2 कोरिन्‍थ 8 - पुना गच्छरना NT (BSI)

मकेदोनिया ता सन्नी मन्नन ऎरा ती सिख्र'आ

¹ अक्‍कु अना भईरो! मकेदोनिया ता कलीसिया गुट्ठी गे धर्मेस ऎदका मया ती आर नंजका ही पत्त नू ऎम निमन अख़त'आ बेद्ददम।

² आर कोड़हे खिलपत ही बिढ़्रना बेड़ा नू हूँ कोड़हे रिझ्रर। अरा आर कोड़हे कूल कीड़ा नू हूँ, गोट्टा जिया ती चि'अना ख़ट्टना नू बग्गे ती बग्गे चिच्चर।

³ आर ही पत्त नू एंगा गोवाह ईद का आर तम्है औसान ती हूँ, अरा तम्है औसान ती चाड़ियर ती हूँ दान चिच्चर। अरा तम्है गोट्टा जिया ती दान चिच्चर।

⁴ आर एमन कोड़हे अरजी गने नॆचर का येरुसलॆम ता नेम्‍हा आलर ही संगरा नना गे सुसर नलख नू भागी मना गे तमा गे हूँ मोका ख़क्ख्र'ओ।

⁵ आर एकासे ऎम असरा नंजकम अदिन ती कोड़हे नंजर का, आर मुन्द तमन उर्बस गे सोंपचर अरा ख़ॊख़ा धर्मेसी मने लेक्खा एमा गे तमन सोंपचर।

⁶ औंगे ऎम तीतुसिन नॆचकन का आस एका दौ नलखन निम्‍है मझी नू ऒड़ नंजकाचस, अदिन मुंजा गे आस बर'अरकी निमन रिझ्रत'ओस।

⁷ अक्कु गा नीम उर्मी कत्‍था नू पर्दका ऊसुका र'अदर, पत्त'अना नू, कत्था नू, लूर नू, उर्मी रकम ही चिहुंक नू, एम्है मइय्याँ ता निम्है चोन्हा नू पर्दका ऊसुका र'अदर। अन्नेम नीम ई बरारन चि'अना नू हूँ पर्दना ऊसकना र'ई।

⁸ ऎन इदन ओन्टा पॆसका लेक्खा मल ब'अदन। लिकिन नन्नर संगरा नन्ना नू एका लेक्खा अंगियारनर, इदन निमा गे ऎदना ती निम्है चोन्हा एका लेक्खा मानिम र'ई एन्ने अख़'आ गेम ऎन बेद्ददन।

⁹ नीम गा नम्है उर्बस येसु मसीसी मया आबोन अख़दर का, आस उरुब रहचका ती हूँ निम्‍है चड्डे कीड़ा मंजस, ईगेका नीम आसी कीड़ा मन्ना ती उरुब मना ओंगोर।

¹⁰ ई पत्त नू ऎन निमन ओन्टा सलहा चि'अदन का, इतिंगाली एका दौ नलखन नीम ऒड़ नंजकर, अदिन अक्‍कु नन्ना मुंजना दिम निम्‍है दौ र'ई। अदिन नन्ना नू लेका मला अदिन नना गे मने नन्ना नू हूँ नीमिम मुध रहचकर।

¹¹ औंगे आ नलखन ऒड़ नना गे निमा एवंदा अंगिय'अना रहचा, आद अदन नन्ना मुंजा गे हूँ र'अना र'ई। अक्कु निमा गुसन ऎ बग्गे र'ई अत्रु ती अदिन नंज मुंजके।

¹² अन्ति ओर्तस गे दान चि'आ गे अंगिय'अना र'ई होले, तंग्है औसान लेक्‍खा इन्‍द्रिइमन हूँ चीतारदस, धर्मेस अदिन इंझ्रदस। नॆख'आ तिम हूँ एन्ने असरा मल नन्तार'ई का आस अपन औसान ती बग्‍गे चि'ओस।

¹³ एंगा एन्ने मने मल्ला का, नन्नर रिझाब'ओर अरा नीम दुक्खे मनोर। ओर्मर ओन्टा लेक्खा र'आ गे दिम ऎन बेद्ददन।

¹⁴ ई बेड़ा नू निम्है निन्द्रका र'अना नन्नर ही चाड़न पुराब'ओ। अन्नेम नन्ना बेड़ा नू नन्नर ही निन्द्रका र'अना निम्है चाड़न पुराब'ओ। ई लेक्खम नीम इरबर हूँ ओन्टम मनोर क'ओर।

¹⁵ नेम्‍हा पुथी नू इदही पत्त नू एन्ने लिख्रकी र'ई का, “नॆ बग्‍गेम खु़जकाचस, आस गुसन कोड़हे बग्‍गे मल मंजा, अरा नॆ जुक्‍किम खु़जकाचस आस गुसन कोड़हे जुक्की मल मंजा।”

तीतुसिन कोरिन्थ तइय्यना

¹⁶ ऎन निम्है मइय्याँ एका लेक्खा अंगिय'अना ती रहचकन, अन्नेम धर्मेस तीतुस गे आ अंगिय'अना आबोन चिच्का ती ऎन धर्मेसिन धन्‍यवाद नन्दन।

¹⁷ एन्देरगेका तीतुस एमा ने'अना आबोन इंझ्रना ती लेका मला, आस कोड़हे अंगिय'अना गने तंग्है मने ती निम्‍है गुसन बरदस।

¹⁸ ऎम आसी गने ओर्त भईसिन हूँ तइय्यालदम, नॆ दौ कत्‍था तेंगा कुद्दना चड्डे उर्मी कलीसिया नू कोड़हे नामे ख़क्खका र'अस।

¹⁹ ईद लेका मला, अरा उर्बासी महबा गे अरा संगरा नना गे एमा गे र'अना अंगिय'अना आबोन ऎद'आ गे ऎम दान आबोन येरुसलॆम हो'ओम ख़ने, एम्है डहरे ऎकना नू एम्है गने संगे चि'आ गे कलीसिया आसिन चज्जकी र'ई।

²⁰ ई बरार आबोन ऎम ख़ट्टरकी चि'अना बारी, नॆ हूँ एमन अदही पत्त नू बदी अम्बोर नना बेद्ददम।

²¹ एन्देरगेका धर्मेसी ऎरना नू लेका मला आलर ही ऎरना नू हूँ उजगो आबोन नना गेम कोड़हे चिहुट नन्दम।

²² इबड़ा इरबर गने ऎम अउर ओन्टा एम्है भईसिन हूँ तइय्यालदम। ऎम घड़ीम घड़ी बिढ़चकम ती अक्कम का आस कयनो पत्त नू संगरा नना गे अंगिय'अना गने र'अस। अक्कु आस गे निम्है मइय्याँ कोड़हे असरा र'अना ती आस संगरा नना गे मुन्द तिम कोड़हे अंगिय'अना गने र'अस।

²³ तीतुसी पत्त नू गा आस एंग्है सझा र'अस अरा निमा गे सुसर नन्ना नू एंग्है संगे नलख ननू र'अस। अरा एम्‍है भइय्योर ही पत्त नू गा आर कलीसिया ती तइरका पैकर अरा मसीस गे महबा आबोन ओन्द्र'ऊ र'अनर।

²⁴ औंगे निम्है चोन्हन अरा ऎम निम्है पत्त नू फुलई मन्ना ती बाचका कत्था गुट्ठिन कलीसिया ही मुन्दहारे आर गे पुरुब ऎद'आ।