कोलोस्से 4 - पुना गच्छरना NT (BSI)

¹ अना उर्बारो, निमा गे हूँ मेर्ख़ा नू ओन्टा उर्बस र'अदस एन्ने अख़'अरकी नीम निम्है बिट्ठी ननू जॊंख़र गे एन्देर एन्देर ठौका अरा बॆस र'ई अदिन चि'आ हो'आ।

तिगाब'अना

² गोहरारतेम र'आ, अरा धर्मेस गे धन्‍यवाद नना ती गोहरारना नू एज्रका र'आ।

³ अरा इदही गने एमा गे हूँ गोहरार'आ का धर्मेस एमा गे दौ कत्‍था तेंगा गे बलिन तिसगदस नेकअन। होले ऎम मसीसी पत्त ता गम ही कत्‍थन तेंगा ओंगोम। ई नलख ही चड्डेम ऎन जेहेल नू हॆंरकादन।

⁴ अरा एकासे एंगा तेंगना चाड़ र'ई, अन्नेम ई कत्थन फरीफरी तेंगा गे एंगा गे गोहरार'आ।

⁵ नॆ पत्त'ऊ मलनर आर गने लुरगर गने ओक्‍का इज'आ, अरा उर्मी मोका आबोन दौ गने बउर'आ।

⁶ अरा निम्‍है कछनख्रना सगर घड़ी मया गने अरा सोभना र'अन नेकअन। औंगेम एकासे निम्है गने मिनुर गे अदही आनाकिर्त'अना र'ई अदिन अख़'आ ओंगोर।

छेद्दे मॊंजरा

⁷ दुलारु भई अरा पत्त'अना जॊगे सुसर'उस अरा उर्बासी नलख नू एंग्है गने सुसर ननू तुख़िखोस, एंग्‍है पत्त ता उर्मी हलन निमन तेंगोस।

⁸ नीम एम्है दसा गुट्ठिन अख़'आ गे अरा आस निम्‍है जिया गे सान्‍ति चि'आ गेम, आसिन ऎन निम्‍है गुसन तइय्कादन।

⁹ अरा आसी गने ऎन पत्त'अना जॊगे अरा दुलारु भई ओनॆसिमोसिन हूँ तइय्कादन। आस निम्‍है आलस दिम हिकदस। आर निमन इसता उर्मी कत्‍थन तेंगोर।

¹⁰ अरिस्‍तरख़ोस नॆ एंग्‍है गने जेहेल नू हॆंरकादस, आस निमा गे मोंजरा नन्दस। अरा मरकुस नॆ बरनबासी अंड़सका भई मन्दस, आस निमा गे मोंजरा नन्दस। मरकुसी पत्त नू नीम मुन्द दिम पॆसका ख़क्‍खका रहचकर, आस निम्है गुसन बर'ओस होले, नीम आसिन परघ'अके।

¹¹ अरा यूसतोस बारना येसुस हूँ निमा गे मोंजरा नन्दस। धर्मेसी राजी ही नलख नू एंग्‍है गने सुसर ननुर मझी नू ईर लेका यहूदीर हिकनर। ईर एंगा गे जिया सालना चि'अनर।

¹² अरा मसी येसुसी जॊंख़स एपाफ्रास हूँ निमा गे मोंजरा नन्दस, आस हूँ निम्है आलस हिकदस। आस सगर घड़ी निमा गे गोहरारना गुट्ठी नन्तेम र'अदस का नीम पखड़ मनोर ती ओर्मा असरा गने धर्मेसी उर्मी मने नू बड़ियर इज्‍जका र'ओर।

¹³ आस निमा गे अरा लवोदिकेया अरा हिएरापोलिस नगरे गुट्ठी नू र'ऊ पत्त'उर गे कोड़हे नलख नंजस, इदही ऎन गोवाह हिकदन।

¹⁴ एम्है दुलारु बइधस लूकस अरा दॆमस निमा गे मोंजरा नन्नर।

¹⁵ लवोदिकेया नगरे ता पत्त'ऊ भईर गे अरा नुम्‍फा अरा अदही एड़पा नू ख़ॊंड़रना कलीसिया गे एंग्है मोंजरा।

¹⁶ अरा ई चिठिन निम्‍है गुसन पढ़के, अरा अदही ख़ॊख़ा इदिन लवोदिकेया ता कलीसिया नू हूँ पढ़त'अके। अन्नेम लवोदिकेया ता कलीसिया गे एंग्हा लिखचका चिठिन हूँ नीम पढ़के।

¹⁷ अरा नीम अर्ख़िप्पोसिन आनके का, “एका सुसर'अना उर्बस निंगा चिच्कादस, अदिन चिहुंक लगे पूरा ननके।”

¹⁸ ऎन पौलुस एंग्है ख़ेक्खा ती ई मोंजरन लिखदन। सुरता नना का ऎन जेहेल नू हॆंरकादन। धर्मेसी मया निम्है नू र'अन नेकअन।