गलातिया 4 - पुना गच्छरना NT (BSI)1 अक्कु ऎन निमन ब'अदन का, तम्बासी खुर्जिन ख़क्खू ख़द्दस तंग्है उर्मी ख़ल्ल ही उरुब मन्दस, होले हूँ आस सन्नी ख़द्दस र'अना ती आस बिट्ठी ननू जॊंख़स ती भिन्गे मलदस। 2 लिकिन बंगासी ओक्ताचका बेड़ा अंड़सना गूटी ख़ापुर अरा ईरू-ख़ूजू आलर ही तबे नू र'अदस। 3 अन्नेम नाम ख़द्दत रहचकत आ गूटी ख़ॆख़ेल ता उर्मी बॊलता गुट्ठी ही तबे नू रहचकत। 4 लिकिन ठौका बेड़ा बरचा ख़ने, धर्मेस तंग्दासिन तइय्यस। आस ओन्टा आली ती कुन्द्रस ती यहूदीर ही उर्मी नॆग आबोन पॆस्रस। 5 अरा मूसासी नॆग ही तबे नू र'अना आलारिन अम्बत'ओस ती नाड़ोस। अरा नमा गे गॊद होच्का लेक्खा ख़द्द मना गे आकुस चि'ओस। 6 अरा नीम गा धर्मेसी ख़द्दर हिकदर। धर्मेस तंग्दासी बॊलतन नम्है जिया नू तइय्कादस। औंगे आस चिच्चियारदस ती मॆख़दस “अना बबा, अना बंगायो।” 7 ईगे अक्कु नीन बिट्ठी ननू जॊंख़ मलदय। नीन धर्मेसी ख़द्दय हिकदय। नीन आसी ख़द्द र'अना ती नीन धर्मेसी गच्छरका आसीस आबोन ख़क्खोय। गलातिया आलर नू पौलुसी चोन्हा 8 नीम गा धर्मेसिन बल्ला लिक्कर ख़ने, एन्ने देंवता गुट्ठी ही तबे नू रहचकर एकाबड़ा मानी नू धर्मे मल्ली। 9 लिकिन अक्कु नीम धर्मेसिन अक्ख ख़च्चिकर। मानिम नू धर्मेस ती नीम अक्कर। होले नीम एकन्ने पयहा अरा लंडी सिखाब'अना तरा किर्रदर? अउरिम अबड़ा ही जॊंख़ मना बेद्ददर। 10 नीम अक्कुन गूटी उल्ला गुट्ठी, महिना गुट्ठी, ओट्टा हॆंचका उल्ला अरा बछर गुट्ठिन मनदर। 11 एंगा निम्है पत्त नू इल्चिक'आ मनी। एन्ने अम्बो मना का निम्है मझी नू एंग्है अर्जाचका सिथिया मनो। 12 अना भईरो, निम्है ती एंग्है ब'अना ईदिम र'ई का ऎन एकासे यहूदी नॆग ती अम्बरकन अन्नेम नीम हूँ यहूदी नॆग ती अम्बर'आ, एन्देरगेका ऎन अबड़ा नॆगन अम्बकन ती निम्है लेक्खा मंजकादन। नीम एंग्है लेक्खा मना, एकासे ऎन निम्है लेक्खा मंजका केरकादन। नीम एंग्है गने एन्देर हूँ मलदौ मल्ला नंजका। 13 नीम अख़दर का ऎन निम्है मझी नू पहिल खेप दौ कत्था तेंगा गे बरचकन, आ बारी ऎन कोड़े मल रहचकन। 14 अरा ऎन कया ही पयहा चड्डे निमा बोझा मंजकन। अन्नु हूँ नीम एंगन हींड़चकर मला अरा एंगन ख़ाँड़चकर मला। लिकिन नीम एंग्है एन्ने मईन नंजकर का ऎन धर्मेसी पैकस मलता मसी येसुस लेक्खा रहचकन। 15 ख़ने नीम बग्गे रिझ गने रहचकर। लिकिन अक्कु निम्है अबड़ा रिझ एसन केरा? ऎन निम्है पत्त नू ब'आ ओंग्दन का मने मन्ना होले नीम निम्है ख़न्नन ओथ्र'ओर ती एंगा चि'ओर दने। 