तइरकर 18 - पुना गच्छरना NT (BSI)कोरिन्थ नगरे नू पौलुस 1 इदही ख़ॊख़ा पौलुस अथॆने नगरेन अम्बियस ती कोरिन्थ नगरे नू बरचस। 2 असन अकुलास नामे ओन्टा यहूदी आलासिन ख़क्खियस। अकुलासी जनम पोन्तोस राजी नू मंजकी रहचा। आस तंग्आली प्रिसका गने जोक्क उल्ला मुन्द इताली देस ती बरचका रहचस, एन्देरगेका कोहाँ बॆल क्लौदियोस जम्मा यहूदीरिन रोम राजी ती किर्रिमबि'आ गे पॆसकाचस। पौलुस आर गने भेंटारस। 3 एन्देरगेका आर हूँ तंग्है लेक्खा कुम्बा कमना ही नलख ननू आलर रहचर। ख़ने आस आर ही गने नलख नना लगियस ती र'आ लगियस। 4 पौलुस उर्मी ख़न्न ऎख़्रना उल्ला गोड़हा एड़पा नू यहूदीर अरा युनानी आलर गने कत्था बरता ननालियस ती येसुसिन पत्त'आ गे बुझाब'आ गे चिहुट ननालियस। 5 मकेदोनिया ती सीलास अरा तीमोथियुस बरचर ख़ने, पौलुस दौ कत्था तेंगा गे उर्मी बेड़ा पहाबालियस। अरा यहूदीरिन येसुस दिम मसीस हवे बाचस ती गोवाह चि'आ लगियस। 6 लिकिन अबड़ा आलर पौलुसिन हिड़'आ अरा निंदा नना हेलरर। ख़ने आस तंग्है किचरी ता रीड़ोन ख़ित्तियस ती बाचस, “धर्मेस ती निमा ख़क्ख्रना दंडे गे हुदा नीम दिम हिकदर, ऎन गा एंग्है नलखन मुंज ख़च्चकन। ऎन अक्कु ती नन-यहूदीर गुसन क'ओन।” 7 अरा आस गोड़हा एड़पन अम्बियस ती किर्रिम बिच्चियस ती तितियोस यूसतोस नामे ही ओन्टा नन-यहूदी आलासी एड़पा केरस। आस धर्मेसी महबा ननू आलस रहचस। आसी एड़पा गोड़हा एड़पा गने सट्रकी रहचा। 8 गोड़हा एड़पा ता मुद्धस क्रिसपोस तंग्है एड़पातर गने उर्बासिन पत्ताचस। अरा कोरिन्थ ता बग्गे आलर हूँ पौलुसी कत्थन मेंजर ती पत्ताचर अरा नॊड़रर। 9 ओन माख़ा उर्बस पौलुसिन देखार चिच्चस ती बाचस, “अमा एल्चा, तेंगतेम र'आ, कलेकले अमा र'आ। 10 ऎन निंग्है गने र'अदन। नॆ हूँ निंगन ल'ओर ती निंगन नठाब'आ पोल्लोर, एन्देरगेका ई नगरे नू नगदे आलर एंग्है र'अनर।” 11 पौलुस आलारिन धर्मेसी कत्था सिखाब'अनुम असन डेड़ बछर रहचस। 12 गल्लियॊन अख़ाया देस ता राजी ख़ापुस रहचस, आ बारी जोक्क यहूदीर जुम्मरर ती पौलुसी बिड़दो मंजर ती आसिन धरचर अरा आसिन नेंवई नन्ना अड्डा नू ओन्द्रर। 13 अरा आर बाचर, “ई आलस धर्मेसी एन्ने महबा नना गे सिखाब'अदस का आद पॆसका ही बिड़दो र'ई।” 14 पौलुस ब'अम बिद्दियस ख़नेम गल्लियॊन बाचस, “अना यहूदी आलारो, एकअम मदहे मलदौ महले बदी ही कत्था रहचा होले गा ऎन चिहुंक लगे निम्है कत्थन मेनोन दने। 