2 तीमोथियुस 1 - पुना गच्छरना NT (BSI)पौलुसी मोंजरा 1 ऎन पौलुस, धर्मेसी चीता बुता ती मसी येसुसी तइरकन। धर्मेस एंगन मसी येसुस नू जनमजुग उज्जना ही गच्छरका ही पत्त नू तेंगा गे तइय्यस। 2 एंग्है चोन्हा ख़द्दस तीमोथियुस गे लिखदन। धर्मे बबस अरा नम्है उर्बस मसी येसुस ती निंगा मया अरा सोग्गे अरा कोड़े ख़क्खर'ई नेकअन। तीमोथियुसिन पत्त'अना नू रिझ्रत'अना 3 ऎन निंगा गे धर्मेसिन धन्यवाद चि'अदन। ऎन धर्मेसिन निमन लखना गने महबा नन्दन, एन्नेम एंग्है पूरखर हूँ नंजर। ऎन सगरो उल्ला दरा माख़ा बिन्ती नू निंगन सोचदन। 4 अरा ऎन निंग्है गने भेंट मनरकी खुसमार'आ गे बेद्ददन। अरा इकला नाम छिन्डरकत ख़ने ता निंग्है ख़नजलख़ोन सोचदन। 5 अरा ऎन निंग्है मानिम पत्त'अनन सोचदन, एकदा मुन्द निंग अज्जी लॊइस, अरा निंग्यो युनीके नू रहचा। आ पत्त'अना निंग्है नू हों र'ई। 6 ऎन निंगन सोचत'अदन का ऎन निंग्है मइय्याँ ख़ेक्खा उइय्यो बारी धर्मेस ती निंगा ख़क्ख्रका सवंग आबोन बॆस बड़ियर लगे बउर'आ। 7 एन्देरगेका धर्मेस एल्चना चि'ऊ बॊलतन मला लिकिन सवंग अरा चोन्हा अरा कयास चि'ऊ नेम्हा बॊलतासिन चिच्कादस। 8 औंगे नम्है उर्बासी पत्त नू आलारिन तेंगा गे अमा एल्चा। अरा ऎन आसी दौ कत्था तेंगना ती जेहेल नू र'अदन, ई चड्डे नीन अमा एल्चा। लिकिन धर्मेसी सवंग ती दौ कत्था गे एंग्है गने दुक्खे चॊद'आ गे सपड़ार'आ। 9 धर्मेस दिम नमन नाड़ियस ती नेम्हा उज्जा गे मीख़कादस। आस इदन नम्है नलख ती मला लिकिन आसी चीता बूता अरा मया ती चिच्चस। ई मया ऒड़ ती मुन्द मसी येसुस ती नमा गे मंजकी र'ई। 10 लिकिन अक्कु नम्है बछाब'ऊ मसी येसुसी दहदर मन्ना ती ई मया आबोन ऎदस, नॆ खे'अना ही सवंग आबोन नठाबाचस, अरा दौ कत्था ती उज्जना अरा कया मल नठारनन ऎदस। 11 ई दौ कत्था गे ऎन दौ कत्था तिंगू, तइरका अरा सिखाब'ऊ उइरकन। 12 औंगेम ऎन ई दुक्खेन हों चॊद्दन, लिकिन मल एल्चदन। एन्देरगेका नॆकन ऎन पत्त'अदन अदन अख़दन। एंगा असरा र'ई का आस एंग्है नलखन रायबड़ी उल्ला गूटी ख़ापा ओंग्दस। 13 एका बड़ियर कत्था गुट्ठिन नीन एंग्है ती मेंजकादय, अदिन मसी येसुस नू र'ई आ पत्त'अना अरा चोन्हा गने निंग्है चिन्हा कम'आ ती उइय्या। 14 निंगा पत्त'अना ती चिच्का बॆस कत्थन नम्है मइय्याँ मड़चकी र'ऊ नेम्हा बॊलतासी सवंग ती बॆस ख़ापा। 15 नीन अख़दय का आसिया राजी ता पत्त'ऊ आलर ओर्मर एंगन ती किर्रका केरका र'अनर। कोड़हे गा फुगेलोस अरा हेरमोगेनेस हों आर नू र'अनर। 16 ओनेसिफोरुसी एड़पातर मइय्याँ धर्मेसी कोड़हे सोग्गे मनन नेकअन। एन्देरगेका ऎन जेहेल नू रहचकन ख़ने हूँ बिगर इल्चका ती एंगन आस नगदे हॆल बरचस ती ईरयस अरा एंग्है जियन बोधा बाचस। 17 आस रोम नगरे नू बरचस ख़ने, एंगन नगदे तिहा ती बिद्दयस ती एंगन ख़क्खियस। 18 रायबड़ी उल्ला नू उर्बस आसी मइय्याँ कोड़हे सोग्गे नन्दस नेकअन। आस एंगा गे एका एका दौ नलखन इफेसुस नगरे नू नंजस, अदिन हों नीन बॆस अख़दय। |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India