गलातिया 6 - पुना गच्छरना NT (BSI)

ओर्मर गे दौ नन्ना

¹ अना भईरो! नीक‍ईम पाप नन्नुम धर'ओर क'ओर होले, नीम आसिन सोग्‍गे ऎरा ती दौ डहरे नू हो'आ, नीम गा नेम्‍हा बॊलतासी पखड़ मंजका आलर हिकदर। अरा निमन हूँ चिहुंक उइय्या का नीम हूँ बिढ़्रना नू अम्‍बोर खत्र'आ।

² एन्ने ओत्‍था चिरखीन चेड़'आ गे ओर्त ओर्त ही सहाड़ा नना। अरा एन्ने नन्‍दर होले, मसीसी पॆसका आबोन नन्‍दर।

³ एन्‍देरगेका एकअम ओर्तस तंग्‍है नलख नू मानिम बुझ्रदस होले, आस तंगन ठकदस।

⁴ लिकिन ओर्मर तंग्‍है तंग्‍‍है नलखन बिढ़'आ। होले नन्‍नर ही पत्त नू मला तंग्‍है पत्त नू आस गे फुल‍ई नन्ना ही मोका मनो।

⁵ आलस तंग्है चिरखिन हूँ तंगा गे चेड़ना र'ई।

⁶ अरा नॆ धर्मेसी कत्‍थन सिख्रदस आस तंग्‍है खुर्जी ही जोक्‍क हींस गुरुर गे चि'अदस नेकअन।

⁷ अरा अमके ठकर'आ। धर्मेस अलख्र'आ काला पोलदस। आलस एन्‍दरन चाँख़दस अदिनिम ख़ोयदस।

⁸ एन्‍देरगेका एकास तंग्‍है कया आबोन रिझ्रत'आ गे उज्‍जोस आस मुंजा मलका नठारनन ख़क्‍खोस। अरा एकास बॊलतन रिझ्रत'आ गे उज्‍जोस आस मुंजा मलका उज्‍जनन ख़क्‍खोस।

⁹ नाम दौ नलख नना गे अम्‍बोत ख़ड़दन नेकअन। अरा नाम अन्नेम नना गे बड़ियर मन्नुम क'ओत होले, नाम ठौका बेड़ा नू ख़ोयोत।

¹⁰ औंगे एका गूटी नमा मोका ख़क्‍ख्र'आ लगी, नाम ओर्मर ही दौ ननत र'ओत, कोड़हे गा पत्त'अना नू र'अनर नम्‍है भइय्योर गे दौ नना।

छेद्द चेताब'अना अरा मोंजरा

¹¹ इबड़ा कोहाँ कोहाँ लिखा आबोन ऎरा, निमा गे एंग्‍है ख़ेक्खा ती लिखदन।

¹² नॆ बहरी तरा तमन दौ आलर ऎद'आ बेद्दनर, आरिम निमन खतना नना गे अरबनर। आर इदगे लेका एन्ने नन्नर का आर मसीसी क्रुस ही पत्त नू तेंगना चड्डे अम्‍बोर सतार'आ।

¹³ खतना नंजका आलर हूँ गा ओर्मा नॆग नू मल ऎकनर। अन्नु हूँ आर निम्‍है कया ही पत्त ती फुल‍ई नना गे निमन खतना नन्‍त'आ बेद्दनर।

¹⁴ ऎन गा नम्‍है येसु मसीसी क्रुस आबोन अम्‍बरकी नन्‍ना एकअम कत्‍था नू फुल‍ई मल मन्दन नेक‍अन। मसीसी ई क्रुस ही चड्डे एंगा ख़ॆख़ेल ता मया मॊख़ क्रुस नू ठोकरकी र'ई, अरा ऎन हूँ ई ख़ॆख़ेल ता मया मॊख़ा गे क्रुस नू ठोकरकन।

¹⁵ नाम खतना मंजकत महले मल मंजकत, ईद मुध मला। लिकिन नमा पुना आल मन्ना ईद मुध र'ई।

¹⁶ ई कत्‍था ही लेक्‍खा ईकू आलर नू अरा धर्मेसी आलर नू कोड़े अरा सोग्‍गे मनन नेक‍अन।

¹⁷ अक्‍कुन ती नॆ हूँ एंगन दुक्‍खे अमके चि'आ, एन्‍देरगेका ऎन येसुसी खादी गुट्ठिन एंग्‍है मॆद नू सहदन।

¹⁸ भईरो! नम्‍है उर्बस येसु मसीसी मया निम्‍है बॊलता गने र'अन नेक‍अन। आमेन।