1 तीमोथियुस 3 - पुना गच्छरना NT (BSI)

कलीसिया ही ईरू-ख़ूजू मुद्धस अरा ईरू-ख़ूजुर

¹ ई कत्‍था मानिम र'ई का एका ओर्तस कलीसिया ही ईरु-ख़ूजू मुद्धस मना बेद्ददस, आस दौ नलख गे मने नन्‍दस।

² औंगे कलीसिया ही ईरु-ख़ूजू मुद्धासी उज्‍जना बिज्‍जना उजगो मन्‍ना र'ई। अरा आस ओन्‍टे लेका मुक्‍का उइय्युस अरा चिहुंक, अरा म‍ईन जॊगे आल, अरा पाही ईरू अरा सिखाब‍'आ ऊंगू र'अना र'ई।

³ आस उंखुस अरा पस'ऊ कूड़ू अम्‍बोस र'आ। लिकिन आस लुद‍ऊ र'अना र'ई। आस नग्‍गानख्र‍'ऊ अरा ढिबा ही चिबाख़ार‍'ऊ अम्‍बोस र'आ।

⁴ आस गे तंग्‍है एड़पा पलीन बॆस गने कड़हाब'उस र'अना र'ई। अरा आसी ख़द्द-ख़र्रा आसिन म‍ईन ननू अरा पॆस्र'ऊ र'अना र'ई।

⁵ ओन्‍टा आलस तंग्‍है एड़पा पली ही दिम कड़हाब'आ बलदस होले, आस धर्मेसी खोंड़हन एकासे कड़हाब'आ ओंगोस?

⁶ कलीसिया ही ईरु-ख़ूजू मुद्धस पुना पत्त'उस अम्‍बोस र'आ। एन्ने होले आस मोठ‍ई मनोस ती सैतान गे ख़क्ख्रका दंडे बेसे ख़क्‍खोस।

⁷ आस सौंसरिहर नू हूँ बॆस नामे ख़क्ख्रका आलस मन्ना र'ई। औंगे आस निन्‍दा ख़क्‍ख्रकी सैतान ही फंदा नू मल खत्र'ओस।

⁸ एन्नेम कलीसिया ही ईरू-ख़ूजुर हूँ म‍ईन ही जॊगे र'अना र'ई। अरा आर उंखुर अरा आलारिन ठगना ती अर्ज‍'उर अम्‍बोर र'आ।

⁹ अरा आर पत्त‍'अना ही मानिम गड्डी आबोन निमन लखना ती सम्ड़'ऊ उइय्‍युर र'अना र'ई।

¹⁰ आरिन ईरू-ख़ूजू उइय्ना ती मुन्‍द बिढ़ना मनो। आर ओक्‍कना इजना नू बिगर बदी ही मनोर होले, आर ईरू-ख़ूजू मन्‍नर नेक‍अन।

¹¹ एन्नेम आर ही मुक्‍कर हूँ म‍ईन ही जॊगे र'अना र'ई। अरा आर दुस‍'ऊ अम्‍बोर र'आ। अरा आर चिहुंक अरा उर्मी कत्‍था नू पत्त‍'ऊ मन्नर नेक‍अन।

¹² कलीसिया ही ईरू-ख़ूजुर ओन्‍टे लेका मुक्‍का उइय्युर मन्नर नेक‍अन। आर तम्‍है ख़द्द-ख़र्रा अरा एड़पा पलीन बॆस लगे ऎरा ख़ॊजा उंगू मन्नर नेक‍अन।

¹³ एका ओर्तर ईरू-ख़ूजू नलखन बॆस लगे नन्नर, आर आलर ती म‍ईन गने दौ ख़ंजपा ख़क्‍खोर। अरा आर मसी येसुस नू पत्त'अना नू बग्‍गे डिढ मनोर।

महबा ही कोहाँ गम

¹⁴ ऎन निंग्‍है गुसन चाँड़हे बरना ही असरा नन्‍दन। अन्नु हों इबड़ा कत्‍थन निंगा लिख'आलदन

¹⁵ एन्‍देरगेका एंग्‍है बरना नू घड़ही मनो होले, नीन अख़'ओय का आलर गे धर्मेसी एड़पातर नू एकासे उज्‍जना र'ई, आ एड़पातर दिम उज्‍जना धर्मेसी कलीसिया हवे। ई कलीसिया दिम मानिम सिखाब'अना ही खुटा अरा नेव हवे।

¹⁶ ओर्मर अख़नर का महबा ही गम नगदे कोहाँ र'ई। धर्मेस आल कया नू तान ऎथरस अरा नेम्‍हा बॊलतस ती आस धर्मेसी ख़द्दस एन्ने इजताचस अरा मेर्ख़ा पैकर हूँ आसिन ईरियर। आस यहूदी मलनर आ जातियर नू मेन्‍तारस। अरा आस सौंसे ख़ॆख़ेल ता आलर ती पत्ततारस अरा आस मेर्ख़ा नू चोतारस।