तइरकर 25 - पुना गच्छरना NT (BSI)फॆस्तुसी मुन्दहारे पौलुस 1 फॆस्तुस आ चक नू अंड़सियस, अदही तीन उल्ला ख़ॊख़ा आस कैसरेया ती येरुसलॆम केरस। 2 असन मुध नैगर अरा यहूदीर ही मुद्धर आस गुसन बरचर ती पौलुसी मइय्याँ बदी नंजर। 3 अबड़र फॆस्तुसिन गोहरारर का पौलुसिन येरुसलॆम तइय्या गे मया नना, एन्देरगेका आर डहरे नू पौलुसिन पिटा गे चिताबुता नना लगियर। 4 लिकिन फॆस्तुस आनाकिर्ताचस, “पौलुस कैसरेया नू गुड़रका र'अस, ऎन हूँ गा चाँड़हेम असन कालू र'अदन। 5 औंगे नीम अदिया उइय्यू आलर एंग्है गने गुचा। आ आलस इन्द्रिइम गुन्हा नंजकादस होले, असानिम आसी मइय्याँ बदी ठेकाब'आ।” 6 आठ दस उल्ला आर ही गने रहचस ती फॆस्तुस कैसरेया किर्रियस। नन्ना उल्ला फॆस्तुस नेंवई नना उक्कियस ती पौलुसिन ओन्द्र'आ गे पॆसस। 7 पौलुस बरचस ख़ने, येरुसलॆम ती बरचका यहूदीर ही अदिया उइय्युर आसिन बेड़हचर चिच्चर, अरा आसी मइय्याँ कैनो गोटंग कोड़हे कोहाँ बदी ठेकाब'आ हेलरर, लिकिन अदही आर सबुती चि'आ पोल्लर। 8 पौलुस तंग्है पत्त नू आनाकिर्ताचस, “ऎन यहूदीर ही नॆग ही बिड़दो महले धर्मेसी मन्दिर ही बिड़दो महले कैसरसी बिड़दो एन्देर हूँ पाप मल नंजकादन।” 9 लिकिन फॆस्तुस यहूदीरिन रिझ्रत'आ गे मने नंजस ती पौलुसिन मेंजस, “एन्देर नीन येरुसलॆम काला बेद्ददय का, असन एंग्है मुन्दहारे इबड़ा कत्था ही पत्त नू नेंवई नन्तार'ओ?” 10 ख़ने पौलुस आनाकिर्ताचस, “ऎन कैसरसी नेंवई नन्ना अड्डा ही मुन्दहारे इज्ज'आ लगदन, एंग्है नेंवई इसानिम मन्ना र'ई। नीन बॆस अख़दय का ऎन यहूदीर ही बिड़दो इन्द्रिइम पाप मल नंजकादन। 11 ऎन पिटरना जोगे इन्द्रिइम नलख नंजका र'अदन होले, ऎन खे'आ गे पछली मल किर्रदन। लिकिन ईर ही ती एंग्है मइय्याँ बदी ठेकाबाचका मानिम मलकी होले, नॆ हूँ एंगन ईर ही ख़ेक्खा नू चि'आ पुल्ली। ऎन कैसरसिन गोहरारदन।” 12 ख़ने फॆस्तुस तंग्है सभा गने कछनख्रस ती बाचस, “नीन कैसरसिन गोहरारकादय, नीन कैसरस गुसन क'ओय।” अग्रिप्पा बॆलस अरा फॆस्तुस 13 जोक्क उल्ला ही ख़ॊख़ा अग्रिप्पा बॆलस अरा तंग्ड़ी बेरनिकॆ राजीख़ापू फॆस्तुसी मोंजरा नना गे कैसरेया नू बरचर। 14 आर असन बग्गे उल्ला रहचर। फॆस्तुस पौलुसी कत्थन बॆलस गुसन बाचस, “फॆलिक्स इसन ओन्टा हॆंरकासिन अम्बियस ती केरका र'अदस। 