख़ने, आस बाचस का इस्राऎल आलर मिसर देसन अम्बोर ती उरखोर। अरा आर अइय्या ती उरखो बारी तंग्है ख़ॊचॊलन हो'आ कला गे आनियस। 23 पत्त'अना ती मूसासी तंगियो तम्बा आसी कुन्द्रका ती तीन महिना गूटी आसिन नुड्डर ती उइय्यर। एन्देरगेका आर ईरियर का आ ख़द्दस फब'आ लगियस, अरा मिसर राजी ही बॆलासी पॆसकन मल पॆस्र'आ गे मल इलच्चियर। 24 पत्त'अना ती मूसस परदियस ती कोहाँ मंजस ख़ने आस मिसर राजी ही बॆलस फारऒसी तंग्दा ही ख़द्द बार'आ गे मने मल नंजस। 25 आस पाप नू जुक्की उल्ला रिझ गने र'अना ती धर्मेसी आलर गने दुक्खे सार'आ गे मने नंजस। 26 आस मसीस गे हींड्रनन मिसर ता खुर्जी ती कोहाँ जॊगे बुझ्रस। आस गा धर्मेसी बरना कोड़हे इनाम गे पाब ऎरा लगियस। 27 पत्त'अना ती आस बॆलासी खींस ती मल इल्चियस ती मिसर राजिन अम्बियस ती उरखस केरस। अरा आस मल ऎथ्र'ऊ धर्मेसिन ईरका बेसे ठिमठिम ने रहचस। 28 पत्त'अना ती आस कट्टना अरा बली ही चौकट नू ख़ॆंस छिंछड़'अना आबोन ऒर नना गे इस्राऎल आलर गे पॆसका चिच्चस। औंगे पिटना पैकस इस्राऎल आलर ही जेट्ठा ख़द्दारिन अम्बोस पिटा। 29 पत्त'अना ती इस्राऎल आलर ख़ैका ख़ॆख़ेल नू ऎकना बेसे ख़ॆंसो समुदर आबोन कट्टियर। लिकिन अन्ने मिसर आलर अइय्या आर ही ख़ॊख़ा कालरकी आरिन धर'आ गे चिहुट नंजर ख़ने, समुदर नू मूलख़ियर केच्चर। 30 पत्त'अना ती इस्राऎल आलर येरिहॊ नगरेन सात उल्ला अदही ओनभौरी किन्द्रार ख़च्चियर ख़ने, अदही मेच्छा कोहाँ पगड़ गुट्ठी बिड्रिया। 31 पत्त'अना ती राख़ाब रन्डी तंग्है नगरे ता मल पॆस्र'ऊ आलर गने मल नठारा। ईगेका आद ईस्राऎल ही गम'उरिन दौ गने परघाचा। 32 अउर हूँ बग्गे ऎन एन्द्रा ब'ओन? गिदॊन, बाराक, सिमसॊन, येफथा, दाऊद अरा सामुऎल अरा नन्ना धर्मेसी कत्था तिंगुर ही पत्त नू तेंगा गे बेड़ा मलकी। 33 पत्त'अना ती ईर राजी गुट्ठिन जित्तचर, अरा एन्द्रा ठौका रहचा अदिन नंजर, अरा धर्मेस एन्द्रा गच्छरकाचस अदिन ख़क्खियर, अरा लकड़ा गुट्ठी ही बइय्यन खप्पा बाचर। 34 अरा ईर हदकारना चिच्ची आबोन ऎख़ताचर, अरा तलवार ही खे'अना ती बछरर, अरा आर ही पयहा नू बहंगर मंजर, अरा आर लड़ई नू बहंगर उरखर ती नन्ना राजी गुट्ठी ता फउदन हरा बाचर। 35 जोक्क मुक्कर तम्है केचकारिन उज्जना ख़क्खियर। अरा नन्नर गा मार मूख़नुम मूख़नुम रहचर ती अम्बर'आ गे मल बिद्दियर, एन्देरगेका आर धर्मेसिन अम्बा मल बिद्दियर। आर ही असरा एन्ने रहचा का केचका ती उज्जा चो'अना नू ओन्टा बॆस उज्जना ख़क्खा ओंगोर। 36 जोक्क आलर लज्जे मॊख़रका ती कोर्रा ती मार मॊख़रर। अरा नन्नर हॆंरका ती जेहेल नू सजतारर। 37 जोक्कोर पखना गुट्ठी ती लोड़गतारर। [जोक्कोर बिढ़्रतारर।] जोक्कोर आरी ती पलकतारर। जोक्कोर तलवार ती पिटतारर। जोक्कोर मलका नू अरा कलपारना नू अरा खिलपत सहनुम भेंडो गुट्ठी अरा ऎड़ा गुट्ठी ही चपटन कूरियर ती इत्रा अत्रा कुद्दका कुद्दियर। 38 ख़ॆख़ेल गा आर ही जॊगे मल रहचा। अरा आर टुंगरी अरा परता गुट्ठी कुद्दियर अरा लाता गुट्ठी अरा ख़ॆख़ेल ही अलफोर गुट्ठी नू नूख़्रर। 39 इबड़ा ओर्मर तम्है पत्त'अना ती बॆस नामे ख़क्खियर। अन्नु हूँ इबड़र नॆ हूँ धर्मेसी गच्छरका जिनिसन मल ख़क्खियर। 40 धर्मेस गा नमा गे ओन्टा बॆस जिनिसन चि'आ गे चिताबुता नंजकादस। एन्देरगेका आस बेद्ददस का आस तंग्है गच्छरनन आर गने पूरा ननो बारी नाम आर गने संगे चि'आ ओंगोत। |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India