इफेसुस 4 - पुना गच्छरना NT (BSI)

मॆद नू ओन संगे

¹ औंगे उर्बासिन ऎन सुसर'अना ही चड्डे हॆंरका र'अदन, ऎन निमा गे तिगा ब'अदन का, नीम धर्मेस ती ख़क्ख्रका निम्है मॆख़ना ही जोक्‍खा जॊगे उज्‍जना उज्जा चि'आ।

² नीम सगरो निमन सन्नी नना ती लुदऊ गने अरा खतिर मन्ना ती र'आ, अरा ओर्त ओर्तोरिन सहना ती चोन्‍हा गने ऎका।

³ अरा सान्‍ति नू मेस्र'अरकी, नेम्हा बॊलतस चिच्का ओन संगे र'अनन ख़ापा गे नीम एन्देर एन्देर नना ओंग्दर उर्मिन नना।

⁴ नीम मॆख़्रकर ख़ने ओन्टे असरा गे मॆख़्रकर। अन्नेम ओन्टे गुना मॆद र'ई, अरा ओन्टे गुना नेम्हा बॊलतस र'अस।

⁵ अरा ओन्टे गुना उर्बस र'अस। अरा ओन्टे गुना पत्त'अना, अरा ओन्टे गुना नॊड़्रना र'ई।

⁶ अरा ओर्मर गे ओन्टेम गुना धर्मेस अरा बंगस र'अस। आसिम नाम ओर्मर मइय्याँ राजी नन्दस, अरा नाम ओर्मर ती नलख नन्दस, अरा नाम ओर्मर नू र'अदस।

⁷ लिकिन मसीस एका बग्गे मया चि'आ बिद्दियस आ बग्‍गेम नाम ओर्त ओर्त गे बॊलता ही इनाम आबोन ख़क्‍खका र'अदत।

⁸ औंगेम नेम्हा पुथी नू एन्ने लिख्रकी र'ई का, “आस मेच्‍छा नू मइय्याँ अरगियस ख़ने, आस तंग्है गने बग्गे हॆंरकारिन होच्चस केरस, अरा आलर गे इनाम गुट्ठिन हूँ चिच्‍चस।”

⁹ अक्कु “आस मेच्‍छा नू मइय्याँ अरगियस” इदही एन्देर मने? इदही मने ईद र'ई का आस इदही मुन्द ख़ॆख़ेल ही किय्या अड्डा गुट्ठी नू हूँ इत्तियस।

¹⁰ नॆ किय्या इत्तियस, आसिम उर्मी मेर्ख़ा गुट्ठी ही मइय्याँ हूँ अरगियस, होले आस गोट्टा सौंसेन तंग्है ती नींद'आ ओंग्दस।

¹¹ आसिम जोक्कोरिन तइरकर, अरा जोक्कोरिन धर्मेसी कत्था तिंगुर, अरा जोक्कोरिन दौ कत्‍थन तेंगा कुद्दुर, अरा जोक्कोरिन नैगर अरा धर्मेसी कत्थन सिखाब'उर मन्ना ही इनाम चिच्चस।

¹² सुसर नलखन नना गे नेम्हा आलारिन सपड़'आ गेम आस ई इनाम गुट्ठिन चिच्चस, होले मसीसी मॆद कलीसिया बड़ियर मन्नुम क'ओ।

¹³ एका गूटी नाम पत्त'अना नू अरा धर्मेसी ख़द्दासी लूर नू ओन्टे मंज ख़च्‍चोत आ गूटी ईद मन्तेम र'ओ का, नाम मसीस नू पखड़ आल मनोत, अरा उर्मी रकम नू मसीस लेक्खा मनोत क'ओत।

¹⁴ होले नाम अक्कु ती खद्दत लेक्खा मल र'ओत, अरा ताका अरा लहरा ती अत्र इत्र मन्ना बेसे नाम आलर ही कसरहा अरा लबरा ती चत्रा चाल ही पुना पुना सिखाब'अना ती अत्र इत्र मल मनोत।

¹⁵ ऊजी नू चोन्‍हा गने मानी ब'अना ती उर्मी कत्था गुट्ठी नू आसी मॆद कलीसिया ही कुक्कु मसीस नू पर्दनुम क'ओम।

