2 कोरिन्‍थ 9 - पुना गच्छरना NT (BSI)

येरुसलॆम ता मसी आलर गे बरार ऊजना

¹ येरुसलॆम ता नेम्‍हा आलर ही सहाड़ा गे नन्ना ई सुसर ही पत्त नू ऎन अउरिम निमा लिखना ही चाड़ मलकी।

² एन्‍देरगेका संगरा नन्ना ही निमा अंगिय'अना आबोन ऎन अक्कन। मकेदोनिया नू र'उर ती एन्ने बाचकन ती फुलई मंजकन का, अख़ाया चक नू र'ऊ नीम पत्त'उर इतिंगाली ही दिम संगरा नना गे सपड़ारका र'अदर। निम्‍है ई अंगिय'अना आर ही ती कोड़हे आलारिन संगरा नना गे रिझाबाचा।

³ ऎम ई पत्त नू निम्‍है मइय्याँ फुलई मंजकम ती बाचका कत्था सिथिया अम्‍बो मना का, ऎन इबड़ा भइय्योरिन निम्है गुसन तइय्यालदन। नीम सपड़ारका र'ओर एन्ने आरिन बाचकन, अन्नेम नीम हूँ सपड़ारका र'आ।

⁴ मकेदोनिया ता आलर ती नीकईम एंग्‍है गने बर'ओर ती नीम चि'आ गे मल्‍ला सपड़ारका ऎरोर होले, ऎम निम्है मइय्याँ उइय्का असरा ही चड्डे एमा लज्‍जे मॊख़ना मनो (एन्ने ऎम निमन ब'अना ही चाड़ मल्ला), नीम हूँ लज्जे मॊख़'ओर दने।

⁵ औंगे ऎन सोचकन का, ऎन इबड़ा भईरिन एंग्है ती मुन्द निम्‍है गुसन तइय्या गे चाड़ र'ई। आर क'ओर ती नीम चि'आ गे गच्छरकादर आ बरारन ख़ॊजरकी सराजमा ननोर। होले ईद ढेवाँ ढेवाँ ती मला लिकिन उर्मी जिया ती रिझ गने चि'अना बरार मनो।

⁶ सुरता उइय्या का, नॆ जुक्‍की चाँख़दस आस जुक्‍की ख़ॊयोस, अरा नॆ बग्‍गे चाँख़दस आस बग्‍गे ख़ॊयोस।

⁷ औंगे ओर्मर तान तंग्है जिया नू चि'आ गे एकासे तिगचकानर अन्नेम दान चि'अना र'ई, कुटमुटर'आ ती मला अरा बड़पेलहा ती मला, एन्‍देरगेका रिझ ती चि'उरिन धर्मेस चोन्‍हा नन्दस।

⁸ धर्मेस उर्मी बरकतन निन्दका ती निमा चि'आ गे उंगू र'अस। औंगे निमा चाड़ र'ई अबड़ा उर्मिन उर्मी उल्ला ख़क्खोर, अरा उर्मी दौ नलख नू नीन्द्र'ओर क'ओर।

⁹ इदही पत्त नू नेम्हा पुथी नू लिख्रकी र'ई का, “आस हरग जिया ती कीड़र गे दान नंजस, आसी उजगो जनमजुग कम्रकी र'ओ।”

¹⁰ धर्मेस दिम चाँख़'उर गे बिहनी अरा ओना-मॊख़ा गे ओन्ना-मॊख़नन चि'अदस। अन्नेम आस निमा चाड़ ही बिहनी चि'ओस ती अदिन पर्द'आ गे ननोस, अरा निम्है नू हरग जिया ती दान चि'अना ही कोड़हे ख़ंजपन कुन्द्रत'ओस।

¹¹ ई लेक्‍खा नीम उर्मी रकम ही खुर्जी ती उरुब मनोर ती हरग जिया ती चि'आ गे उंगू मनोर। ईद ती निम्है दान एम्है सिरे ख़ट्टररकी दानन ख़क्ख'उर धर्मेस गे धन्यवाद चि'आ गे चड्डे मनो।

¹² औंगे नीम नन्ना ई सुसर नलख नेम्‍हा आलर ही चाड़न लेका मल पुराब'ई, लिकिन धर्मेसिन धन्‍यवाद नना गे बग्‍गे आलारिन रिझ्रत'ई।

¹³ निमा ई सुसर'अना नलख ती नीम निमन पुरुब मंजका र'अदर। आर धर्मेसी ओहमा ननोर, ईगेका नीम उर्मी पॆस्रना गने मसीसी दौ कत्‍थन इंझ्रकर, अरा आर ही गने अरा ओर्मर ही गने हरग जिया ती दानन ख़ट्टकर चिच्कर।

¹⁴ आर कोड़हे चोन्हा गने धर्मेस गुसन निमा गे गोहरार'ओर, एन्‍देरगेका आर अख़नर का धर्मेस निमन एका कोड़हे मया चिच्कादस।

¹⁵ धर्मेस चिच्कादस आ थाह'आ पोलना बरदान गे धन्‍यवाद।