2 कोरिन्थ 2 - पुना गच्छरना NT (BSI)1 औंगे ऎन जिया नू घतचकन का ऎन निमन दुक्खे चि'आ गे निम्हा गुसन भेंट मना गे अउर मल बर'ओन। 2 एन्देरगेका ऎन निमन दुक्खे चि'अदन होले, नॆ एंगन रिझाब'ओ? एका आलस गे ऎन दुक्खे चिच्चकन आसिम एंगन रिझाब'आ ओंग्दस का? 3 औंगे ऎन निमा गे एन्ने चिठी लिखचकन का, एंग्हा बरना ती नॆखा ती एंगा रिझ मन्ना रहचा, आर ती ऎन दुक्खे मना मल बेद्ददन। नीम ओर्मर एंग्है रिझ्रना नू मेस्रोर, एन्ने निम्है ओर्मर ही पत्त नू एंगा असरा र'ई। 4 ऎन कोड़हे कल्पारना ती अरा जिया ही दोलख़ना ती अरा ख़ंजलख़ो चुरूख़नुम चुरूख़नुम ई चिठिन निमा गे लिखचकन। ऎन निमा दुक्खे चि'आ गे मला, लिकिन ऎन निमन एका कोड़हे चोन्हा नन्दन, अदिन नीम अख़'आ गे दिम ऎन अन्ने लिखचकन। पपहर गे छमा 5 अक्कुन एकअम ओर्तस दुक्खे चिच्चस होले, आस एंगन लेका मला, ओन तरती नीम ओर्मारिन हूँ दुक्खे चिच्चकादस। ऎन इदिन कोड़हे जॊर नना मल बेद्ददन। 6 एन्ने आलस गे निम्है ती बग्गेर दंडे चिच्चकानर, आद जुक्की मल्ला। 7 औंगे अक्कु नीम आसिन छमा नन्ना ती जिया सालत'अना र'ई। मला होले आस कोड़हे दुक्ख नू मुलख़ोस क'ओस। 8 औंगे नीम निम्है चोन्हन आस गे ऎद'आ गे ऎन निमन ने'अदन। 9 नीम उर्मी कत्थन पॆस्रदर का मला एन्ने निमन बिढ़'आ गे ऎन एंग्है चिठी नू एन्ने लिखचकन। 10 अक्कुन नीम नॆकन इन्द्रिइम छमा नन्दर, आसिन ऎन हूँ छमा नन्दन। ऎन छमा नना गे इन्द्रिइम र'ई होले, अदिन ऎन निम्है चड्डे मसीसी मुन्दहारे छमा नंजकादन। 11 सैतान नमन अम्बो बगड़'आ गे अन्ने नंजकन। एन्देरगेका नाम आसी चाल गुट्ठिन बलना लेक्खा मल्ला। पुना गच्छरना ही सुसर'उर 12 एकाबारी ऎन मसीसी दौ कत्था मेन्त'आ गे त्रोआस नगरे नू बरचकन ख़ने, असन उर्बस एंगा गे ओन्टा बली तिसगस चिच्चस। 13 अन्नु हूँ असन एंग्है जिया गे कोड़े मल ख़क्खरा, एन्देरगेका एंग्है भइय्योस तीतुसिन असन मल ख़क्खन। औंगे ऎन असता आलर ती बिदा मंजकन ती मकेदोनिया काला गे मुंहरारकन। 14 लिकिन धर्मेसी धन्यावाद मनन, आस सगरो जित'आ गे मसीस नू नमन कड़हाब'अदस, अरा आसी पत्त ता लूरन एम्है ती गोट्टा अड्डा नू महकारना लेक्खा बींड़दस। 15 एन्देरगेका ऎम नाड़रना आलर ही मझी नू अरा नठारना आलर ही मझी नू दौ कत्था तेंगना ती धर्मेसी ऎरना नू मसीसी एम्बा महक हिकदम। 16 जोक्क आलर गे खे'आ गे खे'अना ही महक अरा जोक्क आलर गे उज्जा गे उज्जना ही महक र'अदम। इबड़ा कत्था गुट्ठिन नना गे नॆखा जॊगे र'ई? 17 बग्गेर तम्है नफा गे धर्मेसी कत्था नू मेसाब'अनर, लिकिन ऎम अबड़ा आलर लेक्खा मलकम। ऎम गा धर्मेस ती तइरका आलर लेक्खा धर्मेसी मुन्दहारे मसीसी सवंग गने मानिम गने कत्थन तेंगा कुद्दम। |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India