कोलोस्से 2 - पुना गच्छरना NT (BSI)

¹ निमा गे अरा लवोदिकेया नगरे ता कलीसिया गे अरा एंगन मल ईरका अउर नन्ना ओर्मा पत्त'ऊ आलर गे ऎन एका कोड़हे चिहुट नन्दन एन्ने नीम अख़'आ गे ऎन बेद्ददन।

² नीम हूँ अरा आर हूँ रिझ्रारकी चोन्‍हा ती मेस्रका र'अना र'ई, ईद दिम एंग्है मने हवे। होले नीम उर्मी बुझुरना गने अजगुत आसीसन ख़क्‍खोर ती धर्मेसी गम आबोन अख़'ओर चि'ओर। आ गम मसीस दिम हवे।

³ उर्मी लूर अरा अक्किल मसीस नू नूख़्रकी र'ई।

⁴ इदन ऎन निमन इदगे तेंगदन का नीकईम निमन लहर'अना कत्‍था गुट्ठी ती अम्‍बोर ठग'आ।

⁵ एन्‍देरगेका ऎन गा कया नू निमन ती गेच्‍छा र'अदन, लिकिन बॊलता नू निम्‍है गनेम र'अदन। निम्‍है दौ उज्जा ओक्कनन अरा मसीस नू निमा उइय्का पत्त'अना नू नीम एंवदा बड़ियर र'अदर, अदिन ऎरदन ती रिझ्रदन।

मसीस नू उज्‍जना र'ई

⁶ औंगे नीम एकासे मसी येसुसिन निम्है उर्बस एन्ने इंझ्रकादर, अन्नेम आसी गने मेस्रका ती उज्जते र'आ।

⁷ अरा नीम आस नुम पादा हॆंरनुम अरा परदनुम कला, अरा एकासे निमन सिखाबाचका र'ई अन्नेम पत्त'अना नू बड़ियर मन्नुम कला, अरा धर्मेस गे बग्‍गे ती बग्‍गे धन्‍यवाद नन्नुम कला।

⁸ चिहुंक र'आ का नीकईम निमन अनभनियाँ अरा ठगना तत्व लूर ती अम्‍बोर फफड़'आ हो'आ, एकदा पुरखौती अरा ख़ॆख़ेल ता बॊलता गुट्ठी ही सवंग ता सिखाब'अना लेक्‍खा गा र'ई, लिकिन मसीसी लेक्‍खा मलकी।

⁹ एन्‍देरगेका मसीस नू धर्मे बारना ही उर्मी आलॊ आल रूपे नू मड़चकी र'ई।

¹⁰ अरा आस नू नीम निंद्रकादर, एकास उर्मी अक्स'उर अरा अदिया गुट्ठी ही अक्स'ऊ हिकदस।

¹¹ नीम निम्है पाप ही सुबहा आबोन अम्बका ती नीम हूँ मसीस नू खतना ख़क्खकादर। ई खतना आलर ही ख़ेक्खा ती मल मंजकी र'ई, लिकिन मसीस ती मंजकी र'ई।

¹² अरा नॊड़रना नू नीम मसीस गने माड़रदर कादर ती आसिन केचका मद्धेर ती उज्‍जा चॊचका धर्मेसी सवंग मइय्याँ ता निम्है पत्त'अना ती नीम हूँ मसीस गने पुना उज्जना गे उज्‍जा चॊचकादर।

¹³ नीम निम्है अक्‍का-बलका गुट्ठी ती अरा खतना मल मंजका निम्है पाप ही सुबहा ती केचका रहचकर ख़ने, धर्मेस निमन मसीस गने उज्‍जताचस ती नम्‍है उर्मी अक्‍का-बलका गुट्ठिन छमा नंजस।

¹⁴ अरा मूसासी पॆसका ही लेक्खा नम्‍है बिड़दो नू लिखचका पाप ही लिखन धर्मेस मेटचस चिच्‍चस। अरा धर्मेस आ लिखन जम्मन मसीसिन क्रुस नू ठोकचस ती नटचस।

¹⁵ ई लेक्खम धर्मेस अक्स'ऊ अरा अदिया उइय्यू मलदौ बॊलता गुट्ठी ही सवंगन ओथ्रस चिच्चस। अरा मसीस क्रुस नू केच्चस ती धर्मेस अबड़न जितचस ती अबड़ा सवंग मलका एन्ने ख़ॆख़ेल गे ऎदस।

¹⁶ औंगे नीम एन्द्रन ओन्दर मॊख़दर, अरा नीम मल मन्ना परब मलता पुना चन्दो मलता ख़न्न ऎख़ना उल्‍ला गुट्ठी ही पत्त नू नॆ हूँ निमन बदी नना गे मोका अमा चि'आ।

¹⁷ इबड़ा उर्मी नॆग गुट्ठी गा बर'ऊ र'ई आ आलॊ ही ऎख़ लेका हवे, लिकिन अबड़ा ही मानी मने गा मसीसी पत्त नू र'ई।

¹⁸ नॆ हूँ निमन ठकना लुदऊ नू अरा मेर्ख़ा पैकारिन ओहमा मन्ना नू मन्दस ती नीम निम्है इनाम आबोन मल ख़क्खना ही जॊगे मना गे अड्डा अमा चि'आ। ई लेक्खा आलस तंग्है ईरका देखार ही पत्त नू बग्गे बुझुरत'अदस। बॊलता ही सुबहा मलका आसी जिया अनभनियाँ सोच ती फुलई मनी।

¹⁹ अरा आस सौंसे मॆद ही कुक्कु मसीस नू जोड़रका मल र'अदस। मसीस तिम सौंसे मॆद ओट्टा ओट्टा अरा अंग अंग जोड़र'ई ती पॊसर'ई ती ओन संगे गुंथर'ई ती धर्मेसी चि'ऊ पर्दना ती पर्दनुम क'ई।

²⁰ नीम मसीस गने केचकादर, ख़ने आस निमन ख़ॆख़ेल ता बॊलता गुट्ठी ही सवंग ती अम्तारका केरकादस। औंगे नीम एन्देरगे अक्कु गूटी ख़ॆख़ेल ता आलर लेक्खा अदही नॆग गुट्ठी नू एन्ने ऎकालदर का,

²¹ “इदिन अमा एंवसड़'आ, अमा टट्टे ऎरा, अरा अमके टुडर'आ?”

²² इबड़ा उर्मी आलॊ बउरारनुम बउरारनुम नठार'ओ, एन्‍देरगेका इबड़ा आलर ही पॆसका अरा सिखाबाचका गुट्ठी हवे।

²³ इबड़ा नॆग गुट्ठी महबा नन्ना ही चाल, अरा लुदऊ मन्ना, अरा मॆदन सिझा ब'अना लूर लेक्‍खा गा ईथ्र'ई, लिकिन मॆद ही चिबाख़ारना गुट्ठिन छेंक'आ गे इबड़ा ती एन्‍देर हूँ संगरा मल मनी।