¹⁶ आसी तबे नू सौंसे मॆद ओन संगे पखड़ जोड़र'ई। अरा उर्मी अंग तंग्है तंग्है मुध नलखन ननी, इत्रु ती नन्ना अंग गुट्ठी हूँ पर्दी क'ई। होले सौंसे मॆद कोड़ेम पर्दी अरा चोन्हा नू निन्दनुम क'ई।

पुना आल सुबहन अत्ता

¹⁷ औंगे ऎन निमन इदन ब'अदन ती उर्बासी नामे नू निमन चेताब'अदन, नीम अक्‍कु ती नन-यहूदीर ही नन्ना लेक्खा आर ही अनभनियाँ सोच नू अमके उज्जा।

¹⁸ आर मानिम कत्थन बुझुरना नू पैहा र'अनर, अरा आर धर्मेसी चि'अना उज्‍जना ती छिन्‍डरका केरका ती उज्जनर। ईद तम्है जिया बेड़हा चड्डे मंजका आर ही लूर मलका ती मंजा।

¹⁹ अरा आर सुन्न मंजर ती उर्मी रकम ही घिनघिना नलखन चिबाख़ारना गने नना गे तमन पेहरन ही सोतरा नलख गे चिच्का र'अनर।

²⁰ लिकिन नीम गा मसीसी पत्त नू ई लेक्खम मल सिख्रकर।

²¹ नीम मानिम नुम आसी पत्त नू मेंजकर। अरा येसुस नू र'ऊ मानी ही लेक्खा आसी पत्त नू नीम सिखाबाचका केरका रहचकर।

²² औंगे नीम निम्है पच्चा उज्‍जना ओक्‍कनन अरा पच्चा आल सुबहन एकदा घुरिय'अना सुख-सौंरत चड्डे बगड़ारनुम काला लगी, अदन अम्बा चि'आ।

²³ अरा निम्‍है जिया अरा बॊलता नू पुना मन्नुम कला।

²⁴ अरा धर्मेसी सुबहा लेक्‍खा मना गे मानी उजगो अरा नेम्हा नू कम्रका पुना आल सुबहन नीम अत्ता।

²⁵ ई चड्डे नीम ठकनन अम्‍बा चि'आ, अरा तंग्‍है तंग्‍है अरबर-परबर गने मानी कत्‍थन कछनख्र'आ, एन्‍देरगेका नाम ओर्मत ओन्टे मॆद ही अंग गुट्ठी हिकदत।

²⁶ अरा नीम निम्है कैरारना नू पाप अमा नना। बीड़ी पुत्तना ही मुन्द निम्है कैरन एत्त'आ चि'आ।

²⁷ अरा इत्रु ती नाद गे ठग'आ गे मोका अमा चि'आ।

²⁸ अरा एकास ख़ड़दस, आस अक्कु ती अम्बोस ख़ड़'आ नेकअन। लिकिन आस तंग्है ख़ेक्खा ती दौ नलख नन्ना नू अर्ज'आ गे चिहुट नन्दस नेकअन। होले मलकर गे सहाड़ा नना गे आसी गुसन इन्द्रिइम र'ओ।

²⁹ एकअम मलदौ कत्‍था निम्है बई ती मल उरखना र'ई। लिकिन मिनुर गे दौ ख़क्खा गे, आर ही चाड़ ही लेक्‍खा आरिन परदना ही संगरा ननू कत्था गुट्ठिन लेका ब'आ।

³⁰ अरा धर्मेसी नेम्हा बॊलतासिन अमा दुक्‍खे चि'आ। आसी तिम निम्‍है मइय्याँ नाड़रना उल्ला गे धर्मेसी आलर एन्ने मरका लक्‍की र'ई।

³¹ निम उर्मी रकम ही करतअंग, अरा खींसारना, अरा कैरारना, अरा नग्गानख्रना, अरा हींड़ना अरा उर्मी रकम ही मलदौ ननू सोच गुट्ठिन अम्बा चि'आ।

³² अरा ओर्त ओर्तारिन मया नना अरा सोग्गे ऎरा। अरा एकासे धर्मेस मसीसी चड्डे निम्‍है अक्‍का-बलकन छमा नंजस, अन्नेम नीम हूँ ओर्त ओर्तारिन छमा नना।