तइरकर 26 - पुना गच्छरना NT (BSI)1 तहाँ अग्रिप्पस पौलुसिन बाचस, “निंग्है पत्त नू ब'आ गे निंगा बेड़ा चिर'आ लगी।” ख़ने पौलुस तंग्है ख़ेक्खा चॊदस ती तंग्है पत्त नू ब'आ हेलरस। 2 “बॆलायो अग्रिप्पा, यहूदीर एंग्है मइय्याँ नगदे बदी ठेकाबाचकानर। इदही पत्त नू ऎन एंग्है कत्थन निंग्है मुन्दहारे तेंगा गे इन्ना एंगा मोका ख़क्ख्रा इदगे ऎन खुसमारदन। 3 एन्देरगेका नीन यहूदीर ही उर्मी चाल गुट्ठिन अरा उर्मी आनानख्रना ही कत्था गुट्ठिन बॆस गने अख़दय। औंगे ऎन गोहरारदन का नीन एंग्हैन खतीर गने मेना। 4 एंग्है उज्जना ख़द्द परिया तिम एंग्है उज्जना ही ऒर एंग्है देस नू अरा ख़ॊख़ा येरुसलॆम नू एंग्है उज्जना ओक्कना एकासे रहचा, अदिन उर्मी यहूदीर अख़नर। 5 आर एंगन नगदे उल्ला ती अख़नर। आर बेद्दनर होले, एंग्है गोवाह हूँ चि'आ ओंग्नर का ऎन फरिसी मंजकन ती एकासे नम्है धरम ही कोड़हे ठिम-ठिम खोंड़हा ही लेक्खा उज्जा लिक्कन। 6 नम्है पूरखर गे धर्मेस एका गच्छरकन गच्छरकाचस, अइय्या ऎन नंजका एंगा असरा ही चड्डे दिम अक्कुन एंग्है मइय्याँ पिसी मना लगी। 7 ई गच्छरका ही पूरा मन्नन ऎरना ही असरा ती दिम नम्है बारा गोतोर ता आलर उल्ला माख़ा धर्मेसिन ऒड़ नन्नर। बॆलायो, ई असरा ही चड्डेम यहूदीर एंग्है मइय्याँ बदी ठेकाब'आ लगनर। 8 धर्मेस केचका आलारिन उज्जा चॊद्दस, इदिन असरा जॊगे नलख मलकी एन्ने नीम एन्देरगे सोचदर? 9 ऎन हूँ गा नासरेस ता येसुसी नामे नू एंगा उर्मी तरती कोड़हे बिड़दो नन्ना र'ई एन्ने मुन्द सोच'आ लिक्कन। 10 अरा ऎन येरुसलॆम नू एन्ने नंजकन हूँ, ऎन मुध नैगर ती अदिया ख़क्खकन ती अजम बग्गे नेम्हा आलारिन जेहेल नू सज्जकन। अरा आर पिटर'आ लगियर ख़ने, आर ही बिड़दो नू हुँकारी चिच्का र'अदन। 11 ऎन आरिन उर्मी गोड़हा एड़पा नू कैनो खेप दंडे चि'अरकी येसु नामे ही निंदा नन्त'आ गे चिहुट नंजकन। ऎन आर ही बिड़दो ता एंग्है खींस ही चड्डे ई गूटी पूरकन का नन्ना नगरे गुट्ठी नू हूँ कालरकी आरिन सताबाचकन। 12 एन्नेम ओंग्होल ऎन मुध नैगर ती अदिया अरा पॆसका ख़क्खकन ती दमसकोस नगरे काला लिक्कन। 13 ख़ने बॆलायो, डहरे नू लोहाड़ी बेड़ा नू ऎन बीड़ी ही बिलचना ती हूँ कोड़हे बिलचना बिल्लिन मेर्ख़ा ती ईरकन, आद एंग्है अरा एंग्है गने बरचका आलर ही चरियो तरा बिल्चा लगिया। 14 ऎम ओर्मम ख़ॆख़ेल नू खत्रकम। ख़ने ऎन ओन्टा सड़ा इब्रानी भखा नू एंग्है ती ब'अनन मेंजकन। आद बाचा, ‘सउल, सउल, नीन एंगन एन्देरगे सताब'आलदय? अच्चो नू लथना निंगा सेब्बा मलकी।’ 15 ऎन बाचकन, ‘उर्बायो, नीन एका ओर्तय।’ उर्बस बाचस, ‘ऎन येसु हिकदन, नॆकन नीन सताब'आलदय। 16 अक्कुन नीन चो'आ ती निंग्है ख़ेड्डे ती इज'आ। ऎन निंगन एंगन सुसर'ऊ अरा गोवाह चि'ऊ ओक्त'आ गे ऎन निंगन ऎथ्रका र'अदन। एकदन नीन एंग्है पत्त नू ईरकादय अरा एकदन नीन ऎरोय, अबड़न नीन आलर गे तेंगोय। 