2 पतरस 3 - पुना गच्छरना NT (BSI)

उर्बासी किर्रना उल्ला

¹ अना चोन्हा आलारो, ईद ऎन निमा गे लिखना दोसर चिठी हवे। ऎन इबड़ा दुयो चिठिन निम्है सुध सोच गुट्ठिन रिझ्रत'अना गे सुरत'अना लेक्खम लिखचका र'अदन।

² ऎन बेद्ददन का, नेम्हा धर्मेसी कत्था तिंगुर ती चिरान नू तिंका कत्था गुट्ठिन, अरा निम्है तइरकर ती चितारका नम्है उर्बस अरा नाड़ुसी पॆसका गुट्ठिन निमा सुरता नन्ना र'ई।

³ उर्मी ती मुन्द नीम इदन अख़'आ गे बेद्ददन का, छेद्द उल्ला गुट्ठी नू निंदा ननरकी अलखू आलर बर'ओर, आर मानी आबोन निंदा ननरकी अलख़ोर अरा तम्है तम्है मलदौ चिबाख़ारना नू ऎकोर।

⁴ अरा आर ब'ओर का, “येसुस अउर बर'ओन एन्ने मल गच्छरका र'अदस का? फेन एसन आस र'अस? एन्देरगेका नम्है पूरखर केचका बेड़ा ती अक्कु गूटी ख़ॆख़ेल गढ़्रना ही ऒरे नू रहचका लेक्खम उर्मी र'ई।”

⁵ आर अख़नुम अख़नुम मानिमन मॊध्रनर का हुल्लो नू धर्मेसी कत्था ती मेर्ख़ा गुट्ठी अरा ख़ॆख़ेल गढ़रा, अरा ख़ॆख़ेल अम्मु ती बहरी बरचा अरा अम्मु ती कम्मरा।

⁶ फेन ई पच्चा ख़ॆख़ेल अम्मु ती कोहाँ बहड़ी ती मुलख़िया ती नठारा केरा।

⁷ लिकिन धर्मेस अक्कु ता मेर्ख़ा गुट्ठिन अरा ख़ॆख़ेलन नेंवई उल्ला गूटी र'आ गे पॆसकन चिच्चस। फेन अबड़ा चिच्ची ती बस्सा गे उइरकी र'ई। अरा धर्मेसिन मल इल्चुर नठार'ओर।

⁸ लिकिन अना चोन्हा आलारो, ई मानिमन नीम मॊधर'आ गे ऎन मल बेद्ददन का, उर्बस गे उन्दुल उल्ला हजार चाँन लेक्खा र'ई, अरा हजार चाँन उन्दुल उल्ला लेक्खा र'ई।

⁹ जोक्क आलर बुझुरना लेक्खा उर्बस तंग्है गच्छरनन नना गे दिरी मल नन्दस। लिकिन आस निम्है नू कयास गने र'अदस। एन्देरगेका आसी मने ईद र'ई का, ओर्त हूँ अम्बोर नठार'आ, लिकिन ओर्मर जियन किर्त'ओर।

¹⁰ लिकिन उर्बासी बरना उल्ला गा ख़लबस लेक्खा आचका बर'ओ। अउला मेर्ख़ा गुट्ठी गरजारनुम मेटर'ओ कालो, अरा मेर्ख़ा ता आलॊ गुट्ठी गौंगौंर'ओ ती चोदख़ो कालो ती नठार'ओ, अरा ख़ॆख़ेल नू आलर नंजका उर्मिन धर्मेस नेंवई नना गे दहदर नन्त'ओस।

¹¹ ई लेक्खम इबड़ा उर्मिम नठारना र'अना ती, नीम एका लेक्खा आलर र'अना र'ई? नीम धर्मेस गे इल्चका ती नेम्हा उज्जनन उज्जना र'ई।

¹² धर्मेसी बरना उल्ला बर'आ गे रिझ गने पाब ऎरा, अरा ईद चाँड़हेम बर'आ गे तिहा नन्त'आ। अउला नू मेर्ख़ा गुट्ठी ऒलो ती नठार'ओ क'ओ अरा मेर्ख़ा ता आलॊ गुट्ठी गौंगौंर'ओ ती चोदख़ो कालो।

¹³ लिकिन नाम गा आसी गच्छरना ही लेक्खा पुना मेर्ख़ा गुट्ठी गे अरा ओन्टा पुना ख़ॆख़ेल गे पाब ऎरा लगदत, एकइय्या धर्मेसी उजगो ओकर'ओ।

¹⁴ औंगे अना चोन्हा आलारो, नीम इबड़ा कत्था गुट्ठी मन्ना ही पाब ऎरना ही चड्डे, नीम बिगर बदी अरा बिगर दगहा ही उज्जनन उज्जना ती धर्मेस गने कोड़े गने र'आ गे उर्मी तिहन नना।

¹⁵ अरा सुरता नना का, नम्है उर्बासी कयास आलर गे नाड़र'आ गे बेड़न चि'ई। अन्ने दिम नम्है चोन्हा भई पौलुस हूँ धर्मेस तंगा गे चिच्का लूर ती निमा गे लिखचस।

¹⁶ आस तंग्है उर्मी चिठी नू इबड़ा कत्था गुट्ठी ही पत्त नू तेंगना बारी ई लेक्खम लिखचकादस। आस तिंका कत्था गुट्ठी नू जोक्क कत्था गुट्ठी बुझुर'आ गे मसकिल र'ई। बलका आलर अरा तम्है पत्त'अना नू ठिमठिमने मल र'ऊ आलर नेम्हा पुथी ता अउर कत्था गुट्ठिन नन्ना लेक्खा इबड़ा कत्था गुट्ठी गे बिड़दो मने ओथ्रनर ती तमा गे नठारनन ओन्द्रनर।

¹⁷ औंगे अना चोन्हा आलारो, मुन्द तिम नीम इदन अख़ना ती, चिहुंक र'आ। एन्ने अम्बो मना का, अबड़ा नॆग मलका आलर ही मलदौ नू बझ्रर'अरकी निम्है ठिमठिमने दसा ती अम्बोर खतर'आ।

¹⁸ नम्है उर्बस अरा लाड़ुस येसु मसीसी मया नू अरा आसिन अख़ना ही लूर नू पर्दनुम कला। आस गेम अक्कुन हूँ अरा हुल्लो गूटी हूँ महबा मनन नेकअन। आमेन।