2 थेस्सलोनिकॆयर 3 - पुना गच्छरना NT (BSI)गोहरार'आ गे ने'अदस 1 अना भईरो! छेद्दे नू उर्बासी कत्था निम्है गुसन अंड़सिया अन्नेम उर्मी अड्डा चाँड़हे अंड़सो मईन ख़क्ख्र'ओ अदगे एमा गे गोहरार'आ। 2 अरा अउरिम गोहरार'आ का ऎम पपहा आलर अरा मलदौ आलर ती बछरनुम क'ओम, एन्देरगेका ओर्मर गा दौ कत्थन पत्त'ऊ मलनर। 3 लिकिन उर्बस असरा जॊगे र'अदस। आस निमा सवंग चि'ओस ती मलदौ आलॊ ती नाड़ोस। 4 ऎम पॆसकादम अबड़न नीम नना लगदर फिन ननोर अन्नेम ऎम उर्बस ती असरा ननालदम। 5 धर्मेसी चोन्हा अरा मसीसी कयास ती उर्बस निम्है जियन कड़हाब'अदस नेकअन। लंडी ही पत्त नू चेताब'अना 6 अना भईरो! अक्कु नम्है उर्बस येसु मसीसी आकुस ती ऎम निमन पॆसदम का एका पत्त'ऊ आलर लंडी र'अनर अरा एम्है गुस्ते सिख्रका चाल लेक्खा मल नन्नर अरा मल ऎकनर आर ही ती तरकूटी र'आ। 7 एन्देरगेका नीमिम अख़दर का ऎम एकासे उज्जदम ऎकदम अन्ने निमा हूँ उज्जना ऎकना र'ई। अरा निम्है संगे र'अना बेड़ा नू लंडी मल मंजकम। 8 नॆख'आ गुसन हूँ ऎम सिथिया मंडी मल ओंडकम, ऎम उल्ला माख़ा कोड़हे नलख नंजकम ती ओंडकम ती ऎम निमा नॆका हूँ बोझा मल मंजकम। 9 एन्ने सहाड़ा एमा निम्है ती हो'अना ही अदिया मलकी अन्ने मला। लिकिन ऎम निम्है मुन्दहारे नीम अन्ने नना गे चिन्हा उइय्या बेद्दा लिक्कम। 10 एन्देरगेका ऎम निम्है मझी नू रहचकम ख़ने, ऎम निमन पॆसका रहचकम अन्नेम, “एकअम ओर्तस नलख मल ननोस होले, आस अम्बोस ओना।” 11 निम्है मझी नू जोक्क आलर लंडी र'अनर अन्ने मेंजकम। आर एकअम बेसे नलख मल नन्नर, लिकिन नन्नर ही नलख नू नूतनर अरा अनभनियाँ नलख नू मेस्रकानर। 12 एन्ने आलर दौ गने उज्जना र'ई अरा तमा ओना गे तमा गेम नलख नन्ना र'ई, अन्नेम ऎम उर्बस येसु मसीस ती पॆसदम अरा रिझ्रत'अदम। 13 लिकिन भईरो, नीम दौ नलख नना गे जियन अमा हदिय'आ। 14 एकअम ओर्तस ई चिठी नू लिख्रकी र'ई अदिन मल पेस्रदस होले आसिन ऎरनुम र'आ। अरा आसी गने अमा मेस्र'आ का आस ई चड्डे लज्जे मोख़्र'ओस। 15 अन्नू हूँ आसिन बैरी लेक्खा अमके सोच'आ। लिकिन भई अख़'आ ती चेताब'आ। छेद्दे मोंजरा 16 अक्कुन कोड़े ही उर्बस तानिम निमा उर्मी बेड़ा उर्मी रकम ही कोड़े चि'अत र'अदस नेकअन। उर्बस निम्है ओर्मर संगे र'अदस नेकअन। 17 ऎन पौलुस एंग्है ख़ेक्खा ती मोंजरा लिखदन। एंग्है उर्मी चिठी नू ईद दिम चिन्हा र'ई, ईद एंग्है लिखचका हवे। 18 नम्है उर्बस येसु मसीसी मया निम्है ओर्मर गने र'अन नेकअन। |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India