17 ऎन निंगन निंग्है आलर ती अरा नन-यहूदीर ती हूँ नाड़ोन। 18 ऎन आर ही ख़न्न चलख़'आ गे निंगन आर गुसन तइय्या लगदन। ख़ने आर ऊख़ा ती बिल्ली तरा किर्रा ओंगोर, अरा सैतान ही अदिया ती धर्मेस तरा किर्रा ओंगोर। फिन आर पाप गुट्ठी ही छमा ख़क्खा ओंगोर अरा एंग्है मइय्याँ ता पत्त'अना ती नेम्हा मन्रका आलर गने अड्डा ख़क्खा ओंगोर।’ 19 इदगे बॆलायो अग्रिप्पा, ऎन आ मेर्ख़ा ता देखार आबोन पॆस्रकन। 20 औंगे मुन्द गा ऎन दमसकोस, फिन येरुसलॆम ता र'ऊ आलारिन, अदही ख़ॊख़ा सौंसे यूदेया राजी नू, अरा नन-यहूदीर नू हूँ तेंगा कुद्दकन का आर जियन किर्त'अना र'ई अरा जिया किर्त'अना ही जॊगे नलख नन्ना र'ई। 21 ई चड्डेम ऎन धर्मेसी मन्दिर नू रहचकन ख़ने, यहूदीर एंगन धरचर अरा पिटा बेद्दा लगियर। 22 लिकिन धर्मेसी सहाड़ा ती इन्ना गूटी र'अदन अरा सन्नी ती कोहाँ ओर्मर ही मुन्दहारे गोवाह तेंगदन। एका कत्था मना ओंगो ब'अरकी धर्मेसी कत्था तिंगुर अरा मूसस तिंका रहचस अदिन दिम ऎन तेंगदन। अदही ती बग्गे ऎन एन्देर हूँ मल तेंगदन का, 23 मसीस दुक्खे भोग'ओस अरा केचका मधेर ती उर्मी ती मुन्द उज्जा चो'ओस ती यहूदीरिन अरा नन-यहूदीरिन हूँ धर्मेसी बिल्लीन ओन्द्र'ओस।” 24 पौलुस एन्ने ब'आ लगियस ख़नेम, फॆस्तुस जॊरसरिया बाचस, “अना पौलुस, नीन पूरु हिकदय। निंग्है कोड़हे पढ़चका निंगन पूरताचकी र'ई।” 25 लिकिन पौलुस बाचस, “अना कोड़हे मईन जॊगे फॆस्तुस, ऎन मल्ला पूरना, मानिम आबोन अरा लूर ही कत्थन ब'अदन। 26 बॆलस अग्रिप्पस हूँ गा इबड़ा कत्था ही पत्त नू अख़दस। औंगेम ऎन बेगर एल्चम ती आसिन ब'आ लगदन। ऎन अख़दन का इबड़ा कत्था आस ती नूख्रका मल्ला, एन्देरगेका ईद एकअम कोड़ा नू मल्ला मंजका। 27 अना अग्रिप्पा बॆलायो, नीन धर्मेसी कत्था तिंगुर ही कत्था गुट्ठिन पत्त'अदय का? हाँ, ऎन अख़दन नीन पत्त'अदय।” 28 तहाँ अग्रिप्पस पौलुसिन बाचस, “एन्ने जुक्कीम बेड़ा नू नीन एंगन मसी आल कम'आ ओंगोन एन्ने सोचदय का?” 29 ख़ने पौलुस आनाकिर्ताचस, “जुक्की नू महले बग्गे नू एन्ने मला, धर्मेस ती एंग्है गोहरारना र'ई का, इन्ना नीन लेका मला लिकिन नॆ नॆ एंग्है कत्थन मेना लगनर, आर येसुसिन पत्त'अना नू एंग्है लेक्खा मन्नर नेकअन, लिकिन एंग्है लेक्खा हॆंरका मल मन्नर नेकअन।” 30 तहाँ अग्रिप्पा बॆलस अरा राजीख़ापू फॆस्तुस अरा बेरनिकॆ अरा आर ही गने उक्का आलर चॊचर। 31 अरा काना बेड़ा नू आर ताम-ताम बाचर, “ई आलस पिटरना मलता गुड़रना जोक्खा एन्देर हूँ मल्ला नंजका।” 32 अग्रिप्पस फॆस्तुसिन बाचस, “ई आलस कैसरसी गोहार मल नंजका होले अमब्र'आ ओंगा लगियस दने।” |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India