इफेसुस 3 - पुना गच्छरना NT (BSI)

नन-यहूदीर ही मझी नू पौलुसी दौ कत्‍था तेंगना

¹ ई चड्डे ऎन पौलुस निमा नन-यहूदीर गे दौ कत्था तेंगना ही चड्डे मसी येसुसी हॆंरका मंजकादन।

² मानिम नू नीम मेंजका र'अदर का धर्मेस तंग्है मया ती ई नलखन निमा गे संगरा नना गे एमा चिच्का र'अदस।

³ धर्मेस तान तंग्है गम चिताबुतन एंगा दहदर नंजस। ऎन इदही पत्त नू मुन्द दिम अंछर ती लिखचका र'अदन।

⁴ ऎन निमा एन्देर लिखचका र'अदन, अदिन नीम पढ़'ओर होले, मसीसी गम चिताबुता ही पत्त ता एंग्है बुझुरकन नीम अख़'आ ओंगोर।

⁵ धर्मेस ई गम आबोन मुन्द ता परिया गुट्ठी ता आलर गे दहदर मल नंजका रहचस। लिकिन अक्कु गा धर्मेस तंग्है नेम्हा तइरकर गे अरा धर्मेसी कत्था तिंगुर गे इदन नेम्हा बॊलतस ती दहदर नंजका र'अदस।

⁶ ई गम ईद र'ई का दौ कत्‍था ती नन-यहूदीर हूँ यहूदीर गने धर्मेसी आसीस नू बटा मन्नर, अरा आर आर गने मसी येसुसी ओन्टे मॆद ही अंग मन्नर, अरा आर आर ही गने धर्मेस मसी येसुस ती नंजका गच्छरना नू बटा मन्नर।

⁷ धर्मेसी सवंग एंग्हा नू नलख नन्ना ती एंगा चिच्का आसी मया ही इनाम ती ऎन ई दौ कत्‍था तेंगा गे सुसर'ऊ मंजकन।

⁸ ऎन उर्मी नेम्हा आलर ती सन्नी र'अदन, अन्नु हूँ एंगा गे ई मया चितारा का ऎन नन-यहूदीर गे मसीसी मल मुंज्रना कोहाँ खुर्जी ही पत्त ता दौ कत्‍थन तेंगोन।

⁹ आ गम चिताबुतन ओर्मा आलर गे बुझुरत'आ गे ऎन चज्रकादन, एकदा उर्मिन गढ़'ऊ धर्मेस ती मुन्द ता परिया गुट्ठी नू नुड्डका उइय्का रहचा।

¹⁰ धर्मेसी उर्मी रकम ही लूर मेर्ख़ा अड्डा गुट्ठी नू राजी ननू बॊलता गुट्ठी गे अरा अदिया ननू आलॊ गुट्ठी गे अक्‍कु कलीसिया ती दहदर नन्तारना र'ई। ईद दिम धर्मेसी चिताबुता हवे।

¹¹ ई लेक्खम धर्मेस तंग्है जनमजुग चिताबुतन नम्है उर्बस मसी येसुस ती पूरा नंजस।

¹² नाम मसीस नू र'अना ती अरा आसी मइय्याँ ता पत्त'अना ही चड्डे, नाम डिढ अरा बड़ियर असरा गने धर्मेसी छमहे नू बर'आ ओंग्दत।

¹³ औंगे ऎन निमन ने'अदन का ऎन सस्ती सारना ती नीम पैहा अम्के मना, अबड़ा निमा दौ गे मनी।

इफेसुस ता आलर गे पौलुसी गोहरारना

^14-15 ऎन धर्मेसी लूरन अरा चिताबुतन सोचदन ख़ने, मेर्ख़ा अरा ख़ॆख़ेल नू र'ऊ उर्मी एड़पातारिन गढ़चका बंगासी मुन्दहारे मूकलिदिरदन।

¹⁶ अरा ऎन गोहरारदन का, आस तंग्‍है महबा ही खुर्जी ही लेक्खा नीम निम्है भितरी ता आल नू बड़ियर मना गे तंग्है बॊलतस ती सवंग चि'अदस नेकअन।

¹⁷ अरा मसीस मइय्याँ ता निम्है पत्त'अना ही चड्डे मसीस निम्‍है जिया नू ओक्करदस नेकअन, अरा नीम चोन्‍हा नू मन्न ही पादा ख़ोड़ख़ा एत्तना लेक्खा मनरकी बन्चका र'अन नेकअन।

¹⁸ अरा नीम ओर्मा नेम्‍हा आलर गने मसीसी चोन्हा एवंदा चकड़ अरा दिगहा अरा मेच्‍छा अरा गड्डी र'ई, अदिन बुझ्र'आ गे सवंग ख़क्खदर नेकअन।

¹⁹ अरा नीम मसीसी चोन्‍हन अख़दर नेकअन, एकदा अख़ना लूर ती गेच्‍छा र'ई। ई लेक्‍खा नीम धर्मेसी उर्मी लेक्खा निंदका ती निंद्रदर नेकअन।

²⁰ अक्कु नाम ने'अना ती महले सोचना ती कोड़हे बग्गे, नम्है नू नलख ननू आसी सवंग ही लेक्खा नमा गे नना गे सवंगिय र'अस, आस गे

²¹ कलीसिया नू अरा मसी येसुस नू पिड़ही ती पिड़ही अरा हुल्‍लो ती हुल्‍लो गूटी महबा मनन नेकअन। आमेन।