1 थेस्सलोनिकॆयर 4 - पुना गच्छरना NT (BSI)धर्मेसिन रिझ नन्ना ही उज्जना 1 अक्कु अना भईरो, ऎम गोहरारदम अरा उर्बा येसुस नू आनदम, एकासे उज्जना ओक्कना र'ई अरा धर्मेसिन पत्तारना र'ई अदिन नीम एम्है तिगाब'अना ती अक्कादर। अरा अन्नेम उज्जा ओक्का लगदर, अइय्या अउरिम परदा। 2 ऎम निमा उर्बा येसुसी आकुस ती एन्देर एन्देर पॆसका ती रिझाबाचकादम अदिन नीम अख़दर। 3 धर्मेस बेद्ददस का नीम नेम्हा मना अरा पेहरन ही सोतरा नलख ती बछर'आ। 4 अरा नीम ओर्मर नेम्हा अरा मईन गने निम्है मॆदन सम्ड़ह'आ गे सिख्र'आ, 5 अरा धर्मेसिन बल्ली आ जाती लेक्खा निम्है मॆदन एन्ने पाप नन्ना ही चिबाख़ारना गे अमा चि'आ। 6 इबड़ा कत्था गुट्ठी ती नॆ हूँ तंग्है भईरिन अरा ताक अम्बोर ऎरा अरा अम्बोर ठक'आ। एन्देरगेका उर्बस इबड़ा उर्मी कत्थन ननुर गे दंडे चि'ऊ र'अदस। ई पत्त नू ऎम मुन्द तिम आनका अरा तिगाबाचका चिच्का रहचकम। 7 एन्देरगेका धर्मेस नमन नेम्हा उज्जना उज्जा गे मीख़कादस, सोतबोड़'आ उज्जना उज्जा गे मल्ला मीख़का। 8 ई चड्डे एकास तिगाब'अनन हींड़दस आस आलारिन मला धर्मेसिन हींड़दस नॆ निमा गे तंग्है नेम्हा बॊलतासिन चि'अदस। 9 अउर हूँ ऎम निमा गे भईरिन चोन्हा नन्ना ही पत्त नू लिखना ही चाड़ मलकी, एन्देरगेका तम्है ती नन्नर संगे चोन्हा ती र'आ गे धर्मेस निमन मुन्द तिम सिखाबाचका चिच्कादस। 10 मानिम नू गोट्टा मकेदोनिया नू र'अनर अबड़ा उर्मी भईर गने नीम चोन्हा नन्दर दिम। लिकिन भईरो निमा आर गने अउरिम कोड़हे चोन्हा नन्ना र'ई, अदगे निमन तिगाब'अदम। 11 अरा ऎम निमन पॆसकम अन्नेम कोड़े गने उज्जा, अरा तंग्है तंग्है नलखन नना, नन्नर ही नलख नू अमा नूता, अरा तंग्है ती अर्ज'आ गे चिहुट नना। ईदिम निमा चाड़ र'ई। 12 तहाँ निम्है उज्जना ती सौंसार ता आलर ती मईन ख़क्ख्र'ओ, लिकिन निमा निम्है चाड़ गे आरिन असरा नन्ना ती उज्जना मल्ला। उज्जा चो'अना ही असरा 13 अक्कु भईरो, केचका आलर ही पत्त नू नीम बल्लुर लेक्खा र'आ गे, अरा अदही पत्त नू असरा मल्ला आर ही लेक्खा नीम दुक्ख नू र'आ गे ऎम मल बेद्ददम। 14 ऎम पत्त'अदम का येसुस केच्चस ती उज्जा चॊचस। औंगे ऎम पत्त'अदम का नॆ मसीसिन इंझ्रनर ती खे'अनर आरिन येसुस अउरिम बरना बेड़ा नू धर्मेस आसी गने उज्त'ओस। 15 ऎम उर्बासी कत्था लेक्खा ब'अदम। ऎम नॆ उर्बासी बरना बेड़ा गूटी उज्जालदम। ऎम एम्है ती मुन्द केचका र'अनर आर ही ती मुन्द चो'आ गे पोल्लोम। 16 एन्देरगेका उर्बस तानिम चिच्चियारना आन्ना गने अरा मुध मेर्ख़ा पैकासी सड़ा गने अरा धर्मेसी पेंड़हे ख़रख़ना गने मेर्ख़ा ती एत्तोस बर'ओस। अरा मसीसिन इंझ्रर ती केचका र'अनर आर मुन्द उज्जा चो'ओर। 17 फेन नाम नॆ येसु मसीसी बरना बेड़ा नू उज्जदत अरा ख़ॆख़ेल नू अम्बरका र'अदत आर गने ख़ॊंड़र'अरकी नाम बदाली नू मेर्ख़ा नू उर्बस गने भेंटार'आ गे चॊदर'ओत। अरा नाम उर्मी उल्ला उर्बस गने र'ओत। 18 औंगे इबड़ा कत्था गुट्ठी ती ओर्त ओर्तोरिन रिझ्रत'आ। |
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
Bible Society of India