16 अक्कुन एन्देर मानिम ब'अना चड्डे ऎन निम्है बैरी मंजकन का? 17 अबड़ा आलर निमन संगी गा कम'आ बेद्दनर। लिकिन दौ चिताबुता ती मला, आर निमन एम्है ती छिंडा बेद्दनर का नीम आर गे संगी कम'ओर। 18 लिकिन ईद हूँ दौ हवे का बॆस कत्था नू उर्मी बेड़ा संगी कम'आ गे चिहुट नन्तार'ई नेकअन, आ बारी लेका मला एकाबारी ऎन निम्है गने र'अदन। 19 अना एंग्है ख़द्दारो! एका गूटी नीम मसीस लेक्खा मल मनोर आ गूटी ऎन फेन ख़द्द नेब्बना बेसे नुंजना सहदन। 20 मने गा लग्गी का अक्कु ऎन निम्है गुसन बर'ओन ती नन्ना घत ती ब'ओन, एन्देरगेका एंगा निम्है पत्त नू दोभिदिया मनी। सारा अरा हागार ही जोक्खा 21 नीम नॆग ही तबे नू र'आ बेद्ददर, नॆग एन्देर ब'ई अदिन नीम बलदर का? अदिन एंगन तेंगा। 22 नेम्हा पुथी नू लिख्रकी र'ई का अब्राहमस गे ऎंड़ ख़द्दर मंजर अरा ओर्त बिट्ठी ननू जॊंख़ पेल्लो ती अरा ओर्त तंग्आली ती मंजर। 23 एकास बिट्ठी ननू जॊंख़ पेल्लो ती कुन्द्रस आसी कुन्द्रना कया ती मंजा। लिकिन तंग्आली ती कुन्द्रस आसी कुन्द्रना धर्मेसी गच्छरका ती मंजा। 24 इबड़ा ऎंड़ मुक्कर जोक्खा ख़ीरी हिकनर। ईर धर्मेसी ऎंड़ गच्छरका हिकनर। ओन्टा मुक्का गा सीनाय परता हवे, अत्रु आलर नॆगन ख़क्खियर ती अदही जॊंख़ मंजकर। अरा आद हागार हवे। 25 हागार अरबिया देस ता सीनाय परता हवे, आद अक्कु येरुसलॆम नगरे बेसे र'ई। एन्देरगेका आद तंग्है ख़द्दर गने नॆग ही जॊंख़ नू र'ई। 26 लिकिन सारा मेर्ख़ा येरुसलॆम, छछिन्द आली हवे। अरा आदिम नम्है अयंग। 27 एन्देरगेका ईद नेम्हा पुथी नू लिख्रकी र'ई, “अनय बंझली, नीन ख़द्द मल पाकदी, रिझ्र'अय, निंगा नेबना नुंजना मल मना लगिया, ख़ने खुसमार'अय, अम्बका मुक्का ही ख़द्दर ती बिहई मुक्का ही ख़द्दर बग्गे र'अनर।” 28 औंगे भईरो! नीम इसाकस बेसे गच्छरका ख़द्दर मंजकादर। 29 अउला कया ती कुन्द्रका ख़द्दस बॊलतस ती कुन्द्रकासिन दिकदिका ब'आ लगियस, अन्नेम अक्कु हूँ मना लगी। 30 लिकिन नेम्हा पुथी एन्देर ब'ई? “बिट्ठी ननू जॊंख़ पेल्लो अरा आसी ख़द्दासिन एड़पा ती खेद'आ चि'आ। बिट्ठी ननू जॊंख़ पेल्लो ही ख़द्दस बिहई ही ख़द्दस गने तम्बासी खुर्जिन मल ख़क्खोस।” 31 औंगे भईरो, नाम बिट्ठी ननू जॊंख़ पेल्लो हागार ही ख़द्दत मलदत, लिकिन गच्छरका बिहई सारा ही ख़द्दत। |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India