15 लिकिन ईद निम्है धरम ही कत्था अरा नामे अरा पॆसका ही पत्त ता आनानख्रना हवे। औंगे नीमिम इदन ऎरके। ऎन एन्ने कत्था गुट्ठी ही नेंवई नना मल बेद्ददन।” 16 अरा आस आरिन नेंवई अड्डा ती ओथ्रस चिच्चस। 17 ख़ने ओर्मा आलर गोड़हा एड़पा ता मुद्धस सॊस्थेनॆसिन धरचर ती नेंवई अड्डा ही मुन्दहारे दिम लौचर। लिकिन गल्लियॊन इबड़ा पत्त नू एन्देर हूँ चिहुट मल नंजस। अन्तियोख़ेया नू पौलुसी किर्रना 18 पौलुस नगदे उल्ला गूटी कोरिन्थ नगरे नू रहचस। अदही ख़ॊख़ा आस पत्त'ऊ भई बहिनर ती बिदा मंजस ती तान मोक्का किरिया चड्डे केंख़्रेया नगरे नू तंग्है कुक्कन मुंड़रस ती प्रिसका अरा अकुलासी गने कोहाँ डोंगा ती सीरिया राजी केरस। 19 आर इफेसुस नगरे अंड़सियर। फिन पौलुस प्रिसका अरा अकुलासिन असानिम अम्बियस। अरा तान यहूदीर ही गोड़हा एड़पा नू केरस ती यहूदीर गने कत्था बरता ननालियस। 20 अबड़र पौलुसिन अउर जोक्क उल्ला र'आ गे बाचर। लिकिन पौलुस मल मनचस। 21 अरा आस आर ही ती बिदा मंजस ती बाचस, “धर्मेसी मने र'ओ होले ऎन अउरिम बर'ओन।” आस इफेसुस नगरे ती कोहाँ डोंगा ती उरखस। 22 अरा आस कैसरेया अंड़सियस। अरा असलेक ती आस केरस ती कलीसियन मोंजरा नंजस, फिन आस अन्तियोख़ेया किर्रियस। 23 फिन पौलुस जोक्क उल्ला अन्तियोख़ेया नू रहचस। तहाँ आस गलातिया अरा फ्रुगिया चक मन्नुम ती अड्डा अड्डा कुद्दनुम उर्मी पत्त'ऊ आलारिन बड़ियर नंजस। इफेसुस नू अप्पोल्लॊस 24 आ बेड़ा नू अलेक्सन्द्रिया नगरे ता अप्पोल्लॊस नामे ओन्टा यहूदी इफेसुस नगरे नू बरचस। आस नेम्हा पुथिन दौ अख़'उस अरा बड़ियर कछनख्र'ऊ आल रहचस। 25 आस गे उर्बासी डहरे ही सिखाब'अना ख़क्ख्रकी रहचा। अरा आस तंग्है बॊलता ही रिझ गने येसुसी पत्त नू मानिम कत्थन तेंगा अरा सिखाब'आ लगियस। अन्नु हूँ आस यॊहनसी नॊड़रनन लेका अक्काचस। 26 आस गोड़हा एड़पा नू डिड़गर गने ब'आ हेलरस। अरा अकुलास अरा प्रिसका आसी सिखाब'अनन मेंजर ख़ने, आर आसिन तम्है गुसन होच्चर, अरा आसिन अउर कोड़हे बॆस धर्मेसी डहरे ही पत्त नू बुझाबाचर। 27 अक्कुन अप्पोल्लॊस अख़ाया देस काला बिद्दियस ख़ने, इफेसुस ता पत्त'ऊ भइय्योर आसिन काला गे रिझ्रताचर, अरा आसिन परघ'आ गे अख़ाया ता पत्त'ऊ आलर गे चिठी लिखचर। अप्पोल्लॊस अख़ाया अंड़सियस ख़ने, धर्मेसी मया ती पत्त'ऊ मंजका आलर गे कोड़हे सहाड़ा नंजस। 28 अरा आस यहूदीरिन ओर्मा आलर ही मुन्दहारे कोड़हे डिड़ गने कत्था बरता नंजस ती येसुस दिम मसीस ब'अरकी नेम्हा पुथी ती पुरब नंजस। |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India