कोलोस्से 3 - पुना गच्छरना NT (BSI)

पुना उज्‍जना ही नॆग

¹ औंगे नीम मसीस गने उज्‍जतारकादर होले, मेर्ख़ा आलॊ गुट्ठिन बेद्दना नू र'आ, एक्‍सन मसीस धर्मेसी तीना चोक्‍ख उक्‍कादस।

² ख़ॆख़ेल ता आलॊ गुट्ठी नू मला, लिकिन मेर्ख़ा ता आलॊ गुट्ठी नू जिया ओड़'आ।

³ एन्‍देरगेका नीम गा केचकादर, अरा निम्‍है उज्‍जना मसीस गने धर्मेस नू नूख़ूरकी र'ई।

⁴ मसीस निम्है उज्‍जना हिकदस। एकाबारी मसीस सौंसे ख़ॆख़ेल गे तंगन दहदर ननोस, नीम हूँ आस गने दहदर मनतार'ओर ती आसी महबा नू मेस्र'ओर।

⁵ औंगे पेहरन ही सोतरा नलख, अरा पाप ती सोतरा मन्ना, अरा चिबाख़ारना, मलदौ मइय्याँ ता मने, अरा मूर्तिन ऒड़ लग्‍गना ही जोक्खा लोभिया, इबड़ा जम्मा पाप ही सुबहा हवे। इबड़ा मलदौ आबोन नन्नन अम्बा चि'आ।

⁶ इबड़ा ही चड्डेम धर्मेसी कैर मल पॆस्र'उर मइय्याँ बर'ई।

⁷ अरा नीम हूँ मुन्द इबड़ा मलदौ ननुर ही मझी नू उज्जा लिक्‍कर ख़ने, इबड़ा कत्था गुट्ठी ही लेक्‍खम ऎका लिक्‍कर।

⁸ लिकिन अक्कु गा नीम खींस, अरा कयरारनन, अरा कुचुरहन, अरा हींड़नन, अरा निम्है बई ती बरना मलदौ कछनख्रना इबड़ा उर्मिन अम्‍बा चि'आ।

⁹ अरा नीम निम्है पच्चा आल सुबहा अरा अदही नलख गुट्ठिन अम्बका ती ओर्त नन्नस गने अम्‍बोस ठक'आ।

¹⁰ अरा निमन गढ़'उसी रूपे लेक्‍खा आसी पत्त नू ठौका गने अख़'आ गे नीम पुना मंजका पुना आल सुबहन अत्तकादर।

¹¹ ई पुना उज्जना नू नन-यहूदी अरा यहूदी एन्ने, खतना मंजका अरा खतना मल मंजका एन्ने, नन-राजियर अरा जंगलीर एन्ने, बिट्ठी ननू जॊंख़ अरा छछिन्द एन्ने इन्द्रिइम फरक मल्ला। लिकिन मसीस दिम उर्मी र'अदस, अरा आस इबड़ा ओर्मर नू र'अदस।

¹² औंगे नीम धर्मेसी चाजरका आलर लेक्‍खा, नेम्‍हा अरा दुलार र'अना ती, नीम कोड़हे सोग्गेन अरा दया आबोन अरा लुदऊ मन्नन अरा नर्मियाँ आबोन अरा खतिर मन्नन अत्ता।

¹³ अरा नीम ओर्त ओर्तोरिन सह'आ। अरा ओर्तोसी बिड़दो नू निमा गे इन्द्रिइम नालिस र'ई होले, अदिन आस गे छमा नना। उर्बस निमा गे छमा नंजका लेक्खा नीम हूँ ओर्त ओर्तारिन छमा नना।

¹⁴ अरा इबड़ा उर्मी दौ गुन्न ती कोड़हे, चोन्‍हा आबोन अत्ता। आदिम अबड़ा उर्मिन बड़ियर ओन्टेम मन्ना नू हें'अरकी उइय्की र'ई।

¹⁵ मसीसी सान्‍ति निम्‍है जिया नू राजी ननी नेकअन। एन्देरगेका ई सान्ति गेम नीम ओन्‍टा मॆद ही बग्गे अंग लेक्खा मॆख़्रकादर। अरा नीम धन्‍यवाद चि'ऊ मना।

¹⁶ मसीसी कत्‍था निम्है नू सोच नलख उर्मी नू बग्‍गे ती बग्‍गे मड़'अन नेकअन। आ कत्था ही उर्मी लूर गने ओर्त ओर्त गे सिखाब'आ ती तिगाब'आ। अरा तम्है तम्है जिया नू धन्यवाद गने धर्मेस गे अस्‍सना-पाड़ना डंडी गुट्ठिन अरा ओहमा डंडी गुट्ठिन अरा बॊलता ही डंडी गुट्ठिन पाड़ा।

¹⁷ अरा कत्‍था ती मलता नलख ती इन्द्रिइम ननोर, उर्मिन उर्बा येसुसी नामे ती नना, अरा आसी तरतिम धर्मे बंगासी धन्‍यवाद नन्नुम अबड़न नना।

मसी एड़पातर गे तिगाब'अना

¹⁸ अना मुक्‍कारो, नीम तम्है तम्है मॆतासी तबे नू र'आ, नीम उर्बासी र'अना ती ईदिम निमा गे बॆस उज्जना ऎकना हवे।

¹⁹ अना मॆतारो, नीम तम्है तम्है मुक्‍कन चोन्‍हा नना, अरा आर नू करतअंग अमा नना।

²⁰ अना ख़द्दारो, उर्मी कत्‍था नू तम्है तम्है अयंग बंगर ही पॆसकन मेना, एन्‍देरगेका ईद उर्बस गे दौ लग्‍गी।

²¹ अना बंगारो, निम्‍है ख़द्द-ख़र्रन अमा कैर'आ, एन्ने अम्‍बो मना का आर ही डिढ एस्र'ओ क'ओ।

²² अना बिट्ठी ननू जॊंख़ारो, निम्है ई ख़ॆख़ेल ता उर्बर गे उर्मी कत्था नू पॆस्र'आ। आरिन पत्तारत'आ गे लेका आर ही ऎरना नू लेका मला, लिकिन उजगो जिया ती उर्बा येसुसिन मईन नन्ना ती आरहिन पॆस्र'आ।

²³ इन्द्रिइम हूँ नीम नन्दर, अदन आलर गे नन्ना बेसे मला उर्बा येसुस गे नन्ना बेसे सौंसे जिया कया ती नना।

²⁴ एन्‍देरगेका नीम उर्बा मसीस गे सुसर नन्दर, नीम अख़दर का इदही इनाम बेसे नीम उर्बस ती आसीस आबोन ख़क्खोर।

²⁵ एकास मलदौ नन्दस, आस तंग्है नंजका मलदौ ही लेक्खा ऊजिन ख़क्‍खोस। अरा नॆख'आ हूँ तीना माल ख़ड़ना मल मनी।