15 ऎन येरुसलॆम नू रहचकन ख़ने, यहूदीर ही मुध नैगर अरा सेयान आलर आसी बिड़दो नू एंगा अरो चिच्चर ती आस गे दंडे चि'आ गे बाचर। 16 ख़ने ऎन आरिन आनाकिर्ताचकन, ‘एका गूटी मुदई आलासिन तंग्है मुदइसी मुन्दहारे इजत'अर अरा आसिन तंग्है कत्था ही पत्त नू कछनख्र'आ गे मोका बिगर चिच्का आलासिन आर ही ख़ेक्खा नू दंडे चि'आ गे चि'अना रोमी आलर ही चाल मलकी।’ 17 औंगे आर इसन एंग्है गने बरचर, अरा ऎन लॆम नन्ना उल्ला नेंवई नना गे उक्कन, अरा आ आलासिन ओन्द्र'आ गे पॆसकन। 18 आसी मुदई आलर इज्जर ख़ने, एन्ने मलदौ कत्था गुट्ठी बदी मल नंजर एकासे ऎन सोच'आ लिक्कन। 19 लिकिन आर तम्है धरम ही पत्त नू जोक्क कत्था गुट्ठी नू अरा येसु नामे ओन्टा केचका आलासी पत्त नू आनानख्रर, लिकिन पौलुस येसुसिन उज्जा लगदस ब'अदस। 20 ऎन इबड़ा कत्थन एकासे नन्ना र'ई अदिन पोलकन बुझ्र'आ। औंगे ऎन पौलुसिन बाचकन, ‘एन्देर नीन येरुसलॆम काला बेद्ददय का, असन इबड़ा कत्था ही पत्त नू नेंवई नन्तार'ओ?’ 21 लिकिन पौलुस तंग्है पिसी कोहाँ बॆलस ती नेंवई मना गे गोहरारस। ख़ने ऎन एका गूटी कैसरस गुसन मल तइय्योन आ गूटी आसिन ख़ापा गे पॆसकन।” 22 ख़ने अग्रिप्पा बॆलस बाचस, “ऎन हूँ ई आलासी ब'अनन मेना बेद्ददन।” फॆस्तुस बाचस, “नीन नॆला मेनोय।” अग्रिप्पा बॆलासी मुन्दहारे पौलुस 23 नन्ना उल्ला अग्रिप्पा बॆलस अरा बेरनिकॆ कोहाँ महबा गने बरचर। आर फउद उर्बर अरा नगरे ही कोहाँ आलर गने सभा एड़पा नू कोरचर। फिन फॆस्तुसी पॆसका लेक्खा पौलुसिन ओन्द्रर। 24 ख़ने फॆस्तुस बाचस, “अग्रिप्पा बॆलायो, अरा एम्है गने इसन र'ऊ उर्मी आलारो, नीम ई आलासिन ऎरा, नॆख'आ पत्त नू येरुसलॆम अरा इसन हूँ र'ऊ उर्मी यहूदीर चिच्चियार चिच्चियार एंग्है ती नॆचर ‘ईस गे उज्जना मलकी।’ 25 लिकिन ऎन ईस नू पिट्रना जॊगे दोस मल ख़क्खकन। अरा ईस कोहाँ बॆलासिन गोहार नंजस, ख़ने ईसिन रोम तइय्या गे घतचकन। 26 नम्है उर्बस कोहाँ बॆलस कैसरस गे ईसी पत्त नू लिख'आ गे इन्द्रिइम हूँ ठौका कत्थन अरगम ख़क्खका। इदगे ऎन ईसिन निम्है मुन्दहारे नू अरा कोड़हे गा बॆलायो अग्रिप्पा, निंग्है मुन्दहारे ओन्द्रकन। नाम ईसिन बिढ़चका ख़ॊख़ा एंगा लिख'आ गे इन्द्रिइम ख़क्ख्र'ओ। 27 एन्देरगेका एकअम हॆंरकासिन आसी मइय्याँ ठेका बाचका बदिन मल तेंगना ती कैसरस गुसन तइय्ना एंगा दौ मल लग्गिया।” |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India