तइरकर 11 - पुना गच्छरना NT (BSI)पतरस तंग्है नलख ही पत्त नू तेंगना 1 अक्कु यूदेया नू र'ऊ तइरकर अरा पत्त'ऊ भइय्योर मेंजर का नन-यहूदीर हूँ धर्मेसी कत्थन पत्ताचर। 2 औंगे पतरस येरुसलॆम अंड़सियस ख़ने, यहूदी पत्त'ऊ आलर आसी गने आनानख्रर। 3 अरा बाचर, “नीन गा नन-यहूदीर ही एड़पा नू कोर्चकय अरा आर ही संगे ओंडकय।” 4 औंगे पतरस जम्मा कत्थन ऒड़ ती तेंगा हेलरस, 5 “ऎन योप्पॆ नगरे नू रहचकन अरा ऎन गोहरार'आ लिक्कन ख़ने, ऎन ओन्टा देखार ईरकन। ऎन चरियो गंडा ऎप ती हॆंरका दिगहा अरा चकड़ चदर बेसे एन्देर लॊ एत्तना ती ख़ॆख़ेल नू उइरना ईरकन। अरा आद एंग्है हेद्दे बरचा। 6 ऎन अदिन ओन ढिठ ती ईरकन का अइय्या मेक्खो गुट्ठी अरा जंगल ता मेक्खो गुट्ठी अरा ख़ॆख़ेल नू ऎकना आलॊ गुट्ठी अरा ऒड़ा गुट्ठी रहचा। 7 अरा एंगा ओन्टा ब'अना मेन्द्रा ती बाचा, ‘पतरस, चो'आ ती पिटा मॊख़ा।’ 8 लिकिन ऎन बाचकन, ‘मला उर्बायो, कहियों ऎन नेम्हा मलका अरा सोतबोड़'आ आलॊन मल्ला मोक्का।’ 9 लिकिन अउरिम दोसर खेप मेर्ख़ा ती आ ब'अना मेन्द्रा, ‘धर्मेस नेम्हा नंजकादस अदिन नीन सोतबोड़'आ अमा ब'आ।’ 10 एन्ने तीन खेप मंजा, अरा अदही ख़ॊख़ा अबड़ा ओर्मा मेर्ख़ा मइय्याँ होतारा केरा। 11 आ बारिम कैसरेया ती एंग्है गुसन तइय्का तीन झन आलर आ एड़पा मुन्दहारे अंड़सियर एसन ऎन ओक्रका रहचकन। 12 नेम्हा बॊलतस एंगन बिगर धकधकर'आ ती आर ही गने काला गे आनियस। इबड़ा छे भइय्योर हूँ एंग्है संगे केरर, अरा ऎम कोरनेलियोसी एड़पा नू कोर्चकम। 13 आस एमन तिंगियस का तंग्है एड़पा नू आस ओन्टा मेर्ख़ा पैकासिन इज्जका ईरियस। अरा पैकस आसिन एन्ने बाचस, ‘योप्पॆ नगरे जोक्क आल तइय्या ती सिमॊन नॆ पतरस बारदस आसिन मॆख़ा। 14 आस एन्देर कत्था सिखाब'ओस अदही ती निंगा अरा निंग्है सौंसे एड़पातर गे नाड़रना ख़क्ख्र'ओ।’ 15 ऎन ब'आ गे ऒड़ नंजकन अन्नेम नेम्हा बॊलतस आर ही मइय्याँ इत्तियस एकासे ऒड़ नू नम्है मइय्याँ इत्तका रहचस। 16 तहाँ एंगा उर्बासी बाचका आ कत्था सुरता बरचा, ‘यॊहनस अम्मु ती नॊड़रत'आ लगियस लिकिन नीम नेम्हा बॊलतस ती नॊड़तार'ओर।’ 17 धर्मेस गा आर गे एन्ने इनाम चिच्चस एकदन नमा गे चिच्चस इकला नाम उर्बस येसु मसीस नू पत्ताचकत। होले ऎन एका ओर्तन धर्मेसी नलखन छेंका ओंग्दन?” 18 अबड़ा कत्थन मेंजर ख़ने, आर कलेकले मंजर केरर। अरा आर एन्ने ब'अनुम धर्मेसी ओहमा नंजर, “धर्मेस नन-यहूदीर गे हूँ जियन किर्त'अना ती उज्जनन ख़क्खा गे मोका चिच्चस।” अन्तियोख़ेया नगरे ता कलीसिया 19 स्तेफनोसिन पिटका ही ख़ॊख़ा मंजका कल्पारना चड्डे एका एका ओर्तर भगियारका केरका रहचर, आर फोइनिकॆ चकभार अरा कुप्रोस टापू अरा अन्तियोख़ेया नगरे गूटी यहूदीर गे लेका दौ कत्था तेंगा कुद्दा लगियर। 20 लिकिन अबड़र नू जोक्कोर कुप्रोस टापू अरा कुरॆनॆ नगरे ता आलर रहचर। अरा अबड़र अन्तियोख़ेया अंड़सियर ती नन-यहूदी आलारिन हूँ उर्बा येसुसी दौ कत्था तेंगा लगियर। 21 आर ही गने उर्बासी सवंग रहचा। ख़ने नगदे बग्गे आलर पत्ताचर ती उर्बस तरा बरचर। 22 येरुसलॆम कलीसिया ता आलर इबड़ा कत्था ही पत्त नू मेंजर ख़ने, आर बरनबासिन अन्तियोख़ेया तइय्यर। 23 बरनबास असन अंड़सियस ती धर्मेसी सोग्गे आबोन ईरियस ख़ने आस रिझ्रस। आस ओर्मारिन उर्बस नू सौंसे जिया ती मानिम गने बड़ियर र'आ गे रिझ्रताचस। 24 आस गा दौ आलस रहचस अरा नेम्हा बॊलतस अरा पत्त'अना ती निन्द्रका आलस रहचस। ईसी चड्डे नगदे आलर उर्बासिन पत्त'ऊ आलर मंजर केरर। 25 इदही ख़ॊख़ा बरनबास सउलसिन बेद्दना नू तरसोस नगरे किर्रिम बिच्चियस। 26 अरा आसिन बिद्दियस ती अन्तियोख़ेया ओन्द्रस। अबड़र इरबारिम ओन बछर गूटी अइय्या ता कलीसिया नू रहचर ती नगदे बग्गे आलारिन सिखाब'आ लगियर। अरा अन्तियोख़ेया नू उर्मी ती मुन्द पत्त'ऊ आलर मसीर बातारर। 27 अबड़ा उल्ला नू जोक्क धर्मेसी कत्था तिंगुर येरुसलॆम ती अन्तियोख़ेया बरचर। 28 आर ही ती ओर्तोस हगाबोस नामे आलस इज्जस अरा नेम्हा बॊलतासी संगरा ती बाचस का सौंसे रोमी राजी नू नगदे अकाल मन्ना र'ई। अरा ई आकाल बॆल क्लौदियोसी राजी नन्ना बेड़ा नू मंजा। 29 तहाँ पत्त'ऊ आलर यूदेया राजी ता भइय्योर ही सहाड़ा गे ओर्मर तम्है ओंगना लेक्खा रुपया तइय्या गे सलहा मंजर। 30 आर अन्नेम नंजर ती इनाम आबोन बरनबास अरा सउलसी ख़ेक्खा नू चिच्चर। आर अदिन येरुसलॆम ता सेयान आलर गुसन ओन्द्रर चिच्चर। |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India