2 थेस्‍सलोनिकॆयर 2 - पुना गच्छरना NT (BSI)

मसीसी किर्रना

¹ अना भईरो, अक्कु ऎम निमन नम्‍है उर्बस येसु मसीसी बरना ही बेड़ा नू एकासे तंग्‍है संगे नमन ख़ॊंड़'ओस, इदही पत्त नू गोहरारदम।

² एकअम धर्मेसी कत्था तिंगुर ही कत्‍था महले नन्नर ही कत्‍था महले चिठी एम्‍है तरती बरचा ब'अरकी, अइय्या “येसु मसीसी बरना अंड़सकी र'ई” एन्ने लिख्रकी र'ई ब'अरकी ब'अनर होले हूँ अत्र इत्र अमके मना।

³ नेकअम गे कटीकुना हूँ ठक'आ गे मोका अमके चि'आ, एन्‍देरगेका धर्मेसी बिड़दो नू कोहाँ हुलहुली मन्‍ना ही मुन्‍द अरा नठारना नू कालू नॆग मलका ही आलस दहदर नन्ना ही मुन्‍द आ उर्बासी उल्‍ला मल बर'ओ।

⁴ आस उर्मी देंवता अरा आलर महबा नन्नर अबड़ा ओर्मा ती तंगन कोहाँ मन्‍दस ती अबड़ा ही बिड़दो नू मन्‍दस। आस धर्मेसी मन्‍दिर नू धर्मेस लेक्‍खा ओक्‍कदस ती तंगन धर्मेस ऎद्ददस।

⁵ ऎन निम्‍है संगे रहचकन ख़ने, इबड़ा उर्मी कत्‍था ही पत्त नू तिंका रहचकन, आद निमा सुरता मलकी का?

⁶ तंग्‍है बेड़ा नू दहदर मना गे आसिन छेंक'ई आद एन्देर र'ई अदिन नीम अख़दर। आस गा तंग्‍है बेड़ा नू तंग्‍है ती दहदर मनोस।

⁷ नॆग मलका अक्‍कुन हूँ नूख़्रा ती नलख ननी, अरा अदिन छिक'ऊ र'ई आद तरकूटी मल मन्‍ना गूटी दहदर मल मनो।

⁸ होले आ नॆग मलका दहदर मनो। लिकिन उर्बा येसुस तंग्‍है बई ता सांस ती अदिन पिटोस अरा तंग्‍है बरना नू तंग्‍है लौकारना ती अदिन नठाब'ओस।

⁹ आ नॆग मलकासी बरना बेड़ा नू सैतान तंग्‍है सवंगन अदगे चि'ओ। अत्रु कयनो रकम ही ठकना सवंग अरा चिन्हा दरा अजगुत नलख गुट्ठी एद'ओ।

¹⁰ अरा आस नठार'उरिन उर्मी रकम ती छलक'ओस ती बोको ननोस। एन्‍देरगेका आर मानिमन चोन्‍हा मल नन्नर एकदा आरिन नाड़ा ऊंगी।

¹¹ ई चड्डे धर्मेस आरिन फोकर'आ गे अम्‍बियस चिच्‍चस। अदगे आर ठकना मइय्याँ असरा ननोर।

¹² ई लेक्‍खा मानी आबोन मल पत्त'अनर अरा मलदौ नलख नू रिझ्र'ऊ आलर ओर्मर भगती मलका आलर लेक्‍खा दंडे ख़क्‍खोर।

पत्त'अना नू बड़ियर र'आ

¹³ अना उर्बासी चोन्‍हा भईरो, एमा निम्‍है पत्त नू सगरो धर्मेसी धन्‍यवाद चि'अना र'ई। एन्‍देरगेका निमन नाड़र'आ गे हुल्‍लो ती धर्मेस चज्‍जिकादस। नीम निमन नेम्‍हा ननू बॊलता ती अरा मानिमन पत्त'अदर ती नाड़रदर।

¹⁴ धर्मेस एम्‍है दौ कत्‍था ती नम्‍है उर्बस येसु मसीसी महबा नू मेस्र'आ गे निमन मीख़ियस।

¹⁵ औंगे भईरो, नीम बड़ियर मन्नुम कला अरा एम्‍है बई ती मेंजका कत्‍था ती महले एम्‍है चिठी ती नीम सिख्रका र'अदर अदिन धर'आ।

¹⁶ अक्‍कुन नम्‍है उर्बस येसु मसीस अरा नम्‍है धर्मे बंगस नमन चोन्‍हा नंजस ती तंग्‍है मया ती नमा सगरो जिया सालना अरा बॆस असरा चिच्चस।

¹⁷ आस निम्‍है जियन डिढ नन्‍दस अरा निमन उर्मी दौ नलख नू अरा ब'अना नू बड़ियर नन्‍दस नेक‍अन।